ଭୁବନେଶ୍ବର ୧।୪: ବଲାଙ୍ଗିର ଜାଲ୍ ସାର୍ଟିଫିକେଟ୍ ମାମଲାରେ ତଦନ୍ତ ଦାୟିତ୍ବ ନେଇଛି କ୍ରାଇମବ୍ରାଞ୍ଚ । ଜଣେ ଡିଏସ୍ପିଙ୍କ ନେତୃତ୍ବରେ ଦୁଇଟି ଟିମ୍ ଗଠନ ହୋଇଛି । ଗୋଟିଏ ଟିମ୍ ବଲାଙ୍ଗିର ଗସ୍ତ କରି ଘଟଣାସ୍ଥଳରେ ଛାନଭିନ୍ କରିବ । ଅନ୍ୟ ଟିମ୍ ବଲାଙ୍ଗିର ପୋଲିସର ତଦନ୍ତ ନେଇ କାଗଜପତ୍ର ଛାନଭିନ୍ କରିବ ।
ଉଲ୍ଲେଖଯୋଗ୍ୟ ଯେ, ବଲାଙ୍ଗୀର ଜାଲ୍ ସାର୍ଟିଫିକେଟ୍ ଘଟଣାରେ ମାଷ୍ଟର ମାଇଣ୍ଡଙ୍କ ସମେତ ୧୯ ଜଣଙ୍କୁ ଗିରଫ କରିଥିଲା ବଲାଙ୍ଗୀର ପୋଲିସ । ମାଷ୍ଟର ମାଇଣ୍ଡ ମନୋଜ ମିଶ୍ର ଓ ତାଙ୍କ ସହଯୋଗୀ ଆଲୋକ ଉଦଗାତାଙ୍କ ସମେତ ୧୯ ଜଣଙ୍କୁ ପୋଲିସ ଗିରଫ କରିଥିଲା । ମନୋଜଙ୍କ ରିଲାଏନ୍ସ ଏଜୁକେଶନାଲ କମ୍ପ୍ଲେକ୍ସରୁ ଜାଲ୍ ସାର୍ଟିଫିକେଟ୍ ତିଆରି କରୁଥିବା ବହୁ ସାମଗ୍ରୀ ଜବତ କରିଥିଲା ପୋଲିସ । ମନୋଜଙ୍କ ଡାଏରୀରୁ ବହୁ ସହଯୋଗୀଙ୍କ ତଥ୍ୟ ସହ ମିଳିଥିବା ହାର୍ଡଡିସ୍କରୁ ଅନେକ ଗୁମର ଖୋଲିବା ନେଇ ସୂଚନା ଦେଇଥିଲେ ଏସପି ।
ତେବେ ୪ଟି କମ୍ପ୍ୟୁଟର, ୨ଟି ଲ୍ୟାପଟପ, ୩ଟି ପ୍ରିଣ୍ଟର, ୧ଟି ସ୍କାନର, ଗୋଟିଏ ଜେରସ୍କ ମେସିନ, ୨୫୦ ଜିବି ଏସ୍କଟରନାଲ ଡ୍ରାଇଭ, ବହୁ ମୋବାଇଲ ଫୋନ୍ ଓ ୩ ଲକ୍ଷ ୬୭ ହଜାର ଟଙ୍କା ଜବତ କରିଥିଲା ପୋଲିସ । ସେହିପରି ଏକ ହଜାରରୁ ଅଧିକ ସାର୍ଟିଫିକେଟ୍, ବଲାଙ୍ଗୀର ତହସିଲଦାରଙ୍କ ସିଲ୍, ତହସିଲ କୋର୍ଟ ସିଲ୍ ସହ ୨୭ରୁ ଅଧିକ ସ୍କୁଲ କଲେଜର ସିଲ୍ ମଧ୍ୟ ଜବତ ହୋଇଥିଲା । ଏହାସହ ସରକାରୀ ଅଧିକାରୀଙ୍କ ଭେରିଫିକେସନ ଲେଟର ପୋଲିସ ହାତରେ ଲାଗିଥିଲା ।
