ନୂଆଦିଲ୍ଲୀ: ଘରୋଇ ପୁଞ୍ଜି ବଜାର ସୋମବାର ହ୍ରାସ ସହ ବନ୍ଦ ହୋଇଛି । ବିଶ୍ୱରେ ବ୍ୟାଙ୍କିଂ ସଂକଟକୁ ନେଇ ଚିନ୍ତା ଏବଂ ବିଶ୍ୱ ବଜାରରେ ନକାରାତ୍ମକ ସଂକେତ ମଧ୍ୟରେ ଆର୍ଥିକ, ସୂଚନା ପ୍ରଯୁକ୍ତି ଏବଂ ପୁଞ୍ଜିଗତ ବସ୍ତୁର ସେୟାରରେ ଅଧିକ ବିକ୍ରି ଯୋଗୁଁ ଏହି ହ୍ରାସ ଦେଖିବାକୁ ମିଳିଛି ।
ବିଏସଇର ୩୦ ସେୟାର ବିଶିଷ୍ଟ ସୂଚକାଙ୍କ ସେନସେକ୍ସ ୩୬୦.୯୫ ଅଙ୍କ ଅର୍ଥାତ୍ ୦.୬୨ ପ୍ରତିଶତ ହ୍ରାସ ସହ ୫୭,୬୨୮.୯୫ ଅଙ୍କରେ ବନ୍ଦ ହୋଇଛି । ସେନସେକ୍ସର ୨୩ ସେୟାର ଆଜି କ୍ଷତିରେ ବନ୍ଦ ହୋଇଛି । ସେହିପରି ନ୍ୟାସନାଲ ଷ୍ଟକ ଏକ୍ସଚେଞ୍ଜର ନିଫ୍ଟି ୧୧୧.୬୫ ଅଙ୍କ ଅର୍ଥାତ୍ ୦.୬୫ ପ୍ରତିଶତ ଖସି ୧୬,୯୮୮.୪୦ ସ୍ତରରେ ବନ୍ଦ ହୋଇଛି । ଏଥିରେ ସାମିଲ ଥିଲା ୫୦ ସେୟାର ମଧ୍ୟରୁ କେବଳ ୧୦ ସେୟାର ଲାଭ ସହ ବନ୍ଦ ହୋଇଛି ।
ବିଏସଇରେ ସୂଚୀବଦ୍ଧ କମ୍ପାନିଗୁଡିକର ମୋଟ ବଜାର ପୁଞ୍ଜି ଆଜି ହ୍ରାସ ହୋଇ ୨୫୫.୫୪ ଲକ୍ଷ କୋଟି ଟଙ୍କାକୁ ଖସି ଆସିଛି । ପୂର୍ବ କାରବାର ଦିନରେ ଏହା ୨୫୭.୫୨ ଲକ୍ଷ କୋଟି ଟଙ୍କା ରହିଥିଲା । ଏହିପରି ବିଏସଇରେ ଲିଷ୍ଟେଡ୍ କମ୍ପାନିଗୁଡିକ ମାର୍କେଟ୍ କ୍ୟାପ ଆଜି ପ୍ରାୟ ୧.୯୮ ଲକ୍ଷ କୋଟି ଟଙ୍କା କମିଛି । ସରଳ ଶବ୍ଦରେ କହିବାକୁ ଗଲେ ନିବେଶକଙ୍କୁ ଆଜି ପ୍ରାୟ ୧.୯୮ ଲକ୍ଷ କୋଟି ଟଙ୍କ କ୍ଷତି ହୋଇଛି ।
ବିଶେଷଜ୍ଞଙ୍କ କହିବା ଅନୁସାରେ ଆମେରିକାର ବ୍ୟାଙ୍କିଂ ସଂକଟକୁ ନେଇ ନିବେଶକ ଚିନ୍ତାରେ ଅଛନ୍ତି । ତେବେ ଫେଡରଲ ରିଜର୍ଭ ଏବଂ ଅନ୍ୟ କେନ୍ଦ୍ରୀୟ ବ୍ୟାଙ୍କଗୁଡିକ ବ୍ୟାଙ୍କିଂ ସଂକଟକୁ ଦୂର କରିବା ପାଇଁ ପଦକ୍ଷେପ ଗ୍ରହଣ କରୁଛନ୍ତି ।
ଏସିଆର ଅନ୍ୟ ବଜାର ମଧ୍ୟରେ ହଂକଂର ହେଂସେଂ, ଜାପାନର ନିକ୍କି, ଚୀନର ସଂଘାଇ ସମ୍ପୋଜିଟ୍ ଏବଂ ଦକ୍ଷିଣ କୋରିଆର କାସ୍ପି କାରବାର ଶେଷରେ ହ୍ରାସ ସହ ବନ୍ଦ ହୋଇଛି ।
