ନୂଆଦିଲ୍ଲୀ: ବିହାର ମୁଖ୍ୟମନ୍ତ୍ରୀ ନୀତୀଶ କମାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଭେଟିଛନ୍ତି । ନୀତୀଶଙ୍କ ସହ ତେଜସ୍ୱୀ ଯାଦବ, ସଂସାଦ ମନୋଜ ଝା, ଲଲନ ସିଂ ଏବଂ ସଞ୍ଜୟ ସିଂ ଉପସ୍ଥିତ ରହିଛନ୍ତି । ନୀତୀଶ କୁମାର ଏହା ପୂର୍ବରୁ ଦିଲ୍ଲୀ ଗସ୍ତ ସମୟରେ ମୁଖ୍ୟମନ୍ତ୍ରୀ କେଜ୍ରିୱାଲଙ୍କ ସହ ସାକ୍ଷାତ କରିଥିଲେ । ସାଧାରଣ ନିର୍ବାଚନ ପୂର୍ବରୁ ବିରୋଧୀ ନେତାଙ୍କୁ ଏକଜୁଟ୍ କରିବା ପ୍ରୟାସରେ ଥିବା ନୀତୀଶ କୁମାର ଶନିବାର କର୍ଣ୍ଣାଟକରେ ସିଦ୍ଦରମୈୟାଙ୍କ ଶପଥ ଗ୍ରହଣ ସମାରୋହରେ ସାମିଲ ହେବା ପରେ ରବିବାର ଦିଲ୍ଲୀ ପହଞ୍ଚିଛନ୍ତି ।

ସୂଚନା ଅନୁସାରେ ନୀତୀଶ କୁମାର କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କୁ ମଧ୍ୟ ଭେଟିପାରନ୍ତି । ନୀତୀଶ କୁମାର ଦ୍ୱିତୀୟ ଥର ପାଇଁ ବିରୋଧୀ ଦଳ ନେତାଙ୍କୁ ଭେଟୁଛନ୍ତି । ନୀତୀଶ କୁମାର ପୂର୍ବରୁ ମଧ୍ୟ ବିରୋଧୀ ନେତାଙ୍କୁ ଗୋଟିଏ ମଞ୍ଚରେ ଏକାଠି ହେବା ପାଇଁ ପରାମର୍ଶ ଦେଇସାରିଛନ୍ତି । ଏପଟେ ଅରବିନ୍ଦ କେଜ୍ରିୱାଲ ଖୁବଶୀଘ୍ର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ କୋଲକାତା ଯାଇ ଭେଟିପାରନ୍ତି ।

ତେବେ ନୀତୀଶ କୁମାର ଏବଂ କେଜ୍ରିୱାଲଙ୍କ ମଧ୍ୟରେ ଗତ ଏକ ମାସରେ ଏହା ଦ୍ୱିତୀୟ ସାକ୍ଷାତ ଅଟେ । ଏହା ପୂର୍ବରୁ ସେ ଏପ୍ରିଲ ୧୨ରେ କେଜ୍ରିୱଲାଙ୍କ ଘରେ ତାଙ୍କୁ ଭେଟିଥିଲେ । ଏହି ସମୟରେ ନୀତୀଶଙ୍କ ଉଦ୍ୟମକୁ କେଜ୍ରିୱାଲ ପ୍ରଶଂସା କରିବା ସହ ପୂର୍ଣ୍ଣ ସମର୍ଥନ ଜଣାଇଥିଲେ ।