ନୂଆଦିଲ୍ଲୀ ୩୦।୦୫:  ଆଇପିଏଲ୍ ଫାଇନାଲର ହିରୋ । ଚେନ୍ନାଇ ସୁପର କିଙ୍ଗର ମ୍ୟାଚ୍ ଓ୍ବିନର । ସାର୍ ରବିନ୍ଦ୍ର ଜାଡେଜା । ଶେଷ ୨ ବଲରେ ଗୁଜୁରାଟଠୁ ମ୍ୟାଚ ଛଡେଇନେଲେ ଗୁଜୁରାଟ ବୟ୍ । ଧୋନୀ-ଧୋନୀ, ଜାଡେଜା-ଜାଡେଜା ନାରାରେ କମ୍ପିଲା ନରେନ୍ଦ୍ର ମୋଦୀ ଷ୍ଟାଡିୟମ୍ । ଧୋନୀଙ୍କ ଟିମକୁ ଆଇପିଏଲର ୫ମ ଟାଇଟଲ୍ ।

ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯାଉଥିବା ଆଇପିଏଲ୍ ଫାଇନାଲ ମ୍ୟାଚର ଶେଷ ଓଭରରେ ଆବଶ୍ୟକ ଥିଲା ୧୩ ରନ୍ । ଗୁଜରାଟ ବୋଲର ମୋହିତ ଶର୍ମା ଓଭରର ପ୍ରଥମ ୪ ବଲରେ ଦେଇଥିଲେ ମାତ୍ର ୩ ରନ୍ । ଚେନ୍ନାଇକୁ ଜିତିବା ପାଇଁ ଶେଷ ୨ ବଲରେ ଆବଶ୍ୟକ ଥିଲା ୧୦ ରନ୍  । ଆଉ ଶେଷ ୨ୟ ବଲରେ ଜାଡେଜାଙ୍କ ଛକାରେ ଟଳମଳ ହୋଇଥିଲା ମୋହିତ ଶର୍ମାଙ୍କ କନଫିଡେଣ୍ଟ । ଶେଷ ବଲରେ ପୁଣି ଏକ ଚୌକା ମାରି ଧୋନିଙ୍କ ଷ୍ଟାଇଲରେ ମ୍ୟାଚ୍ ଶେଷ କରିଥିଲେ ବାମ ହାତୀ ଅଲରାଉଣ୍ଡର । ଫାଇନାଲରେ ଜାଡେଜା ୬ଟି ବଲରୁ କଲେ ଅପରାଜିତ ୧୫ ରନ୍ ।

ଆଇପିଏଲ୍ ୨୦୨୩ରେ ରବିନ୍ଦ୍ର ଜାଡେଜା ୧୬ଟି ଆଇପିଏଲ୍ ମ୍ୟାଚ୍ ଖେଳି ସଂଗ୍ରହ କରିଛନ୍ତି ୧୯୦ ରନ୍ । ଚଳିତ ସିଜିନରେ ଜାଡେଜାଙ୍କ ଷ୍ଟ୍ରାଇକ୍ ରେଟ ରହିଛି ୧୩୭.୭। ଜାଡେଜା ଚଳିତ ଆଇପିଏଲରେ ମାରିଛନ୍ତି ୧୧ ଟି ଚୌକା ଓ ୯ଟି ଛକା । ଅଲରାଉଣ୍ଡର ୩୪୨ ବଲରେ ଦେଇଛନ୍ତି ୪୩୧ ରନ୍ । ଏଥିସହିତ ସେ ଚଳିତ ସିଜିନରେ ନେଇଛନ୍ତି ମୋଟ ୨୦ଟି ଓ୍ବିକେଟ । ଲଗାତାର ଚୌକା ଓ ଛକା ମାରି ଚେନ୍ନାଇକୁ ଜିତାଇଥିବା ରବିନ୍ଦ୍ର ଜାଡେଜା ଏବେ ଟ୍ୱିଟର ଟ୍ରେଣ୍ଡରେ । ଅଲରାଉଣ୍ଡରଙ୍କୁ ଟ୍ବିଟରରେ ଫ୍ୟାନ୍ସମାନେ କରୁଛନ୍ତି ଅଭିନନ୍ଦନର ବର୍ଷା।