କୋଲକାତା ୩୦।୧୦ : ଆଇସିସି ବିଶ୍ୱକପ୍‌ ୨୦୨୩ । ଆସନ୍ତା ୫ ତାରିଖରେ କୋଲକାତାରେ ଖେଳାଯିବ ଏକ ହାଇଭୋଲଟେଜ୍‌ ମ୍ୟାଚ୍‌ । ମୁହାଁମୁହିଁ ହେବେ ଟୁର୍ଣ୍ଣାମେଣ୍ଟର ଦୁଇ ଟପ୍‌ ଟିମ୍‌ । ଭାରତ-ଦକ୍ଷିଣ ଆଫ୍ରିକା ମଧ୍ୟରେ ହେବ ଜୋରଦାର ଲଢେଇ । ନଭେମ୍ବର ୫ ତାରିଖରେ କିଙ୍ଗ କୋହଲିଙ୍କ ଜନ୍ମଦିନ । ତେଣୁ ଏହି ଦିନ ପାଇଁ କିଛି ସ୍ପେଶାଲ ପ୍ଲାନ୍‌ କରିଛି ବେଙ୍ଗଲ କ୍ରିକେଟ୍ ଆସୋସିଏସନ (ସିଏବି)।

ଖବର ଅନୁଯାୟୀ, ନଭେମ୍ବର ୫ରେ ବିରାଟ କୋହଲିଙ୍କ ପୁରୁବ ୩୪ ବର୍ଷ । ଆଉ ୩୫ ବର୍ଷ ବୟସରେ ଦେବେ ପାଦ । ଏହି ଦିନ ଇଡେନ୍‌ ଗାର୍ଡେନ କ୍ରିକେଟ୍‌ ଷ୍ଟାଡିୟମରେ ଖେଳାଯିବ ଭାରତ-ଦକ୍ଷିଣ ଆଫ୍ରିକା ମ୍ୟାଚ୍‌ । ତେଣୁ ଏହି ଦିନ ବିରାଟ କୋହଲିଙ୍କ ଜନ୍ମ ଦିନ ପଡୁଥିବାରୁ ବ୍ୟାପକ ପ୍ରସ୍ତୁତି କରିଛି ସିଏବି । ସେହି ଦିନ ମ୍ୟାଚ୍‌ ପୂର୍ବରୁ କେଟ୍‌ କଟାଯିବା ସହ ୭୦,୦୦୦  ଦର୍ଶକଙ୍କୁ ‘କୋହଲି ମାସ୍କ’ ପ୍ରଦାନ କରାଯିବ ବୋଲି  ସଭାପତି ସ୍ନେହାଶିଷ ଗାଙ୍ଗୁଲି ସ୍ପଷ୍ଟ କରିଛନ୍ତି ।

ସେ ଆହୁରି ମଧ୍ୟ କହିଛନ୍ତି ଯେ, କିଙ୍ଗ୍‌ କୋହଲିଙ୍କ  ଜନ୍ମଦିନ ପାଳିବା ପାଇଁ ସିଏବି ବିଶେଷ ଭାବେ ପ୍ରସ୍ତୁତି କରିଛି । ମ୍ୟାଚ୍‌ ପୂର୍ବରୁ ପ୍ରଥମେ କେକ୍‌  କଟାଯିବ । ଆମେ ଆଇସିସି ନିକଟରୁ ଏନେଇ  ଅନୁମତି ପାଇବୁ ବୋଲି ଆଶା କରୁଛୁ ।  ଏହାପରେ କୋହଲିଙ୍କୁ ସମ୍ବର୍ଦ୍ଧିତ କରାଯିବା  ସହ ଏକ ମେମେଣ୍ଟୋ ପ୍ରଦାନ କରାଯିବ ।  ଷ୍ଟାଡିୟମରେ ୭୦,୦୦୦ ଦର୍ଶକଙ୍କୁ ‘କୋହଲି  ମାସ୍କ’ ବଣ୍ଟାଯିବ । ସିଏବି ଚାହୁଁଛି ଯେ, କୋହଲି ଯେତେବେଳେ ପଡ଼ିଆକୁ ପ୍ରବେଶ କରିବେ । ସେତବେଳେ ଦର୍ଶକମାନେ  ଏହି ମାସ୍କ ପିନ୍ଧି ତାଙ୍କୁ ସ୍ୱାଗତ କରିବେ ।’

ସୂଚନାଯୋଗ୍ୟ, କିମ୍ବଦନ୍ତୀ ବ୍ୟାଟର  ସଚିନ ତେନ୍ଦୁଲକର ୨୦୧୩ରେ ଇଡେନ୍‌ରେ  କ୍ୟାରିୟରର ୧୯୯ତମ ଟେଷ୍ଟ ଖେଳିଥିଲେ ।  ଏହି ମ୍ୟାଚ୍‌ରେ ସିଏବି ତାଙ୍କୁ ଉତ୍ସାହିତ କରିବା  ପାଇଁ ଦର୍ଶକଙ୍କୁ ‘ସଚିନ ମାସ୍କ’ ବଣ୍ଟନ କରିଥିଲା । ବିଶ୍ୱକପ୍‌ର ସପ୍ତମ ରାଉଣ୍ଡ୍‌ ମୁକାବିଲାରେ ଭାରତ  ଓ ଦକ୍ଷିଣ ଆଫ୍ରିକା ସାମ୍ନାସାମ୍ନି ହେବେ । ଏହି ମ୍ୟାଚ୍‌ର  ସମସ୍ତ ଟିକେଟ୍‌ ବହୁ ପୂର୍ବରୁ ବିକ୍ରି ହୋଇସାରିଛି । ବିଶ୍ୱକପ୍‌ର ସପ୍ତମ ରାଉଣ୍ଡ୍‌ ମୁକାବିଲାରେ ଭାରତ ଓ ଦକ୍ଷିଣ ଆଫ୍ରିକା ସାମ୍ନାସାମ୍ନି ହେବେ । ଏହି ମ୍ୟାଚ୍‌ର  ସମସ୍ତ ଟିକେଟ୍‌ ବହୁ ପୂର୍ବରୁ ବିକ୍ରି ହୋଇସାରିଛି । ତେଣୁ ଷ୍ଟାଡିୟମ ହାଉସ୍‌ଫୁଲ୍‌ ହେବା ନିଶ୍ଚିତ ।