ନୂଆଦିଲ୍ଲୀ, ୧୨/୧୧: ବିଶ୍ୱକପ୍ ପୂର୍ବରୁ ଭାରତୀୟ ଦଳର ମଧ୍ୟକ୍ରମ ବ୍ୟାଟିଂକୁ ଚର୍ଚ୍ଚା ଜୋର ଧରିଥିଲା । ବିଶ୍ବକପ୍ ବେଳେ ମଧ୍ୟକ୍ରମରେ କିଏ ହେବ ଟିମ୍ ଇଣ୍ଡିଆର ସଙ୍କଟମୋଚକ କଳ୍ପନାଜଳ୍ପନା ଲାଗି ରହିଥିଲା ? ବ୍ୟାଟିଂ ସମସ୍ୟାକୁ ନେଇ ଅଧିନାୟକ ରୋହିତ୍ ଶର୍ମା ମଧ୍ୟ ସ୍ବୀକାର କରିଥିଲେ । ମାତ୍ର ଦଳକୁ ଶ୍ରେୟସ ଆୟର ଓ କେଏଲ ରାହୁଲ ଫେରିବା ପରେ ଟିମ୍ ଇଣ୍ଡିଆରେ ମିଡିଲ୍ ଅର୍ଡର ବ୍ୟାଟିଂ ସମସ୍ୟା ଦୂର ହୋଇଛି ।
ଆୟର ଓ ରାହୁଲ ଦାୟିତ୍ୱପୂର୍ଣ୍ଣ ବ୍ୟାଟିଂ କରି ଦଳକୁ ଚିନ୍ତାମୁକ୍ତ କରିଛନ୍ତି । ଉଭୟ ବଡ଼ ସ୍କୋର କରିବାରେ ସମକ୍ଷ ହୋଇନଥିଲେ ମଧ୍ୟ ମୁଖ୍ୟ କୋଚ୍ ରାହୁଲ ଦ୍ରାବିଡ଼ ଉଭୟଙ୍କ ପ୍ରଦର୍ଶନକୁ ନେଇ ସନ୍ତୁଷ୍ଟ ଥିବା ପ୍ରକାଶ କରିଛନ୍ତି । ଦ୍ରାବିଡ଼ କହିଛନ୍ତି, ମଧ୍ୟକ୍ରମ ବ୍ୟାଟରଙ୍କ ବ୍ୟକ୍ତିଗତ ସ୍କୋରକୁ ନେଇ ସେମାନଙ୍କ ଦକ୍ଷତା ମାପିବା ଠିକ୍ ନୁହେଁ । ମଧ୍ୟକ୍ରମରେ ସେମାନଙ୍କ ଭାଗିଦାରୀ ଗୁରୁତ୍ୱପୂର୍ଣ୍ଣ । ଏହା ଦଳ ବିଜୟରେ ମୁଖ୍ୟ ଭୂମିକା ଗ୍ରହଣ କରିଥାଏ । ରାହୁଲ, ଆୟର, ସୂର୍ଯ୍ୟକୁମାର ବଡ଼ ସ୍କୋର କରିବାରେ ବିଫଳ ହୋଇଥିଲେ ହେଁ ମଧ୍ୟଭାଗରେ ଉପଯୁକ୍ତ ଭାଗିଦାରୀ ଗଠନ କରି ଆସିଛନ୍ତି । ଦଳ ବିଜୟରେ ପ୍ରତ୍ୟେକ ଖେଳାଳିଙ୍କ ଯୋଗଦାନ ରହିଛି । ତେଣୁ ସେମାନଙ୍କ ବ୍ୟକ୍ତିଗତ ସ୍କୋରକୁ ନେଇ ଚିନ୍ତିତ ହେବାର କୌଣସି ଆବଶ୍ୟକତା ନାହିଁ ।
ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ଅନୁପସ୍ଥିତି ଦଳକୁ ପ୍ରଭାବିତ କରିପାରିନାହିଁ । ଆମେ କ୍ରମାନ୍ୱୟରେ ୮ଟି ମ୍ୟାଚ୍ ଜିତିଛୁ ଏବଂ ନବମ ମ୍ୟାଚ୍ ଜିତିବା ଲକ୍ଷ୍ୟରେ ଅଛୁ । ଲିଗ୍ ପର୍ଯ୍ୟାୟ ମ୍ୟାଚ୍ ଶେଷ ହେବା ପରେ ସେମି ଫାଇନାଲ୍ ପାଇଁ ପ୍ରସ୍ତୁତି କରିବୁ ବୋଲି କୋଚ୍ ରାହୁଲ ଦ୍ରାବିଡ୍ କହିଛନ୍ତି ।