ନୂଆଦିଲ୍ଲୀ୨୬/୨: କରୋନା ସ୍ଥିତି ଦିନକୁ ଦିନ ସାଂଘାତିକ ହେବାକୁ ଯାଉଛି । ଆମେରିକାର ଫେଡେରାଲ ହେଲଥ ଅଫିସିଆଲସ ସତର୍କ କରାଇ ଦେଇଛନ୍ତି। ଏବେ କରୋନା ଚୀନ ବାହାରେ ୟୁରୋପ ଏବଂ ମଧ୍ୟପ୍ରାଚ୍ୟରେ ଭୟ ସୃଷ୍ଟି କଲାଣି । ବର୍ତ୍ତମାନ ସୁଦ୍ଧା ଚୀନରେ ମୃତ୍ୟୁ ସଂଖ୍ୟା ୨୭ଶହ ଟପିଥିବା ବେଳେ ବିଶ୍ବବ୍ୟାପୀ ଆକ୍ରାନ୍ତଙ୍କ ସଂଖ୍ୟା ୮୦ ହଜାର ହେଲାଣି । ଚୀନ ଭିନ୍ନ ଇରାନ, ଇଟଲି , ଫ୍ରାନସ , ଜାପାନ, ଦକ୍ଷିଣ କୋରିଆରେ ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି। ଆଜି ଜାପାନ, ଫ୍ରାନସରେ ଜଣେ ଲେଖାଏଁ କରୋନାରେ ପ୍ରାଣ ହରାଇଛନ୍ତି।ଜାପାନରେ ଏଯାଏଁ କରୋନାରେ ଆକ୍ରାନ୍ତ ହୋଇ ୩ ଜଣ ପ୍ରାଣ ହରାଇଲେଣି ।
ଆମେରିକାରେ ଏପର୍ଯ୍ୟନ୍ତ ୫୭ ଜଣ ଏଥିରେ ଆକ୍ରାନ୍ତ ହୋଇଥିବାରୁ ସେଠାରେ କରୋନାକୁ ନେଇ ଜରୁରୀ ସ୍ଥିତି ଘୋଷଣା କରାଯାଇଛି । ବିଶ୍ବର ୭୦ ପ୍ରତିଶତ ଭାଗକୁ କରୋନା ବ୍ୟାପିଯିବ ବୋଲି କିଛି ବିଶେଷଜ୍ଞ ଆଶଙ୍କା ପ୍ରକାଶ କରିଛନ୍ତି । ଏଥିସହିତ ଏହି ରୋଗର ଏପର୍ଯ୍ୟନ୍ତ କୌଣସି ଟୀକା ଉଦଭାବନ ହୋଇନାହିଁ।
