ଚଣ୍ଡିଗଡ଼ ୦୭ ।୬(ଏଜେନ୍ସି): ବିଜେପି ନେତ୍ରୀ ତଥା ଅଭିନେତ୍ରୀ କଙ୍ଗନା ରାଣାୱତ୍ଙ୍କୁ ଗୁରୁବାର ଚଣ୍ଡିଗଡ଼ ବିମାନବନ୍ଦରରେ ମୁତୟନ ସିଆଇଏସଏଫ୍ର ଜଣେ ମହିଳା କନ୍ଷ୍ଟେବଳ ଚାପୁଡ଼ା ମାରିଛନ୍ତି । ଘଟଣା ପରେ ତାଙ୍କୁ ଚାକିରିରୁ ନିଲମ୍ବନ କରାଯାଇଥିବାବେଳେ ସେ ଗିରଫ ମଧ୍ୟ ହୋଇଛନ୍ତି । ଅପରାହ୍ନ ପ୍ରାୟ ୩.୩୦ରେ ଏହି ଘଟଣା ଘଟିଥିଲା ।
କଙ୍ଗନା ଭିସ୍ତାରା ଏୟାରଲାଇନ୍ସର ଏକ ବିମାନ ଯୋଗେ ଚଣ୍ଡିଗଡ଼ରୁ ଦିଲ୍ଲୀ ଅଭିମୁଖେ ବାହାରିଥିଲେ । ତେବେ ସୁରକ୍ଷା ଯାଞ୍ଚ ସମୟରେ ମହିଳା କନ୍ଷ୍ଟେବଳ କୁଲୱିନ୍ଦର କୌରଙ୍କ ସହିତ ତାଙ୍କର ଯୁକ୍ତିତର୍କ ହୋଇଥିଲା । ଏହାପରେ କୌର ତାଙ୍କୁ ଚାପୁଡ଼ା ମାରିବା ସହିତ ଗାଳି ଦେଇଥିବା କଙ୍ଗନା ସୋସିଆଲ ମିଡିଆରେ ପୋଷ୍ଟ କରିଥିଲେ । ପରବର୍ତ୍ତୀ ସମୟରେ ଏଥିନେଇ ଆନୁଷ୍ଠାନିକ ଭାବେ ଅଭିଯୋଗ ମଧ୍ୟ କରିଥିଲେ ସେ । ସେପଟେ କଙ୍ଗନାଙ୍କୁ ଚାପୁଡ଼ା ମାରିଥିବା ମହିଳା କନ୍ଷ୍ଟେବଳଙ୍କର ଏକ ଭିଡିଓ ସାମ୍ନାକୁ ଆସିଛି ।
ସେଥିରେ ସେ କହିଛନ୍ତି, କଙ୍ଗନା ୧୦୦ ଟଙ୍କା ଲାଗି ଚାଷୀ ଆନ୍ଦୋଳନରେ ବସୁଥିବା କଥା କହିଥିଲେ । ଯେତେବେଳେ ସେ ଏମିତି ବୟାନ ଦେଇଥିଲେ ସେତେବେଳେ ମୋର ମା’ ବି ଆନ୍ଦୋଳନରେ ବସିଥିଲେ । ହରିଆଣା ମୁଖ୍ୟମନ୍ତ୍ରୀ ନାୟବ ସିଂହ ସୈନି ଘଟଣାକୁ ନିନ୍ଦା କରିବା ସହ ତଦନ୍ତ ନିର୍ଦ୍ଦେଶ ଦେଇଛନ୍ତି । ସିଆଇଏସ୍ଏଫ୍ ପକ୍ଷରୁ ଯାଞ୍ଚ ଲାଗି ଏକ ୪ ସଦସ୍ୟବିଶିଷ୍ଟ ଟିମ୍ ଗଠନ କରାଯାଇଛି ।
