ବାଲି ଉପରେ ପଡିଛି ପିଚୁ ।ଗାଡିମଟର ତ ଦୂରର କଥା ହାତ ମାରିଦେଲେ ଫଡା ଫଡା ପିଚୁ ଉଠିଯାଉଛି । ଏ ଦୃଶ୍ୟ କେନ୍ଦୁଝର ଘସିପୁରା ବ୍ଲକ ଗୋହିରା ଠାରୁ ଯୁଗଳ କିଶୋରପୁର ରାସ୍ତାର । ଆନନ୍ଦପୁର ଗ୍ରାମ୍ୟ ଉନ୍ନୟନ ବିଭାଗ ଅଧିନରେ ଆସୁଥିବା ଏହି ରାସ୍ତା କାମ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ ଚାଲିଛି । ୫ କିଲୋମିଟର ରାସ୍ତା ପାଇଁ ୨ କୋଟି ୨୫ ଲକ୍ଷ ଟଙ୍କା ବ୍ୟୟ ଅଟକଳ ହୋଇଛି । କିନ୍ତୂ ମେଟାଲ ନପକାଇ କେବଳ ମାଟି ଉପରେ ପିଚୁ ଢାଳି କାମ ସାରିଦେଇଛନ୍ତି ଠିକାଦାର । ହେଲେ ତଦାରଖ କଥା ଛାଡନ୍ତୁ ରାସ୍ତା କାମ ଚାଲିଥିବା ବେଳେ ବିଭାଗୀୟ ବାବୁମାନେ ଦେଖା ଦେଉନାହାନ୍ତି । ଗୋହିରା ଠାରୁ ଯୁଗଳ କିଶୋର ମଧ୍ୟରେ ଆନେକ ଆଦିବାସୀ ଗାଁ ରହିଛି । ଏହି ଅଞ୍ଚଳକୁ ରାସ୍ତା ମୁଖ୍ୟ ସମସ୍ୟା ଥିଲା । ରାସ୍ତା କାମ ହେଉଥିବା ଶୁଣି ଲୋକେ ଖୁସି ହୋଇଯାଇଥିଲେ । ହେଲେ ଠିକାଦାରଙ୍କ ମର୍ଜିରେ କାମ ଚାଲିଥିବା ନେଇ ସ୍ଥାନୀୟ ଲୋକଙ୍କ ମଧ୍ୟରେ ବଢୁଛି ଅସନ୍ତୋଷ । ଗ୍ରାମ୍ୟ ଉନ୍ନୟନ ବିଭାଗର ସହକାରୀ ଯନ୍ତ୍ରୀ କିନ୍ତୁ କହୁଛନ୍ତି ସବୁ ଠିକଠାକ ଚାଲିଛି । ଆଦିବାସୀ ଅଞ୍ଚଳକୁ ଯୋଗାଯୋଗ ପାଇଁ ପାଣି ପରି ଟଙ୍କା ଖର୍ଚ୍ଚ ଚାଲିଛି । ହେଲେ ଯେନତେନ କାମ କରି ଠିକାଦାର ମାଳାମାଲ ହେଉଥିବା ବେଳେ ପିସି ପାଇ ସରକାରୀ ବାବୁ ପାଟି ଚୁପ୍ କରିଦେଇଛନ୍ତି ।