କଟକ ୨୮।୦୩ : ଗାଡି ଦେଲେ ତ ଭଲ କଥା । ନହେଲେ ଆଉ କିଛି ଟଙ୍କା ମିଶାଇ ନୂଆ ଗାଡିଟେ କିଣିବେ । ମୁଁ ଗାଡିଟେ ୬ ହଜାର ଟଙ୍କାରେ କିଣିଛି । ଏମାନେ ଗାଡି ଉପରେ ୨୫ ହଜାର  ଟଙ୍କାର ଫାଇନ୍‌ ଲଗାଇଛନ୍ତି । ମୁଁ ଏତେ ଟଙ୍କା ଦେବି କୁଆଡୁ । ତାଠୁ ଭଲ ହେବ ମୁଁ ସେହି ୨୫ ହଜାର ଟଙ୍କାରେ ଆଉ ୧୦ ହଜାର ମିଶାଇ ନୂଆ ଗାଡିଟେ ଆଣିଦେବି । କଟକରେ ଚେକିଂ ବେଳେ ଧରାପଡିଥିବା ଜଣେ ଯୁବକ ଏପରି କହିଛନ୍ତି ।

ଖବର ଅନୁଯାୟୀ,  ମଙ୍ଗଳବାରଠୁ ପରିବହନ ବିଭାଗର ପକ୍ଷରୁ ସ୍ୱତନ୍ତ୍ର ଡ୍ରାଇଭ ଆରମ୍ଭ ହୋଇଛି । ଖାସ୍‌ କରି ସ୍କୁଲ୍‌ ଛାତ୍ରଛାତ୍ରୀଙ୍କ ଗାଡି ଡ୍ରାଇଭ ଉପରେ କଟକଣାକୁ କଡ଼ାକଡ଼ି କରିଛି ପରିବହନ ବିଭାଗ । ଏହିକ୍ରମରେ ମଙ୍ଗଳବାର ଦିନ କଟକ ଚଣ୍ଡୀ ଛକରେ RTO ପକ୍ଷରୁ କଡାକଡି ଚେକିଂ ହେଉଥିଲା । ଏହା ସମୟରେ ଓଡିଆ ବଜାରରେ ଜଣେ ଯୁବକ, ସେ ଏକ ଗ୍ୟାରେଜ୍‌ରେ କାମ କରନ୍ତି ।   ସକାଳ ସମୟରେ ସ୍କୁଟି ନେଇ ବକ୍ସି ବଜାରକୁ କୌଣସି କାମରେ ଯାଉଥିଲେ । ଏହି ସମୟରେ ଚଣ୍ଡି ଛକରେ ଚେକିଂ କରୁଥିବା ପୋଲିସମାନେ ତାଙ୍କୁ ଧରିଥିଲେ । ଗାଡିରେ ପୁରୁଣ ନମ୍ବର ପ୍ଲେଟ ଏବଂ ମୁଣ୍ଡ ହେଲ୍‌ମଟ୍‌ ନଥିବାରୁ ଜରିମାନା ଲଗାଯାଇଥିଲା ।ଯୁବକଙ୍କୁ ୨୫ ହଜାର ଟଙ୍କା ଫାଇନ୍‌ ଲଗାଇଛି ବିଭାଗ ।

ସେପଟେ ଫାଇନ୍‌ ଲାଗିବା ପରେ ପ୍ରତିକ୍ରିୟା ରଖିଛନ୍ତି ଯୁବକ । ସେ କହିଛନ୍ତି ଯେ, ମୁଁ ଏହି ସ୍କୁଟିଟିକୁ ମୋର ଜଣେ ଚିହ୍ନା ଲୋକଙ୍କ ଠାରୁ ୬ ହଜାର ଟଙ୍କାରରେ କିଣିଛି । ଆଉ ଏବେ ମୋ ଗାଡିରେ ଫାଇନ୍‌ ଲାଗିଛି ୨୫ ହଜାର ଟଙ୍କା । କିନ୍ତୁ ଏତେ ପଇସା ମୁଁ ଆଣିବି କେଉଁଠି । ତା ବଦଳରେ ଭଲ ହେବ କି ମୁଁ ଫାଇନ୍‌ ଦେବାକୁ ଥିବା ୨୫ ହଜାର ଟଙ୍କାରେ ଆଉ ୧୦ ହଜାର ଟଙ୍କା ମିଶାଇ ନୂଆ ଗାଡି ଆଣିବି । ମୋର ସମର୍ଥ ନାହିଁ  ଏତେ ପଇସା ଦେବାକୁ । ତାଠୁ ଭଲ ହେବ ମୁଁ ଗାଡିକୁ ଏଇଠି ଛାଡିକି ପଳେଇବି ।

ସେହିପରି ହେଲ୍‌ମେଟ୍‌ ଚେକିଂ ନେଇ ଯୁବକ ଜଣଙ୍କ କହିଛନ୍ତି ଯେ, ଗାଡିରେ ହେଲ୍‌ମେଟ୍‌ ଚେକିଂ ହେଉ, କିନ୍ତୁ ଗଳିକନ୍ଦି ଭିତରେ ଟିକିଏ କୋହଳ କରାଯାଉଛି । ଖାସ୍‌ କରି ଗାଡି ଗ୍ୟାରେଜ୍‌ରେ କାମ କରୁଥିବା ଯୁବକମାନଙ୍କ ପ୍ରତି ।