ନୂଆଦିଲ୍ଲୀ: କରୋନାର ଦୈନିକ ସଂକ୍ରମଣରେ ଲାଗୁନି ବ୍ରେକ୍ । ୨୪ ଘଣ୍ଟାରେ ୧୦ ହଜାର ନୂଆ କେସ୍ ସମ୍ନାକୁ ଆସିଛି । ଶନିବାର ୧୨, ୧୯୩ ସଂକ୍ରମିତ ଚିହ୍ନଟ ହୋଇଥିବା ବେଳେ ରବିବାର ସାମନ୍ୟ ହ୍ରାସ ପାଇଛି । ଗୋଟିଏ ଦିନରେ ୧୦, ୧୧୨ ନୂଆ ସଂକ୍ରମିତ ଚିହ୍ନଟ କରାଯାଇଛି । ଦେଶରେ ବର୍ତ୍ତମାନ ସୁଧା କୋଭିଡ୍ ସକ୍ରିୟ ମାମଲା ୬୭, ୮୦୬ ରହିଛି । ସେହିପରି ୯, ୮୩୩ଜଣ ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି ।   

ପିଟିଆଇ ରିପୋର୍ଟ ଅନୁଯାୟୀ, କେବଳ ରାଜଧାନୀ ଦିଲ୍ଲୀରେ ଶନିବାର ୧,୫୧୫ ନୂଆ କେସ୍ ଚିହ୍ନଟ ହୋଇଥିଲା ଏବଂ ୬ଜଣଙ୍କ ମୃତ୍ୟୁ ହୋଇଥିଲା । ତେବେ ଦେଶର ରାଜଧାନୀରେ କରୋନା ପିଜିଟିଭିଟି ରେଟକୁ ସ୍ବାସ୍ଥ୍ୟ ବିଭାଗକୁ ଚିନ୍ତା ଘାରିଛି । ସଂକ୍ରମଣ ମାମଲାରେ ୨୬ ପ୍ରତିଶତରେ ପହଞ୍ଚିଛି । ଅନ୍ୟପଟେ ମହାରାଷ୍ଟ୍ରରେ ୮୫୦ ନୂଆ କୋଭିଡ୍  ମାମଲା ସାମ୍ନାକୁ ଆସିଥିବା ବେଳେ 4ଜଣଙ୍କ ମୃତ୍ୟୁ ହୋଇଛି ।

କେନ୍ଦ୍ର ସ୍ବାସ୍ଥ୍ୟମନ୍ତ୍ରଳାୟ ଦ୍ବାରା ରବିବାର ସକାଳୁ ଜାରି ହୋଇଥିବା ରିପୋର୍ଟ ଅନୁଯାୟୀ, ୨୪ ଘଣ୍ଟାରେ ପୂରା ଦେଶରେ ୨୯ଜଣଙ୍କ ମୃତ୍ୟୁ ହୋଇଛି । କେରଳରେ ସର୍ବାଧିକ ୭ଜଣ ପ୍ରାଣ ହରାଇଛନ୍ତି । ଏହାକୁ ମିଶାଇ ମୋଟ୍ ମୃତ୍ୟୁ ସଂଖ୍ୟା ୫, ୩୧, ୩୨୯ରେ ପହଞ୍ଚିଛି । ସେହିପରି ୪, ୪୨, ୯୨, ୮୫୦ ସଂକ୍ରମିତ ସୁସ୍ଥ ହୋଇ ଘରକୁ ଫେରିଛନ୍ତି ।