scan steel
web-baneer-728x90
WhatsApp Image 2023-12-06 at 12.52.17
728x90-banner-17.2.24jpg
Untitled-1 copy (1)
previous arrow
next arrow

Prameya News7

Prameya News7, News7 Odia, Odisha Latest News, Odisha Current Headlines, Odisha News Online, Odisha News, khabar odisha,news in oriya

ସଂଘର୍ଷରେ ଲେଖା ହେଲା ନୂଆ କାହାଣୀ, ଅସହାୟ ରାନୀ ହେବେ ଦୌଡରାଣୀ

13/12/2022 at 11:07 AM

କଟକ,୧୩/୧୨: ୨୦୧୦ ଅଗଷ୍ଟ ମାସ ସକାଳ । ଝିପି ଝିପି ବର୍ଷା ହେଉଥାଏ । ଯାଜପୁର ଜିଲ୍ଲାର ଷଠିପୁର ରାସ୍ତା କଡ଼ରେ ଦୁଷ୍କର୍ମ ଶିକାର ଜଣେ ୫/୬ ବର୍ଷ ବୟସର ଝିଅଟେ ଅତ୍ୟନ୍ତ ଅସହାୟ ଅବସ୍ଥାରେ ପଡ଼ିଥାଏ । ତା’ର ଏଭଳି ଅବସ୍ଥା ଦେଖି ଲୋକେ ତୁରନ୍ତ ତାକୁ ସେଠାରୁ ଉଦ୍ଧାର କରିଥିଲେ । ଝିଅଟି ଓଡ଼ିଆ କହିପାରୁନଥାଏ କିମ୍ବା ନିଜ ଘର ଠିକଣା ମଧ୍ୟ କହିପାରିନଥିଲା ।

ସ୍ଥାନୀୟ ଲୋକେ ତାକୁ ତୁରନ୍ତ ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ । ସେଠାରେ ଡାକ୍ତରମାନେ ପ୍ରାଥମିକ ଚିକିତ୍ସା କରିବା ପରେ ଉନ୍ନତ ଚିକିତ୍ସା ଆବଶ୍ୟକ ଥିବା କହିଥିଲେ । ଯେହେତୁ ସେତେବେଳେ ଜିଲ୍ଲା ସ୍ତରରେ ଶିଶୁ ସୁରକ୍ଷା ୟୁନିଟ୍‌ (ଡିସିପିୟୁ) କାର୍ଯ୍ୟକାରୀ ହୋଇନଥାଏ ତେଣୁ ଚିକିତ୍ସା ସହିତ ଏହି କୁନି ଝିଅର ପୁନର୍ବାସ ଓ ଥଇଥାନ ପାଇଁ ଯାଜପୁରର କେତେଜଣ ସାମାଜିକକର୍ମୀ ଝିଅକୁ କଟକର ବସୁନ୍ଧରା ମୁକ୍ତାଶ୍ରୟ କେନ୍ଦ୍ରକୁ ପଠାଇ ଦେଇଥିଲେ ।

୨୦୧୦ ଅଗଷ୍ଟ ୨୫ ତାରିଖରେ ସେ ଯାଜପୁର ମୁଖ୍ୟ ଚିକିତ୍ସାଳୟରୁ ବସୁନ୍ଧରାକୁ ଆସିଥିଲା । ବସୁନ୍ଧରା ପକ୍ଷରୁ ତା’ର ଅଧିକ ଚିକିତ୍ସା ପାଇଁ ତାକୁ ଶିଶୁଭବନ ଓ ଏସ୍‌ସିବିରେ ଭର୍ତ୍ତି କରାଯାଇଥିଲା । ସୁସ୍ଥ ହୋଇଥିଲା ସେ । ବସୁନ୍ଧରାରେ ତା’ର ନାଁ ରାନୀ (ଛଦ୍ମନାମ) ରଖାଯାଇଥିଲା । ଯେହେତୁ ରାନୀର ଘର, ପରିବାର, ଆତ୍ମୀୟସ୍ୱଜନଙ୍କ ବିଷୟରେ କିଛି ଜଣାନଥିଲା ତେଣୁ ରାନୀକୁ ପୋଷ୍ୟରେ ପଠାଇବା ପାଇଁ ବସୁନ୍ଧରା ପକ୍ଷରୁ ଉଦ୍ୟମ କରାଯାଇଥିଲା । ୨୦୧୧ ମସିହାରେ ରାନୀକୁ ପୋଷ୍ୟରେ ପଠାଇବା ପାଇଁ ଲିଗାଲ ଫ୍ରି ଘୋଷଣା କରାଯାଇଥିଲା ।

ମାତ୍ର କେହି ରାନୀକୁ ନେବା ପାଇଁ ଆଗ୍ରହ ପ୍ରକାଶ କରିନଥିଲେ । ରାନୀ ଏବେ କିଶୋରୀ । ସେ ଚୌଦ୍ୱାରର ସାମାଜିକ ଅନୁଷ୍ଠାନ ‘ସର୍ଭାଣ୍ଟ ଇଣ୍ଡିଆ ସୋସାଇଟି’ର ଜଣେ ଅନ୍ତେବାସୀ । ନିଜ ପରିଚୟ ନିଜେ ସୃଷ୍ଟି କରିବା ପାଇଁ ସେ ବଦ୍ଧପରିକର । ଖେଳକୁଦରେ ଯଥେଷ୍ଟ ଆଗ୍ରହ ରଖୁଥିବା ରାନୀ ଜିଲ୍ଲାସ୍ତରୀୟ ଦୌଡ଼ ପ୍ରତିଯୋଗିତାରେ କୃତିତ୍ୱ ହାସଲ କରିବା ସହିତ ବିଭିନ୍ନ କ୍ରୀଡ଼ା ପ୍ରତିଯୋଗିତାରେ ନିଜର ପ୍ରତିଭା ପ୍ରଦର୍ଶନ କରିସାରିଛନ୍ତି । ଭବିଷ୍ୟତରେ ନିଜକୁ ଜଣେ ପ୍ରତିଷ୍ଠିତ ଦୌଡ଼ାଳି ଭାବେ ଗଢ଼ି ତୋଳିବା ପାଇଁ ରାନୀ କସରତ ଚଳାଇଛନ୍ତି ।

ତେବେ ରାନୀଙ୍କ ଜୀବନର ସଂଘର୍ଷ କାହାଣୀ ସେତିକିରେ ଶେଷ ହୋଇନି । କୋମଳମତି ବୟସରେ ବଳାତ୍କାରର ଶିକାର ହେବା ପରେ ତାଙ୍କ ମାନସିକ ଅବସ୍ଥା ଏକପ୍ରକାର ବିଗିଡ଼ି ଯାଇଥିଲା । ବସୁନ୍ଧରାରେ ଥିବା ସମୟରେ ସେ ଦୁଇ ଥର ଲୁଚି କରି ପାଚେରି ଡେଇଁ ପଳାଇଥିଲେ । ଥରେ ତାଙ୍କୁ ବିଶାଖାପାଟଣା ଓ ଆଉ ଥରେ ପୁନେରୁ ଉଦ୍ଧାର କରାଯାଇ ବସୁନ୍ଧରାକୁ ଫେରାଇ ଅଣାଯାଇଥିଲା ।

୨୦୧୮ ମସିହାରେ ତୃତୀୟଥର ପାଇଁ ଲୁଚି ପଳାଇବାକୁ ଉଦ୍ୟମ କରୁଥିବା ବେଳେ ଧରାପଡ଼ିଯାଇଥିଲେ ଏହାପରେ ଜିଲ୍ଲା ଶିଶୁ ମଙ୍ଗଳ କମିଟି(ସିଡବ୍ଲୁସି) ଅଧ୍ୟକ୍ଷା ମନ୍ଦାକିନୀ ଜେମା ବ୍ୟକ୍ତିଗତ ଭାବେ ରାନୀଙ୍କୁ ଭେଟି ତାଙ୍କୁ କାଉନ୍‌ସେଲିଂ କରିଥିଲେ । ଏଠାରେ କ’ଣ ଅସୁବିଧା ହେଉଛି କି ବୋଲି ପଚାରିଥିଲେ । ରାନୀ କହିଥିଲେ ତାଙ୍କର ପାଠ ହେଉନି । ଖେଳିବାକୁ ତାଙ୍କର ଇଛା । ଏହାପରେ ଅଧ୍ୟକ୍ଷା ଜେମା ତାଙ୍କୁ ଖେଳିବାର ସବୁ ବ୍ୟବସ୍ଥା କରିବେ ବୋଲି ପ୍ରତିଶ୍ରୁତି ଦେଇଥିଲେ । ସେ କହିଥିଲେ, ତୁମ ସହ ପ୍ରତି ସପ୍ତାହରେ ଥରେ ଦୁଇଥର ଫୋନ୍‌ରେ କଥା ହେବି । ତୁମର ଯାହା ଅଭାବ ଅସୁବିଧା ଅଛି ଜଣାଇଲେ ସେସବୁ ପୂରଣ କରିବି । କିନ୍ତୁ ଲୁଚି ପଳାଇବାକୁ ଚେଷ୍ଟା କରିବ ନାହିଁ । ଏହାପରେ ରାନୀଙ୍କୁ ବସୁନ୍ଧରାରୁ ଚୌଦ୍ୱାରର ସର୍ଭାଣ୍ଟ ଇଣ୍ଡିଆ ସୋସାଇଟିକୁ ସ୍ଥାନାନ୍ତର କରାଯାଇଥିଲା । ରାନୀ ସେଠାରେ ୨୦୧୮ ମସିହାରୁ ରହିବା ସହିତ ଦୌଡ଼ ଅଭ୍ୟାସ କରୁଛନ୍ତି ।

ଅନ୍ୟପକ୍ଷରେ ୨୦୧୦ରେ ରାନୀ ବଳାତ୍କାରର ଶିକାର ହୋଇଥିଲେ । ଆଇପିସିର ୩୭୬ ଧାରାରେ ସେ ଜଣେ ପୀଡିତା ଥିଲେ । କିନ୍ତୁ ଅଦ୍ୟାବଧି ରାନୀ ପୀଡ଼ିତା କ୍ଷତିପୂରଣ ରାଶି (ଭିକ୍ଟିମ୍‌ କମ୍ପେନ୍‌ସେସନ୍‌) ପାଇବାରୁ ବଞ୍ଚିତ ହୋଇଛନ୍ତି ଯାହା ଏବେ ତାଙ୍କ ଭବିଷ୍ୟତକୁ ଅଧିକ ଅନ୍ଧକାରମୟ କରିଛି । ଇତିମଧ୍ୟରେ ଶିଶୁ ମଙ୍ଗଳ କମିଟି ଅଧ୍ୟକ୍ଷା ଜେମା ଯାଜପୁର ଜିଲ୍ଲା ଜଜ୍‌ଙ୍କ ସହ ଯୋଗାଯୋଗ କରିଛନ୍ତି । ଶିଶୁ ମଙ୍ଗଳ କମିଟି ଅଧ୍ୟକ୍ଷା ଭାବେ ଜେମାଙ୍କ କାର୍ଯ୍ୟକାଳ ଶେଷ ହେବାକୁ ଆଉ ମାତ୍ର ସପ୍ତାହେ ବାକି ଅଛି । ତଥାପି ଏହି ସମୟ ଭିତରେ ହେଉ କିମ୍ବା କାର୍ଯ୍ୟକାଳ ଶେଷ ହେବା ପରେ ହେଉ ରାନୀ ପାଇଁ କ୍ଷତିପୂରଣ ରାଶି କେମିତି ମଞ୍ଜୁର ହେବ ସେ ବ୍ୟବସ୍ଥା କରିବେ ବୋଲି ଜେମା କହିଛନ୍ତି । ଅତି କମ୍‌ରେ ରାନୀ ଯଦି ୩ ଲକ୍ଷ ଟଙ୍କା କ୍ଷତିପୂରଣ ପାଏ ତେବେ ସେହି ଟଙ୍କାକୁ ବିନିଯୋଗ କରି ସେ ନିଜ ଭବିଷ୍ୟତ ଗଢ଼ିପାରିବ ବୋଲି ଜେମା ସୂଚନା ଦେଇଛନ୍ତି ।

   Related Posts