scan steel
web-baneer-728x90
WhatsApp Image 2023-12-06 at 12.52.17
728x90-banner-17.2.24jpg
Untitled-1 copy (1)
previous arrow
next arrow

Prameya News7

Prameya News7, News7 Odia, Odisha Latest News, Odisha Current Headlines, Odisha News Online, Odisha News, khabar odisha,news in oriya

ଚୟନ ଶିବିରକୁ ଆସି ମହିଳା କ୍ରିକେଟର ନିଖୋଜ, ମଙ୍ଗଳାବାଗ ଥାନାରେ ଏତଲା

13/01/2023 at 9:33 AM

କଟକ,୧୩/୦୧: ଓଡ଼ିଶା ମହିଳା କ୍ରିକେଟ୍‌ ସିନିୟର୍‌ ଟିମ୍‌ ଚୟନ ପ୍ରକ୍ରିୟାରେ ବାଦ୍‌ ପଡ଼ିଯିବା ପରେ ହଠାତ୍‌ ଜଣେ ଖେଳାଳି ହୋଟେଲ୍‌ରୁ ନିଖୋଜ ହୋଇଯାଇଛନ୍ତି । ନିଖୋଜ କ୍ରିକେଟିୟର୍‌ ହେଲେ ରାଜଶ୍ରୀ ସ୍ୱାଇଁ । ତାଙ୍କ ଘର ପୁରୀ ଜିଲ୍ଲା ରାମଚଣ୍ଡୀ ଅଞ୍ଚଳରେ ।

କ୍ୟାମ୍ପରେ ନିଜର ଦକ୍ଷତା ପରୀକ୍ଷା ଦେବାକୁ ଆସି ଟିମ୍‌ରୁ ବାଦ୍‌ ପଡ଼ିବା ପରେ ସେ ଅନ୍ତର୍ଦ୍ଧାନ ହୋଇଯିବା ଖବର ଓଡ଼ିଶା କ୍ରିକେଟ୍‌ ଆସୋସିଏସନ୍‌ ସମେତ କ୍ରିକେଟ୍‌ ପ୍ରେମୀଙ୍କ ମଧ୍ୟରେ ଚାଞ୍ଚଲ୍ୟ ସୃଷ୍ଟି କରିଛି । ତାଙ୍କ ମୋବାଇଲ୍‌ ନମ୍ବର ସୁଇଚ୍‌ଡ୍‌ ଅଫ୍‌ ରହିଥିବା ବେଳେ ତାଙ୍କ କଳା ରଙ୍ଗର ଆକ୍ଟିଭା ସ୍କୁଟି ଏବଂ ହେଲ୍‌ମେଟ୍‌ ଆଠଗଡ଼ ବନଖଣ୍ଡ ଗୁରୁଡ଼ିଝାଟିଆ ଥାନା ଅନ୍ତର୍ଗତ କପୁରସିଂରୁ ବ୍ରାହ୍ମଣବସ୍ତ ରାସ୍ତାର ତାଳଧଣ୍ଡି ରାସ୍ତାରେ ଏକ ଜଙ୍ଗଲ ନିକଟରୁ ମିଳିଛି । ଗାଡ଼ି ଏବଂ ହେଲମେଟ୍‌ ମିଳିଥିଲେ ହେଁ ରାଜଶ୍ରୀଙ୍କର ସନ୍ଧାନ ମିଳିପାରିନାହିଁ ।

ରାଜଶ୍ରୀଙ୍କ ପତ୍ତା ନମିଳିବା ଘଟଣା ଓସିଏ କର୍ମକର୍ତ୍ତାଙ୍କୁ ଅଡ଼ୁଆରେ ପକାଇବା ସହ ସାଥୀ ଖେଳାଳି ଏବଂ ପରିବାର ଲୋକଙ୍କୁ ଆଶଙ୍କାରେ ଛନ୍ଦିଛି । ଓସିଏ ପକ୍ଷରୁ ମହିଳା କ୍ରିକେଟ୍‌ ଟିମ୍‌ କୋଚ୍‌ ପୁଷ୍ପାଞ୍ଜଳି ବାନାର୍ଜୀ ଗତକାଲି ରାତିରେ ଏନେଇ ମଙ୍ଗଳାବାଗ ଥାନାରେ ଏତଲା ଦେଇଥିବା ସୂଚନା ମିଳିଛି । ଏତଲା ଆଧାରରେ ପୁଲିସ ନିଖୋଜ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଥାନା ଅଧିକାରୀ ସୁଧାଂଶୁ ଜେନା କହିଛନ୍ତି ।

ମହିଳା କ୍ରିକେଟ୍‌ କୋଚ୍‌ ପୁଷ୍ପାଞ୍ଜଳି ଏତଲାରେ ଦର୍ଶାଇଛନ୍ତି, ସିନିୟର ମହିଳା ଟିମ୍‌ ଚୟନ ଲାଗି ଡିସେମ୍ବର ୨୩ରୁ ଜାନୁଆରୀ ୧୦ ପର୍ଯ୍ୟନ୍ତ ଏକ ପ୍ରଶିକ୍ଷଣ କ୍ୟାମ୍ପ୍‌ ଚାଲିଥିଲା । ଏଥିଲାଗି ମହିଳା କ୍ରିକେଟିୟରମାନେ ଓସିଏ ତତ୍ତ୍ୱାବଧାନରେ ବଜ୍ରକବାଟିସ୍ଥିତ ଏକ ହୋଟେଲ୍‌ରେ ରହୁଥିଲେ । ୩୯ ଜଣ ମହିଳା କ୍ରିକେଟିୟରଙ୍କୁ ନେଇ ଚାଲିଥିବା ଏହି କ୍ୟାମ୍ପରେ ରାଜଶ୍ରୀ ସ୍ୱାଇଁ(୨୬) ମଧ୍ୟ ସାମିଲ୍‌ ଥିଲେ ।

ପ୍ରଥମ ପର୍ଯ୍ୟାୟ ଚୟନରେ ୨୫ ଜଣ ଖେଳାଳିଙ୍କୁ ନିଆଯାଇ ପ୍ରଶିକ୍ଷଣ ଚାଲିଥିଲା । ଦ୍ୱିତୀୟ ପର୍ଯ୍ୟାୟ ଚୟନରେ ତଥା ଫାଇନାଲ୍‌ ସିଲେକ୍ସନ ଟିମ୍‌ରେ ୧୬ ଜଣଙ୍କୁ ଗତ ମଙ୍ଗଳବାର ଅର୍ଥାତ୍‌ ୧୦ ତାରିଖ ଦିନ ବଛା ଯାଇଥିଲା । ଉକ୍ତ ୧୬ ଜଣିଆ ଦଳରେ ଚୟନ ହୋଇଥିବା ଖେଳାଳିମାନଙ୍କ ତାଲିକା ଗତକାଲି ପ୍ରକାଶ ପାଇଥିଲା । ମାତ୍ର ଏହି ଚୟନ ପ୍ରକ୍ରିୟାରେ ରାଜଶ୍ରୀ ବାଦ୍‌ ପଡ଼ିଥିଲେ । ହୋଟେଲ୍‌ ରୁମ୍‌ରେ ରହୁଥିବା ସାଥୀ ଖେଳାଳି ଏବଂ ଚୟନ ହୋଇଥିବା ଅନ୍ୟ ଖେଳାଳିମାନେ ଗତକାଲି ଡ୍ରିମ୍‌ସ୍‌ ଗ୍ରାଉଣ୍ଡ୍‌କୁ ଖେଳିବାକୁ ଯାଇଥିବା ବେଳେ ରାଜଶ୍ରୀ ଯାଇ ନଥିଲେ ।

ହୋଟେଲ୍‌କୁ ଅନ୍ୟ ଖେଳାଳିମାନେ ଫେରିବା ପରେ ରାଜଶ୍ରୀଙ୍କୁ ନପାଇବାରୁ ସବୁରି ମନରେ ସନ୍ଦେହ ବଢ଼ିଥିଲା । ଅନ୍ୟପକ୍ଷରେ ତାଙ୍କ ମୋବାଇଲ୍‌ ବନ୍ଦ ଥିବାରୁ ପରିବାର ଲୋକଙ୍କ ମନରେ ମଧ୍ୟ ଆଶଙ୍କା ବଢ଼ିଥିଲା । ପରିବାର ପକ୍ଷରୁ ତାଙ୍କ ଭଉଣୀ କୋଚ୍‌ଙ୍କୁ ଏ ସମ୍ପର୍କରେ ଜଣାଇଥିଲେ ବୋଲି ସୂଚନା ମିଳିଛି । ଜଣେ ମହିଳା କ୍ରିକେଟିୟର ଓସିଏର ପ୍ରଶିକ୍ଷଣ ଖେଳାଳି ଚୟନ କ୍ୟାମ୍ପକୁ ଆସି ନିଖୋଜ ହେବା ଘଟଣା ଓସିଏ କର୍ମକର୍ତ୍ତାଙ୍କ ଆଖିରୁ ନିଦ ହଜେଇ ଦେଇଛି । ଆଶଙ୍କା ବଢ଼ିବାରୁ ଶେଷରେ କୋଚ୍‌ ମଙ୍ଗଳାବାଗ ଥାନାରେ ଏତଲା ଦେଇଛନ୍ତି ।

ଅନ୍ୟପକ୍ଷରେ ରାଜଶ୍ରୀଙ୍କ ଗାଡ଼ି ଏବଂ ହେଲ୍‌ମେଟ୍‌ ଜଙ୍ଗଲରୁ ମିଳିବା ଘଟଣା ସନ୍ଦେହ ସୃଷ୍ଟି କରିଛି । ରାଜଶ୍ରୀଙ୍କ ଘର ପୁରୀ ଜିଲ୍ଲା ରାମଚଣ୍ଡୀ ଅଞ୍ଚଳରେ ହୋଇଥିବା ବେଳେ ସେ ଆଠଗଡ଼ ବନଖଣ୍ଡ ଅଞ୍ଚଳର ଏକ ଜଙ୍ଗଲିଆ ଅଞ୍ଚଳରେ କାହିଁକି ଏବଂ କିପରି ଆସି ପହଞ୍ଚିଲେ ତାହାକୁ ନେଇ ଏବେ ଚର୍ଚ୍ଚା ଲାଗି ରହିଛି । କିଛି ସହଯୋଗୀଙ୍କ କହିବା କଥା, ୧୬ ଜଣିଆ ଟିମ୍‌ରୁ ବାଦ୍‌ ପଡ଼ିବା ପରେ ରାଜଶ୍ରୀ ଘୋର ବିଷାଦ, ଚାପ ଓ ମନସ୍ତାପ ଭିତରେ ଥିଲେ । ଏହି ଖବର ତାଙ୍କୁ ବ୍ୟଥିତ କରିଥିଲା, ଭାଙ୍ଗି ଦେଇଥିଲା ।

ଅପରପକ୍ଷେ ହୋଟେଲ ଛାଡିବା ପୂର୍ବରୁ ରାଜଶ୍ରୀ ତାଙ୍କର ଜଣେ ସାଥୀ ଖେଳାଳିଙ୍କୁ ବାପାଙ୍କ ଦେହ ଖରାପ ଅଛି, ତେଣୁ ଘରକୁ ଯାଉଛି କହିଥିଲେ ବୋଲି ଶୁଣିବାକୁ ମିଳୁଛି । ମାତ୍ର ସେ ଘରକୁ ଯାଇ ନଥିବା ପରିବାର ଲୋକଙ୍କଠାରୁ ପୁଲିସ ସୂଚନା ପାଇଛି । ନିଖୋଜ ରାଜଶ୍ରୀଙ୍କ କଳା ରଙ୍ଗର ହୋଣ୍ଡା ଆକ୍ଟିଭା ଗାଡ଼ିକୁ କପୁରସିଂ ବ୍ରାହ୍ମଣବସ୍ତ ତାଳଧଣ୍ଡି ରାସ୍ତାର ଜଙ୍ଗଲରୁ ଧବଳେଶ୍ୱର ଫାଣ୍ଡି ପୁଲିସ୍‌ ଜବତ କରିଛି । ଏହି ଗାଡ଼ିଟି ଗତକାଲି ରାତିରୁ ଆଜି ରାତି ପର୍ଯ୍ୟନ୍ତ ଥୁଆ ହୋଇଥିଲା । ବନ ବିଭାଗର ଜଣେ ଫରେଷ୍ଟ ଗାର୍ଡ ଗାଡ଼ିଟିକୁ ଗତକାଲି ପ୍ରଥମେ ଦେଖିଥିଲେ ।

ରାଜଶ୍ରୀଙ୍କର କିଛି ସାଥୀ ଖେଳାଳି ଗାଡ଼ି ମିଳିଥିବା ସମ୍ପର୍କରେ ଖବର ପାଇ ଉକ୍ତ ଜାଗାକୁ ଖୋଜାଖୋଜି କରି ଆସିଥିବା ମଧ୍ୟ ଖବର ମିଳିଛି । ଅନ୍ୟପକ୍ଷରେ ଆଜି ରାତି ହୋଇଯିବାରୁ ପୁଲିସ୍‌ ପକ୍ଷରୁ ଗାଡ଼ି ମିଳିଥିବା ଜଙ୍ଗଲ ଏବଂ ଏହାର ଆଖପାଖ ଅଞ୍ଚଳରେ ହାତୀ ଭୟରେ ବେଶୀ ଖୋଜାଖୋଜି କରାଯାଇପାରି ନାହିଁ । ପୁଲିସ ଟିମ୍‌ ଫେରି ଆସିଥିବା ସୂଚନା ମିଳିଛି ।

   Related Posts