ଉତ୍ତରାଖଣ୍ଡରେ ପୁଣି ପ୍ରକୃତି କରାଳ ରୂପ ଦେଖିବାକୁ ମିଳିଛି । ଶୁକ୍ରବାର ସନ୍ଧ୍ୟାରେ ରାଜଧାନୀ ଡେରାଡୁନ ସମେତ ଉତ୍ତରକାଶୀ, ଟିହରି ସମେତ କିଛି ସ୍ଥାନରେ ବାଦଲ ଫଟା ବର୍ଷା ହୋଇଛି । ଏହା ସହ ପ୍ରବଳ ବେଗରେ ପବନ ବହୁଛି । ବର୍ଷା ହେଉଥିବା ସ୍ଥାନରେ ଏନ୍ ଡିଆରଏଫ୍ ନିୟୋଜିତ ଅଛନ୍ତି । ବଦ୍ରିନାଥ ଓ ଗୋବିନ୍ଦା ଘାଟିରେ ଅଟକି ରହିଥିବା ଗାଡ଼ିକୁ ରୁଷିକେଶ ଅଭିମୁଖେ ପଠାଯାଉଛି। ଏହା ଛଡା ବଦ୍ରିନାଥ ଓ ହେମକୁଣ୍ଡ ଯିବାକୁ ଥିବା ଶ୍ରଦ୍ଧାଳୁଙ୍କୁ ଜୋଶିମଠରେ ଅଟକାଇ ଦିଆଯାଇଛି। ତେବେ ଉତ୍ତରାଖଣ୍ଡରେ ଆହୁରି ୨୪ ଘଣ୍ଟା ପ୍ରବଳ ବର୍ଷିବା ସମ୍ଭାବନା ରହିଛି । ଏଥିପାଇଁ ଲୋକଙ୍କୁ ସତର୍କ ରହିବାକୁ ସତର୍କ ସୂଚନା ଜାରି କରିଛି ପାଣିପାଗ ବିଭାଗ । ୨୦୧୩ ଜୁନରେ ବାଦଲ ଫଟା ବର୍ଷା ଯୋଗୁଁ ଭୟଙ୍କର ବନ୍ୟା ସୃଷ୍ଟି ହୋଇଥିଲା । ଏଥିରେ ପ୍ରାୟ ସାଢେ ୪ ହଜାର ଲୋକ ପ୍ରାଣ ହରାଇଥିବା ବେଳେ ବ୍ୟାପକ କ୍ଷୟକ୍ଷତି ହୋଇଥିଲା ।