କୋଲକାତା ୨୬।୫: ବଙ୍ଗୋପସାଗରରେ ସୃଷ୍ଟି ହୋଇଥିବା ସାମୁଦ୍ରିକ ବାତ୍ୟା ‘ରେମଲ’ର ରବିବାର ମଧ୍ୟରାତ୍ରି ସୁଦ୍ଧା ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ ହେବ। ଏଣୁ ଲ୍ୟାଣ୍ଡଫଲ ବେଳେ ପ୍ରବଳ ବର୍ଷା ସହ ଘଣ୍ଟାପ୍ରତି ୧୧୦ରୁ ୧୨୦ ଓ ସ୍ଥଳ ବିଶେଷରେ ୧୩୫ କିଲୋମିଟର ବେଗରେ ପବନ ବହିବାର ଭାରତୀୟ ପାଣିପାଗ ବିଜ୍ଞାନ ବିଭାଗ (ଆଇଏମଡି) ପୂର୍ବାନୁମାନ କରିଛନ୍ତି। ଏଣୁ କୋଲକାତା ନେତାଜୀ ସୁଭାଷ ଚନ୍ଦ୍ର ବୋଷ ଅନ୍ତର୍ଜାତୀୟ ବିମାନ ବନ୍ଦର କର୍ତ୍ତୃପକ୍ଷ ରବିବାର ମଧ୍ୟାହ୍ନରୁ ୨୧ ଘଣ୍ଟା ନିମନ୍ତେ ଉଡାଣ ସଞ୍ଚାଳନ ନିଲମ୍ବିତ କରିଛନ୍ତି।
ମୌସୁମୀ ଆଗମନ ପୂର୍ବରୁ ଚଳିତ ଋତୁରେ ବଙ୍ଗୋପସାଗରରେ ଏହା ପ୍ରଥମ ଘୂର୍ଣ୍ଣିବାତ୍ୟା। ଏଣୁ କୋଲକାତାସ୍ଥିତ ଶ୍ୟାମାପ୍ରସାଦ ମୁଖାର୍ଜୀ ବନ୍ଦରରେ ରବିବାର ଅପରାହ୍ନରୁ ୧୨ ଘଣ୍ଟା ଲାଗି ମାଲ ଓ କଣ୍ଟୈନର ପ୍ରବନ୍ଧନ ପରିଚାଳନା ନିଲମ୍ବନ କରାଯାଇଛି। ସେହିପରି ପୂର୍ବ ରେଳବାଇ ରବିବାର ରାତି ୧୧ଟାରୁ ସୋମବାର ପୂର୍ବାହ୍ନ ୬ଟା ପର୍ଯ୍ୟନ୍ତ ସିୟାଲଦହ ଦକ୍ଷିଣ ଓ ବାରାସାତ-ହସନାବାଦ ସେକ୍ସନରେ ଟ୍ରେନଚଳାଚଳ ନିଲମ୍ବନ କରିଛନ୍ତି। ଫଳରେ ଅନେକ ଲୋକାଲ ଟ୍ରେନ ରଦ୍ଦ ହୋଇଯାଇଛି। ଏଥିରେ ଦକ୍ଷିଣ-ପୂର୍ବ ରେଳବାଇ ରବିବାର କାଣ୍ଡାରୀ ଏକ୍ସପ୍ରେସ୍ ସହିତ ଦୀଘାରୁ ଆସୁଥିବା କିଛି ଟ୍ରେନ ବାତିଲ କରିଦେଇଛନ୍ତି।
ସାମୁଦ୍ରିକ ବାତ୍ୟାକୁ ନଜରରେ ରଖି ସୁନ୍ଦରବନର ପ୍ରତ୍ୟେକ ବ୍ଲକ୍ରେ ୧୨ ନ୍ୟାସନାଲ ଡିଜାଷ୍ଟର ରେସ୍ପନସ୍ ବଳ( ଏନଡିଆରଏଫ) ଓ ଷ୍ଟେଟ୍ ଡିଜାଷ୍ଟର ରେସ୍ପନସ ଫୋର୍ସ (ଏସଡିଆରଏଫ)ଙ୍କୁ ପୂର୍ବରୁ ମୁତୟନ କରାଯାଇଛି। ଏହା ଛଡା ସନ୍ଦେଶଖାଲି ଓ ହିଙ୍ଗଲଗଞ୍ଜ କ୍ଷେତ୍ର ଉପରେ ଅତିରିକ୍ତ ଧ୍ୟାନ ଦିଆଯାଇଛି। ଜଳସେଚନ, ବିଦ୍ୟୁତ ଓ ସ୍ୱାସ୍ଥ୍ୟ ବିଭାଗ ବାତ୍ୟା ଜନିତ ବିପର୍ଯ୍ୟୟ ମୁକାବିଲା ନିମନ୍ତେ ସମ୍ପୂର୍ଣ୍ଣ ପ୍ରସ୍ତୁତିରେ ଅଛନ୍ତି। ପିଇବା ପାଣିର ୫୦ ହଜାର ପ୍ୟାକେଟ୍ ବ୍ୟବସ୍ଥା କରାଯାଇଥିବା ବେଳେ ପ୍ରଚୁର ମାତ୍ରାରେ ସୁଖିଲା ଭୋଜନ ପ୍ୟାକେଟ୍ ମହଜୁଦ ରଖାଯାଇଛି। କିଛି ଲୋକଙ୍କୁ ସ୍କୁଲ ଓ ରିଲିଫ ସେଣ୍ଟରରେ ଥଇଥାନ କରାଯାଇଛି।
ଘୂର୍ଣ୍ଣିବାତ୍ୟା ଯୋଗୁ ସୁନ୍ଦରବନ ମେନଗ୍ରୋଭ ଫରେଷ୍ଟ ପ୍ରଭାବିତ ହେବାର ଆଶଙ୍କା କରାଯାଉଛି। ସୁନ୍ଦରବନ ବିଶ୍ୱର ସର୍ବ ବୃହତ୍ତ ଜଙ୍ଗଲ ମଧ୍ୟରେ ଅନ୍ୟତମ। ଏହାକୁ ନିଜର ବିବିଧ ଜୀବନଜନ୍ତୁଙ୍କ ଲାଗି ଜଣାଯାଏ। ଏଥିରେ ୨୬୦ ପକ୍ଷୀ ପ୍ରଜାତି ବାସ କରୁଥିବା ବେଳେ ରୟାଲ ବେଙ୍ଗଲ ଟଇଗର, ଲୁଣା କୁମ୍ଭୀର, ଭାରତୀୟ ଅଜଗର ଓ ଅନ୍ୟ ସଂକଟଗ୍ରସ୍ତ ପ୍ରଜାତିର ଜୀବଜନ୍ତୁ ବାସ କରୁଛନ୍ତି। ସେହିପରି ସମୁଦ୍ରରେ ଆସୁଥିବା ଘୂର୍ଣ୍ଣିବାତ୍ୟାକୁ ନଜରରେ ରଖି ଭାରତୀୟ ନୌସେନା ମଧ୍ୟ ମାନବୀୟ ସହାୟତା ଓ ବିପର୍ଯ୍ୟୟ ଉଦ୍ଧାର ନିମନ୍ତେ ପୂର୍ଣ୍ଣ ପ୍ରସ୍ତୁତି କରିଛନ୍ତି।
ନୌସେନା ପ୍ରସ୍ତୁତିରେ ଦୁଇଟି ଜାହାଜକୁ ରିଲିଫ ଓ ଉଦ୍ଧାର କାର୍ଯ୍ୟ ନିମନ୍ତେ ରଖା ଯାଇଛି। ସି କିଙ୍ଗ ଓ ଚେତକ ହେଲିକପ୍ଟର ସହିତ ଡୋର୍ଣ୍ଣିୟର ବିମାନ, ବୁଡାଳୀ ଦଳ ଓ ବନ୍ୟା ସହାୟତା ଟିମ୍କୁ ପ୍ରସ୍ତୁତ ରଖାଯାଇଛି। ନୌସେନାର ରିଲିଫ ଓ ଉଦ୍ଧାର କାର୍ଯ୍ୟରେ ଏସଓପି ପାଳନ କରାଯାଉଛି। ୱାର୍ଲଡ ମେଟ୍ରୋଲଜିକାଲ ଅର୍ଗାନାଇଜେସନ (ଡବ୍ଲୁଏମଓ) ସାମୁଦ୍ରିକ ବାତ୍ୟାକୁ ମୋଟ ୫ଟି କ୍ୟାଟଗରୀରେ ବାଣ୍ଟିଛନ୍ତି। କ୍ୟାଟଗରୀ-୧ ବାତ୍ୟାରେ ପବନର ବେଗ ଘଣ୍ଟା ପ୍ରତି ୧୧୯-୧୫୩ କିଲୋମିଟର ମଧ୍ୟରେ ଥାଏ। ଏହା ଯୋଗୁ ବିଶେଷ କ୍ଷୟକ୍ଷତି ଆଶଙ୍କା ନଥାଏ। ଏଣୁ ଘୂର୍ଣ୍ଣିବାତ୍ୟା ‘ରେମଲ’ ଯୋଗୁ ସ୍ୱଳ୍ପ କ୍ଷୟକ୍ଷତି ହେବ ବୋଲି ଆକଳନ କରାଯାଉଛି। ତେବେ ପ୍ରଶାସନିକ ସ୍ତରରୁ ରିଲିଫ ଓ ଉଦ୍ଧାର କାର୍ଯ୍ୟ ନିମନ୍ତେ ସବୁପ୍ରକାର ଉଦ୍ୟମ କରାଯାଉଛି।
