ନୂଆଦିଲ୍ଲୀ ୧୫/୦୯: ବିଜେପି ଆଡକୁ ଢଳୁଛନ୍ତି ଚିରାଗ ପାସଓ୍ୱାନ । ବୁଧବାର ସୁରଟରେ ହିନ୍ଦୀ ଦିବସ ଉତ୍ସବ କାର୍ଯ୍ୟକ୍ରମ ଥିଲା । ଯାହାକୁ ସମ୍ୱୋଧନ କରିଥିଲେ କେନ୍ଦ୍ର ଗୃହମନ୍ତ୍ରୀ ତଥା ବରିଷ୍ଠ ଭାରତୀୟ ଜନତା ପାର୍ଟି (ବିଜେପି) ଅମିତ ଶାହା । ତେବେ ଏହି କାର୍ଯ୍ୟକ୍ରମରେ ସାମିଲ ହୋଇଥିଲେ ଲୋକ ଜନଶକ୍ତି ନେତା ଚିରାଗ ପାସଓ୍ୱାନ । ଚିରାଗ 'ସରକାରୀ ଭାଷା' ଉପରେ ସଂସଦୀୟ କମିଟିର ସଦସ୍ୟ ହିସାବରେ ସେଠାରେ ଉପସ୍ଥିତ ଥିଲେ ।
କିନ୍ତୁ ସୂତ୍ରରୁ ଜଣାପଡିଛି ଯେ ସୁରଟ ସଭାରେ ଯୋଗଦେବା ପାଇଁ ଚିରାଗଙ୍କ ନିକଟରେ ଥିଲା ଅନ୍ୟ କାରଣ । କାରଣ ବିଜେପି ନେତା ତାଙ୍କୁ ଏହି ସଭାରେ ଯୋଗଦେବାକୁ ନିମନ୍ତ୍ରଣ କରିଥିଲେ । ଯେଉଁଥିପାଇଁ ସେ ସୁରଟ ଯାଇଥିଲେ । ସେପଟେ ବିଜେପିର ଅନେକ ନେତା ବାରମ୍ୱାର ଦୋହରାଉଛନ୍ତି ଯେ, ଚିରାଗ ପାସୱାନ ଏବେବି ଏନଡିଏର ଏକ ଅଂଶ ଅଛନ୍ତି ।
ରାଷ୍ଟ୍ରପତି ନିର୍ବାଚନ ସମୟରେ କେନ୍ଦ୍ର ମନ୍ତ୍ରୀ ରାଜନାଥ ସିଂ ଚିରାଗଙ୍କୁ ଡାକି ଦ୍ରୌପଦୀ ମୁର୍ମୁଙ୍କ ସମର୍ଥନ ଲୋଡିଥିଲେ । ଚିରାଗ ମଧ୍ୟ ତାଙ୍କୁ ସମର୍ଥନ କରିଥିଲେ । କେବଳ ଏତିକି ନୁହେଁ, ରାଷ୍ଟ୍ରପତି ନିର୍ବାଚନ ସମ୍ପର୍କରେ ଚିରାଗ ଏନଡିଏ ବୈଠକରେ ମଧ୍ୟ ସାମିଲ ହୋଇଥିଲେ । ରାଷ୍ଟ୍ରପତି ନିର୍ବାଚନରେ ସେ ମୁର୍ମୁଙ୍କୁ ସମର୍ଥନ କରିଥିଲେ । ଏନଡିଏର ଅଂଶ ନ ଥିବାରୁ ସେ ଏହି ସଭାରେ ଯୋଗ ଦେଇଥିଲେ ବୋଲି ଚିରାଗ କହିଛନ୍ତି ।
ସଦ୍ୟ ପ୍ରକାଶିତ ଗଣମାଧ୍ୟମ ରିପୋର୍ଟ ଅନୁଯାୟୀ, ବିହାରରେ ପରିବର୍ତ୍ତିତ ରାଜନୈତିକ ପରିସ୍ଥିତିରେ ଏକ ନୂଆ ସହଯୋଗ ପାଇଁ ଚିରାଗ ପାସୱାନ୍ ଏବଂ ବିଜେପି ମଧ୍ୟରେ ଆଲୋଚନା ଚାଲିଛି । ଚିରାଗଙ୍କ ଦାଦ ପଶୁପତି କୁମାର ପାରସ ବର୍ତ୍ତମାନ ଅନ୍ୟ ଦଳର ସାଂସଦଙ୍କ ସହ ଏନଡିଏରେ ଅଛନ୍ତି । ପାରସ ମଧ୍ୟ କେନ୍ଦ୍ର ମନ୍ତ୍ରୀ ଅଛନ୍ତି ।
ଅତୀତରେ ଚିରାଗ ପାସୱାନ କହିଥିଲେ ଯେ ଯେପର୍ଯ୍ୟନ୍ତ ପାରସ ମନ୍ତ୍ରୀ ଅଛନ୍ତି ଏବଂ ବିଜେପି ସହ ମେଣ୍ଟରେ ଥିବେ, ସେ ପର୍ଯ୍ୟନ୍ତ ବିଜେପି ସହ କୌଣସି ସଲାସୁତୁରା ହେବନି । ଅନ୍ୟପଟେ ବିଜେପି ନିଶ୍ଚିତ ଭାବେ ଜାଣିଛି ବିହାରରେ ଭୋଟରମାନେ ଏବେ ମଧ୍ୟ ଚିରାଗ ପାସୱାନଙ୍କ ସହିତ ଅଛନ୍ତି । ବିହାରରେ ୬ ପ୍ରତିଶତ ଭୋଟର ପାସୱାନଙ୍କର, ଯେଉଁମାନେ ଗତ ନିର୍ବାଚନରେ ଏଲଜେପିକୁ ସମର୍ଥନ କରିଥିଲେ ।
ତେବେ ଦାଦା-ପୁତୁରାଙ୍କୁ ଏକାଠି ଧରି ଚାଲିବାକୁ ବାଟ ଖୋଜୁଛି ବିଜେପି । ୨୦୨୪ ଲୋକସଭା ନିର୍ବାଚନ ପୂର୍ବରୁ ଜେଡିୟୁ, ଆରଜେଡି, କଂଗ୍ରେସ ଏବଂ ବାମପନ୍ଥୀ ଦଳ ସହ ପ୍ରତିଦ୍ୱନ୍ଦ୍ୱିତା କରିବାକୁ ବିଜେପି ଦଳିତ ଭୋଟରଙ୍କ ଏହି ବିଭାଗ ସହ ଯୋଡି ରଖିବାକୁ ଚାହୁଁଛି । ଉଭୟ ଚିରାଗ ପାସୱାନ ଏବଂ ପାରସଙ୍କୁ ଏନଡିଏ ମଧ୍ୟରେ ରଖିବା ପାଇଁ ଦଳ ଏକ ସୂତ୍ର ଖୋଜୁଛି ଭାରତୀୟ ଜନତା ପାର୍ଟି ।
