ନୂଆଦିଲ୍ଲୀ: ସେୟାର ବଜାରରେ ଲଗାତାର ପାଞ୍ଚ ଦିନ ଧରି ଚାଲିଥିବା ହ୍ରାସରେ ଗୁରୁବାର ପରିବର୍ତ୍ତନ ଦେଖାଯାଇଛି । ନିମ୍ନମୁଖୀ ଥିବା ସେୟାର ବଜାରରେ ଆଜି ସାମାନ୍ୟ ଉତ୍ସାହ ଦେଖିବାକୁ ମିଳିଥିଲା । ଦୁଇ ପ୍ରମୁଖ ସୂଚକାଙ୍କ ସବୁଜ ସଂକେତର ବନ୍ଦ ହୋଇଛି । ସେନସେକ୍ସ ୭୯ ଅଙ୍କ ବଢି ବନ୍ଦ ହୋଇଛି । ସେହିପରି ନିଫ୍ଟି ପୁଣି ଥରେ ୧୭,୦୦୦ ସ୍ତର ପାର କରିଛି । ଏଥିପାଇଁ ସେୟାର ବଜାରରେ ଆଜି ନିବେଶକଙ୍କୁ ପ୍ରାୟ ୫୦,୦୦୦ କୋଟି ଟଙ୍କା ଲାଭ ହୋଇଛି ।
ଆଜି କାରବାର ସମୟରେ ଏଫଏମସିଜି, ୟୁଟିଲିଟି ପାୱର, ଅଏଲ ଆଣ୍ଡ ଗ୍ୟାସ ସହ ରିୟଲ୍ଟିର ସେୟାରରେ ବୃଦ୍ଧି ଦେଖିବାକୁ ମିଳିଛି । ଆଇଟି, ମେଟାଲ ଏବଂ ଟେକ୍ କମ୍ପାନିଗୁଡିକର ସେୟାରରେ ବିକ୍ରି ଜାରି ରହିଛି । ବୃହତ ବଜାରରେ ମିଶ୍ରିତ ସଂକେତ ଦେଖିବାକୁ ମିଳିଛି । ସେହିପରି ବିଏସଇର ମିଡକ୍ୟାପରେ କୌଣସି ପରିବର୍ତ୍ତନ ଦେଖାଯାଇ ନଥିବା ବେଳେ ସ୍ମଲକ୍ୟାପ ଇଣ୍ଡେକ୍ସରେ ୦.୬୯ ପ୍ରତିଶତର ହ୍ରାସ ଦେଖିବାକୁ ମିଳିଛି ।
କାରବାର ଶେଷରେ ବିଏସଇର ୩୦ ସେୟାର ବିଶିଷ୍ଟ ସୂଚକାଙ୍କ ସେନସେକ୍ସ ୭୮.୯୪ ଅଙ୍କ ଅର୍ଥାତ୍ ୦.୧୪ ପ୍ରତିଶତ ବୃଦ୍ଧି ସହ ୫୭,୬୩୪.୮୪ ଅଙ୍କରେ ବନ୍ଦ ହୋଇଛି । ଅନ୍ୟପଟେ ନିଫ୍ଟି ୩୭.୩୫ ଅଙ୍କ ଅର୍ଥାତ୍ ୦.୨୨ ପ୍ରତିଶତ ବଢି ୧୭,୦୦୯.୫୦ ସ୍ତରରେ ବନ୍ଦ ହୋଇଛି ।
ବିଏସଇରେ ସୂଚୀବଦ୍ଧ କମ୍ପାନିଗୁଡିକର ମୋଟ ବଜାର ପୁଞ୍ଜି ମାର୍ଚ୍ଚ ୧୬ରେ ବଢି ୨୫୬.୪୦ ଲକ୍ଷ କୋଟି ଟଙ୍କା ହୋଇଛି । ଗୋଟିଏ ଦିନ ପୂର୍ବେ ବୁଧବାର ଏହା ୨୫୫.୯୦ ଲକ୍ଷ କୋଟି ଟଙ୍କା ରହିଥିଲା । ଏହିପରି ବିଏସଇରେ ସୂଚୀବଦ୍ଧ କମ୍ପାନଗୁଡିକୁ ୫୦ ହଜାର କୋଟି ଟଙ୍କା ଲାଭ ହୋଇଛି ।
