ଚାନ୍ଦବାଲି ୧।୩: ଭଦ୍ରକରେ ନାଗସାପଙ୍କ ସଂଖ୍ୟା ବଢିବାରେ ଲାଗିଛି । ବିଶେଷ କରି ବୈତରଣୀ ନଦୀ ସଂଲଗ୍ନ ଚାନ୍ଦବାଲି, ବାସୁଦେବପୁର, ତିହିଡିରେ ଅଧିକ ସଂଖ୍ୟାରେ ଦେଖିବାକୁ ମିଳୁଛି । ସମୁଦ୍ର ଉପକୂଳବର୍ତ୍ତୀ ଅଞ୍ଚଳ ଓ ବନ୍ୟା ବାତ୍ୟା ଯୋଗୁ ପାହାଡରୁ ସାପମାନେ ବନ୍ୟା ପାଣିରେ ଭାସିଆସୁଛନ୍ତି ।
ସେହିପରି ମାଟିର ଆଦ୍ରତା ସାପମାନଙ୍କ ବଂଶବୃଦ୍ଧି ପାଇଁ ଅନୁକୂଳ ପରିବେଶ ସୃଷ୍ଟି କରୁଥିବା ବନବିଭାଗ ଓ ପରିବେଶ କହିଛନ୍ତି । ଗତ ୩ ବର୍ଷରେ ଜିଲ୍ଲାର ୬ଟି ବ୍ଲକରୁ ୨ ହଜାରରୁ ଅଧିକ ସାପ ଉଦ୍ଧାର କରାଯାଇଛି । ସାପ ଦଂଶନରେ ୧୧୨ ଜଣ ଲୋକ ଓ ୪୪ ପ୍ରାଣୀଙ୍କ ମୃତ୍ୟୁ ହୋଇଥିବା ସରକାରୀ ସୂଚନା ରହିଛି ।
ବନବିଭାଗ ଅଧୀନରରେ ସ୍ଥାୟୀ ଓ ଦକ୍ଷ ସାପଧରାଳୀ ନଥିବା ଅଭିଯୋଗ ହୋଇଛି । ଉଦ୍ଧାର ସାପଙ୍କୁ ଛୋଟବଡ ଜଙ୍ଗଲରେ ନଛାଡି ଭିତରକନିକା ଅଭୟାରଣ୍ୟ କିମ୍ବା କାଳିଭଡିଆଁ ଜଙ୍ଗଲରେ ସୁରକ୍ଷିତ ଭାବରେ ଛଡାଯିବାକୁ ଦାବି ହୋଇଛି ।