ଚଣ୍ଡିଗଡ଼: ଖଲିସ୍ତାନୀ ସମର୍ଥକ ଅମୃତପାଲ ସିଂହ ମାମଲାରେ ଚଣ୍ଡିଗଡ଼ ହାଇକୋର୍ଟ ପଞ୍ଜାବ ପୋଲିସ ଉପରେ ଅସନ୍ତୋଷ ପ୍ରକାଶ କରିଛନ୍ତି । ମାମଲାର ଶୁଣାଣି ବେଳେ ୮୦ ହଜାର ପୋଲିସ କ’ଣ କରୁଥିଲେ ବୋଲି ପ୍ରଶ୍ନ କରିଥିଲେ ହାଇକୋର୍ଟ । ଏହା ସହିତ ଆତଙ୍କୀ ଅମୃତପାଲ ସିଂହକୁ ଗିରଫ କରିବା ନେଇ ରାଜ୍ୟ ପୋଲିସ ଆରମ୍ଭ କରିଥିବା ଅପରେସନ ଷ୍ଟାଟସ୍ ରିପୋର୍ଟ କୋର୍ଟ ଉପସ୍ଥାପନ କରିବାକୁ କହିଛନ୍ତି ।
ମଙ୍ଗଳବାର ଅମୃତପାଲ ସିଂହ ମାମଲା ପଞ୍ଜାବ-ହରିୟାଣା କୋର୍ଟରେ ଶୁଣାଣି ହୋଇଥିଲା । ଏହି ସମୟରେ ଅମୃତପାଲ ପୋଲିସକୁ କିପରି ଚକମା ଦେଲା ବୋଲି ଖଣ୍ଡପୀଠ ପ୍ରଶ୍ନ କରିଥିଲେ । ରାଜ୍ୟ ସରକାରଙ୍କ ଗୁଇନ୍ଦା ବିଭାଗ କିପର ଫେଲ୍ ମାରିଲା । ୮୦ ହଜାର ପୋଲିସ କର୍ମଚାରୀ କ’ଣ କରୁଥିଲେ ପଞ୍ଜାବ ସରକାରଙ୍କୁ ପ୍ରଶ୍ନ କରି ଅସନ୍ତୋଷ ଝାଡ଼ିଛନ୍ତି ।
ହାଇକୋର୍ଟ ଖଲିସ୍ତାନ ସମର୍ଥକ ଓ ‘ବାରିସ୍ ପଞ୍ଜାବ ଦେ’ ସଂଗଠନ ବିରୋଧରେ ପଞ୍ଜାବ ପୋଲିସ କ’ଣ ଆକ୍ସନ ନେଇଛି ପଚାରି ବୁଝିଥିଲେ । ସେପଟେ ପୋଲିସ ମଧ୍ୟ କୋର୍ଟରେ ତଥ୍ୟ ଉପସ୍ଥାପନା କରିଛି । ଅମୃତପାଲ ସିଂହକୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ପୋଲିସ ଚଢ଼ାଉ ଜାରି ରଖିଛି । ଗତ ଶନିବାର ସୁଧା ୧୨୦ ସମର୍ଥକଙ୍କୁ ଗିରଫ କରାଯାଇଛି ବୋଲି ପୋଲିସ କର୍ତ୍ତୃପକ୍ଷ କହିଛନ୍ତି । ଅମୃତପାଲ ଶେଷଥର ପାଇଁ ଶନିବାର ଜଳନ୍ଧର ଜିଲ୍ଲାର ଜଳନ୍ଧର ସହରରେ ଏକ ବାଇକରେ ଯାଇଥିବାର ଦେଖିବାକୁ ପାଇଥିଲା ।
ଆଇଏସଆଇ ସମ୍ପର୍କ ଆସିବା ପରେ ଆତଙ୍କୀ ଅମୃତପାଲ ସିଂହ ପଞ୍ଜାବରେ ସକ୍ରିୟ ଥିଲା । ମାରଣାସ୍ତ୍ର କାରବାରରେ ମଧ୍ୟ ଲିପ୍ତ ଥିଲା । ଖଲିସ୍ତାନୀ ବିଚ୍ଛିନ୍ନବାଦୀ ଭିନ୍ଦରଓ୍ବାଲା ୨.୦ର ସମର୍ଥକ ଥିଲା ଅମୃତପାଲ ସିଂହ । ସେହିପରି ଅମୃତପାଲ ସିଂହକୁ ନେଇ ପ୍ରଦର୍ଶନ କରୁଥିବା ଲୋକଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପଞ୍ଜାବ ମୁଖ୍ୟମନ୍ତ୍ରୀ ଭଗବତ ମାନ କହିଛନ୍ତି ।
