ଦେବଗଡ ୨୦|୧୨: ପେଥାଇ ପ୍ରଭାବରେ ହୋଇଥିବା ଅଦିନିଆ ବର୍ଷା ଯୋଗୁଁ ଦେବଗଡ ଜିଲ୍ଲାର ବିଭିନ୍ନ ବ୍ଲକ୍ ଅଞ୍ଚଳରେ ବ୍ୟାପକ କ୍ଷୟକ୍ଷତି ଘଟିଛି । ତିଲେଇବଣୀ ବ୍ଲକ କାଳିଆଖମାର, ହେଟଖମାର ଗାଁର ଅନେକ ଚାଷୀଙ୍କ ଧାନ ଫସଲ ଉଜୁଡି ଯାଇଛି । ବିଲରେ କଟାହୋଇ ପଡିଥିବା ଧାନକୁ ଚାଷୀ ପାଣିରୁ ଛାଣିବାରେ ବ୍ୟସ୍ତ ।  ଧାନ ସହ ଅନ୍ୟାନ୍ୟ ଅମଳକ୍ଷମ ଫସଲ ପନିପରିବା ଏହି ଅଦିନିଆ ବର୍ଷା ଯୋଗୁଁ ନଷ୍ଟ ହୋଇ ଯାଇଛି। ଧାନ ସହ ପନିପରିବା ଓ ସୋରିଷ କ୍ଷେତ ସଂପୂର୍ଣ୍ଣ କ୍ଷତିଗ୍ରସ୍ତ ହୋଇଛି । ଋଣ କରି ଫସଲ କରିଥିବା ଚାଷୀ ଏବେ ମୁଣ୍ଡରେ ହାତ ଦେଇ ବସିଛି । ଚାଷରେ ବ୍ୟାପକ ଅର୍ଥ ବିନିଯୋଗ କରି ଶେଷରେ ଭାଗ୍ୟ ଉପରେ ଭରସା ରଖିଛନ୍ତି । ଅଦିନିଆ ବର୍ଷା ଯୋଗୁଁ ହୋଇଥିବା କ୍ଷୟକ୍ଷତି ଆକଳନ ପାଇଁ  ବିଭିନ୍ନ ଅଧିକାରୀ  ନିୟୋଜିତ ହୋଇଛନ୍ତି । କ୍ଷୟକ୍ଷତି ଆକଳନ ରିପୋର୍ଟ ଆସିବାପରେ ଏହା ସରକାରଙ୍କ ପାଖକୁ ପଠାଯିବ ବୋଲି ଆପଦ କାଳିନ ଅଧିକାରୀ କହିଛନ୍ତି । ଅଦିନିଆ ବର୍ଷା ପ୍ରଭାବରେ ହୋଇଥିବା କ୍ଷୟକ୍ଷତି ଯୋଗୁଁ ଚାଷୀ କୂଳ ହତାଶ ହୋଇପଡ଼ିଛି। ଏଣୁ ଶୀଘ୍ର  ତଦନ୍ତ କରି ଚାଷୀଙ୍କୁ କ୍ଷତିପୂରଣ ଯୋଗାଇ ଦେବାକୁ ଦାବି କରାଯାଇଛି।