ନୂଆଦିଲ୍ଲୀ: ବିଶ୍ୱରେ ମିଶ୍ରିତ ସଂକେତ ମଧ୍ୟରେ ଭାରତୀୟ ଘରୋଇ ସେୟାର ବଜାରରେ ବୁଧବାର କମ ଉତ୍ସାହ ଦେଖିବାକୁ ମିଳିଥିଲା । ସପ୍ତାହର ପ୍ରଥମ ଦିନରେ ବୃଦ୍ଧି ଦେଖିଥିବା ସେନସେକ୍ସ ବୁଧବାର ୨୦୮ ଅଙ୍କ ତଳକୁ ଖସି ବନ୍ଦ ହୋଇଛି । ଅନ୍ୟପଟେ ନିଫ୍ଟି ୧୮,୩୦୦ ତଳେ ବନ୍ଦ ରହିଛି । ବୁଧବାର ଫାର୍ମା ସେକ୍ଟରର ସେୟାରରେ ବୃଦ୍ଧି ଦେଖିବାକୁ ମିଳିଥିଲା କିନ୍ତୁ ଫାଇନାନ୍ସ ଏବଂ ମେଟାଲ ସେକ୍ଚରରେ ହ୍ରାସ ଦେଖିବାକୁ ମିଳିଛି ।

ଘରୋଇ ପୁଞ୍ଜି ବଜାରରେ ବୁଧବାର ବୃଦ୍ଧି ଏବଂ ହ୍ରାସ ଦେଖିବାକୁ ମିଳିଥିଲା । ବିଏସଇର ୩୦ ସେୟାର ବିଶିଷ୍ଟ ସୂଚକାଙ୍କ ସେନସେକ୍ସ ୨୦୮.୦୧ ଅଙ୍କ ବା ୦.୩୪ ପ୍ରତିଶତ ହ୍ରାସ ସହ ୬୧,୭୭୩.୭୮ ସ୍ତରରେ ବନ୍ଦ ହୋଇଛି । ସେହିପରି ଏନଏସଇର ୫୦ ସେୟାର ବିଶିଷ୍ଟ ସୂଚକାଙ୍କ ନିଫ୍ଟିରେ ୬୨.୬୦ ବା ୦.୩୪ ପ୍ରତିଶତ ସାମାନ୍ୟ ହ୍ରାସ ସହ ୧୮,୨୨୫.୪୦ ସ୍ତରରେ ବନ୍ଦ ହୋଇଛି । ସେନସେକ୍ସର ୧୨ ସେୟାର ଲାଲ୍ ସଂକେତରେ ବନ୍ଦ ହୋଇଥିବା ବେଳେ ୧୮ ସେୟାରରେ ବୃଦ୍ଧି ଦେଖିବାକୁ ମିଳିଛି ।

ବୁଧବାର ସବୁଠୁ ଅଧିକ ଲାଭ କରିଥିବା ସେୟାର ମଧ୍ୟରେ ସୁଦର୍ଶନ କେମିକଲ୍ସର ସେୟାର ରହିଛି । ଏହି ସେୟାରରେ ୧୧.୮୭ ପ୍ରତିଶତ ବୃଦ୍ଧି ଦେଖିବାକୁ ମିଳିଛି । ରିୟଲ ଇଷ୍ଟେଟ ସେକ୍ଟରରେ ଇଣ୍ଡିଆ ବୁଲ୍ସ ରିୟଲ ଇଷ୍ଟେଟର ସେୟାର ୮.୬୪ ପ୍ରତିଶତ ମଜଭୁତି ସହ ବନ୍ଦ ହୋଇଛି । ସେହିପରି ସନ ଫାର୍ମା, ଇଣ୍ଡସଇଣ୍ଡ ବ୍ୟାଙ୍କ, ଆଇଟିସି, ଟାଇଟନର ସେୟାରରେ ୧ ପ୍ରତିଶତକୁ ଅଧିତ ମଜଭୁତି ଦେଖିବାକୁ ମିଳିଛି ।

ଆଜି ସବୁଠୁ ଅଧିକ କ୍ଷତି ସହିଥିବା ସେୟାରଙ୍କ ସୂଚୀରେ ଆଦାନୀ ଏଣ୍ଟରପ୍ରାଇଜେସର ସେୟାର ରହିଛି । ଗତ ଦୁଇ ଦିନରୁ ଲଗାତାର ନିବେଶକଙ୍କୁ ମାଲାମାଲ କରୁଥିବା ଏହି ସେୟାର ୬ ପ୍ରତିଶତ ତଳକୁ ଖସିଛି । ଅନ୍ୟପଟେ ଟାଟା ମୋଟର୍ସ, ଏଚଡିଏଫସି ବ୍ୟାଙ୍କ, ଆଇସିଆଇସିଆଇ ବ୍ୟାଙ୍କ, ଏଚଡିଏଫସିର ସେୟାର ମୂଲ୍ୟରେ ୨ ପ୍ରତିଶତକୁ କମ ହ୍ରାସ ରେକର୍ଡ କରାଯାଇଛି ।