ବ୍ରହ୍ମପୁର ୧୪।୩: ସାରା ବିଶ୍ବକୁ ଏବେ କୋରନା ଭୟ ଘାରିଛି । କୋରନାକୁ ନେଇ ସବୁଠି ଆତଙ୍କ। ଭାରତରେ ଏପର୍ଯ୍ୟନ୍ତ ୮୫ ଲୋକ କରୋନାରେ ସଂକ୍ରମିତ ହୋଇଥିବା ବେଳେ ଦୁଇ ଜଣଙ୍କର ମୃତ୍ୟୁ ହୋଇସାରିଲାଣି ।
ଏଭଳି ସ୍ଥିତିରେ ଗଞ୍ଜାମ ଜିଲ୍ଲାର ଜଣେ ଦାଦନ ଶ୍ରମିକ କେରଳରୁ ଫେରିଥିବା ବେଳେ ନିଜ ଗାଁକୁ ଯାଇପାରୁନାହାନ୍ତି । ବ୍ରହ୍ମପୁର ଏମକେସିଜି ମେଡିକାଲରେ ଅଟକି ରହିଛନ୍ତି । ଶୁକ୍ରବାରଠାରୁ ସେ ମେଡିକାଲରେ ଅଟକିଥିବା ଜଣାପଡିଛି ।
କେରଳରୁ ଫେରିବା ପରେ ଦାଦାନ ଶ୍ରମିକ ଜଣଙ୍କ ଅସୁସ୍ଥତା ଅନୁଭବ କରିଥିଲେ । ଫଳରେ ତାଙ୍କୁ ବ୍ରହ୍ମପୁର ଏମକେସିଜିରେ ଚିକିତ୍ସା କରାଯାଇଥିଲା । ତେବେ ତାଙ୍କୁ ଜ୍ବର ହୋଇଥିବା ଯୋଗୁଁ କାଳେ ସେ କୋରନା ସଂକ୍ରମିତ ହୋଇଥିବେ ସନ୍ଦେହ କରି ବ୍ରହ୍ମପୁର ବଡ ମେଡିକାଲରେ ଡାକ୍ତରମାନେ ତାଙ୍କ ଚିକିତ୍ସା ଜାରି ରଖିଛନ୍ତି ।
ସଂପୃକ୍ତ ଦାଦନ ଶ୍ରମିକଙ୍କ ଘର ଗଞ୍ଜାମ ଜିଲ୍ଲା ସୋରଡା ବ୍ଲକ୍ ଅଞ୍ଚଳରେ ବୋଲି ଜଣାପଡିଛି । ଏ ସଂପର୍କରେ ଗାଁକୁ ଜଣାଇବା ପରେ ଗ୍ରାମବାସୀମାନେ ଚିକିତ୍ସା ପରେ ଗାଁକୁ ଆସିବାକୁ କହିଥିବା ସଂପୃକ୍ତ ଶ୍ରମିକ ଜଣଙ୍କ କହିଛନ୍ତି ।
ସୂଚନାଯୋଗ୍ୟ ଯେ, ଶୁକ୍ରବାର କରୋନାକୁ ରାଜ୍ୟ ବିପର୍ଯ୍ୟୟ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କରୋନା ମୁକାବିଲା ପାଇଁ ୨ଶହ କୋଟି ଟଙ୍କାର ପାଣ୍ଠି ମଧ୍ୟ ମଞ୍ଜୁର କରିଛନ୍ତି ରାଜ୍ୟ ସରକାର । ମାର୍ଚ୍ଚ ୩୧ ଯାଏଁ ସବୁ ସ୍କୁଲ ବନ୍ଦ ରଖିବାକୁ ରାଜ୍ୟ ସରକାର ଘୋଷଣା କରିଛନ୍ତି । ସେହିପରି ସିନେମା ହଲ୍, ସୁଇମିଂ ପୁଲ୍, ଜିମ୍ ଆଦି ବନ୍ଦ କରିବାକୁ ମଧ୍ୟ ରାଜ୍ୟ ସରକାର ଘୋଷଣା କରିଛନ୍ତି।