ନୂଆଦିଲ୍ଲୀ: ୱାନ୍ ରାଙ୍କ ୱାନ୍ ପେନସନ୍ ଉପରେ ସୁପ୍ରିମକୋର୍ଟ ସୋମବାର କେନ୍ଦ୍ର ସରକାରଙ୍କୁ ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି । କେନ୍ଦ୍ର ସରକାରଙ୍କ ପକ୍ଷରୁ ବନ୍ଦ ଲଫାପାରେ ଦିଆଯାଇଥିବା ରିପୋର୍ଟ ଉପରେ ସୁପ୍ରିମକୋର୍ଟ ଅସନ୍ତୋଷ ପ୍ରକାଶ କରି ପୂର୍ବତନ ସୈନିକଙ୍କୁ ବକେୟା ପେନସନ ପୈଠ କରିବାର ନୂଆ ଫର୍ମୂଲା ଦେଇଛନ୍ତି । ପେନସନର୍ସଙ୍କ ସମସ୍ତ ବକେୟାକୁ ୨୦୨୪ ଫେବ୍ରୁଆରୀ ସୁଦ୍ଧା ପୈଠ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି ।

ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ କେନ୍ଦ୍ରକୁ ୨୦୨୩ ଏପ୍ରିଲ ୩୦ ସୁଦ୍ଧା ୱାନ ରାଙ୍କ ୱାନ ପେସନ ଯୋଜନା ଅଧିନରେ ଯୋଗ୍ୟ ପେନସନର୍ସ ଏବଂ ସଶସ୍ତ୍ର ବଳର ବୀରତା ପୁରସ୍କାର ବିଜେତାଙ୍କୁ ବକେୟା ରାଶି ପୈଠ କରିବା ପାଇଁ କୁହାଯାଇଛି । ଏହାସହ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ଯେ ୨୦୨୩ ଜୁନ ୩୦ ସୁଦ୍ଧା ୭୦ ବର୍ଷ ବୟସରୁ ଅଧିକ ଯୋଗ୍ୟ ପେନସନର୍ସଙ୍କୁ ବକେୟା ଦିଆଯିବା ଦରକାର । ଅନ୍ୟ ପେନସନର୍ସଙ୍କୁ ୨୦୨୩ ଅଗଷ୍ଟ ୩୦, ନଭେମ୍ୱର ୩୦ ଏବଂ ୨୦୨୪ ଫେବ୍ରୁଆରୀ ୨୮ ସୁଦ୍ଧା ସମାନ କିସ୍ତିରେ କିମ୍ୱା ଏହା ପୂର୍ବରୁ ବକେୟା ରାଶି ପୈଠ ପାଇଁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ।

OROP ଉପରେ କେନ୍ଦ୍ରକୁ ସୁପ୍ରିମକୋର୍ଟଙ୍କ ଦେଇଥିବା ନିର୍ଦ୍ଦେଶ

1. ୬ ଲକ୍ଷ ଫ୍ୟାମିଲି ଫେନସନ+ ବୀରତା ପୁରସ୍କାର ବିଜେତା ପେନସନର୍ସଙ୍କୁ ୨୦୨୩ ଏପ୍ରିଲ ୩୦ ସୁଦ୍ଧା ବକେୟା ପୈଠ କରାଯାଉ ।
2. ୭୦ ବର୍ଷରୁ ଅଧିକ ବୟସର ୪ ଲକ୍ଷ ଲୋକଙ୍କୁ ୨୦୨୩ ଜୁନ ୩୦ ସୁଦ୍ଧା ବକେୟା ରାଶି ପୈଠ କରାଯାଉ ।
3. ଅନ୍ୟ ୧୧ ଲକ୍ଷ ଲାଭାର୍ଥୀଙ୍କୁ ତିନୋଟି ସମାନ କିସ୍ତିରେ ୨୦୨୩ ଅଗଷ୍ଟ ୩୦, ନଭେମ୍ୱର ୩୦ ଏବଂ ୨୦୨୪ ଫେବ୍ରୁଆରୀ ୨୮ ସୁଦ୍ଧା ବକେୟା ପୈଠ କରାଯାଉ ।

ପୂର୍ବତନ ସେନା କର୍ମଚାରୀଙ୍କୁ ୱାନ୍ ରାଙ୍କ ୱାନ୍ ପେନସନର ବକେୟା ରାଶି ପୈଠ ଉପରେ କେନ୍ଦ୍ର ଦ୍ୱାରା ଦାଖଲ ସିଲ ବନ୍ଦ ଲଫାପାକୁ ସ୍ୱୀକାର କରିବାକୁ ସୁପ୍ରିମକୋର୍ଟ ମନା କରିଥିଲେ । ପ୍ରଧାନ ବିଚାରପତି ଡି.ୱାଇ ଚନ୍ଦ୍ରଚୂଡ ଏବଂ ଜଷ୍ଟିସ୍ ପିଏସ ନରସିମ୍‌ହା ଏବଂ ଜେ.ବି ପାରଦୀୱାଲାଙ୍କ ଖଣ୍ଡପୀଠ କହିଛନ୍ତି ଯେ ସର୍ବୋଚ୍ଚ ଅଦାଲତରେ ଏହି ସିଲ୍ ବନ୍ଦ ପ୍ରଥାକୁ ଶେଷ କରିବାର ଆବଶ୍ୟକତା ରହିଛି । ଏହା ନିରପେକ୍ଷ ନ୍ୟାୟର ମୂଳ ପ୍ରକ୍ରିୟାର ବିପରୀତ ଅଟେ ।