ଚିଙ୍ଗୁଡି ଘେରି ଉଚ୍ଛେଦ ଦାବି: ଚିଲିକା ନଳବଣରେ ମତ୍ସ୍ୟଜୀବୀଙ୍କ ଆଇନ ଅମାନ୍ୟ ଆନ୍ଦୋଳନ
Published By : Prameya-News7 Bureau | September 28, 2018 IST
ଚିଙ୍ଗୁଡି ମଫିଆଙ୍କ ଦ୍ବାରା ଚିଲିକା କବଳିତ । ଏଥିପାଇଁ ଚିଲିକାରୁ ଆଉ ପୂର୍ବଭଳି ମାଛ-ଚିଙ୍ଗୁଡି-କଙ୍କଡା ଉତ୍ପାଦନ ହେଉନାହିଁ । ତେଣୁ ଚିଲିକାକୁ ସଂପୂର୍ଣ୍ଣ ଘେରିମୁକ୍ତ କରିବାକୁ ଚିଲିକା ମତ୍ସଜୀବୀ ମହାସଂଘ ବାରମ୍ବାର ଦାବି କରି ଆସୁଥିଲେ ବି ପ୍ରଶାସନ କର୍ଣ୍ଣପାତ କରୁନଥିବାରୁ ମତ୍ସ୍ବଜୀବୀ ମହାସଂଘ ଆଜି ନିଜେ ମଇଦାନକୁ ଓହ୍ଲାଇଛି । ଶହଶହ ମତ୍ସ୍ୟଜୀବୀ ଏକାଠି ହୋଇ ଚିଲିକା ନଳବଣରେ ଆଇନ ଅମାନ୍ୟ ଆନ୍ଦୋଳନ ସହ ସେଠାରେ ମାଛ ଧରିଥିଲେ । ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ସେଠାରେ ପୋଲିସ ମୁତୟନ କରାଯାଇଥିଲା ।
ପ୍ରଶାସନ ଶୁଣିଲାନି । ସରକାର ବି ଶୁଣିଲେନି । ଶେଷରେ ଚିଲିକାକୁ ଘେରିମୁକ୍ତ କରିବାକୁ ଅଣ୍ଟା ଭିଡିଲେ ମତ୍ସ୍ୟଜୀବୀ । ବେଆଇନ ଚିଙ୍ଗୁଡି ଘେରିକୁ ମୁକ୍ତ କରିବାକୁ ହଜାରରୁ ଅଧିକ ସଂଖ୍ୟାରେ ମତ୍ସ୍ୟଜୀବୀ ଶହେଟି ଡଙ୍ଗାରେ ଚିଲିକାର ନଳବଣ ଅଞ୍ଚଳକୁ ଯାଇ ସେଠାରେ ଆଇନ ଅମାନ୍ୟ ଆନ୍ଦୋଳନ କରିଥିଲେ । ନିସିଦ୍ଧାଞ୍ଚଳରେ ମାଛ ଧରିବା ସହ ବେଆଇନ ଚିଙ୍ଗୁଡି ଘେରି ମୁକ୍ତ କରିବାକୁ ଦାବି କରିଥିଲେ । ଚିଲିକା ମତ୍ସ୍ୟଜୀବୀ ମହାସଂଘ ନେତୃତ୍ବରେ ଖୋର୍ଦ୍ଧା-ପୁରୀ-ଗଞ୍ଜାମ ଜିଲ୍ଲାର ହଜାରରୁ ଅଧିକ ମତ୍ସ୍ୟଜୀବୀ ଡଙ୍ଗାରେ ଚିଲିକା ନଳବଣ ପହଞ୍ଚିଥିଲେ । ଚିଲିକା ଭିତର ସମେତ ୫ଟି ମୁହାଣ ଅଞ୍ଚଳରୁ ବେଆଇନ୍ ଚିଙ୍ଗୁଡି ଘେରି ମୁକ୍ତ କରିବା, ମୁହାଣ ଅଞ୍ଚଳ ସଫା କରିବା, ଜିରୋ ନେଟ୍ ଜାଲରେ ମାଛ ଧରାକୁ ବନ୍ଦ କରିବା ଆଦି ୭ଟି ଦାବି ଉଠାଇଥିଲେ ଆନ୍ଦୋଳକାରୀ ।
ସେପଟେ ଚିଲିକା ମତ୍ସ୍ୟଜୀବୀଙ୍କ ଏଭଳି ଆନ୍ଦୋଳନ ଖବର ପାଇ ଚିଲିକା ନଳବଣରେ ପହଁଚିଥିଲେ କୃଷ୍ଣପ୍ରସାଦ ଆଇଆଇସିଙ୍କ ସହ ଚିଲିକା ଏସିଏଫ । ମତ୍ସ୍ୟଜୀବୀଙ୍କୁ ବୁଝୁସୁଝା କରିବା ସହ ସେମାନଙ୍କ ଦାବି ଉପରେ କାର୍ଯ୍ୟାନୁଷ୍ଠାନ ନେବାକୁ ପ୍ରତିଶ୍ରୁତି ଦେବା ପରେ ମତ୍ସ୍ୟଜୀବୀଙ୍କ ଆନ୍ଦୋଳନରୁ ଓହରିଛନ୍ତି ।
ଯଥାଶିଘ୍ର ଦାବି ପୁରଣ ନହେଲେ ପୁଣି ମତ୍ସ୍ୟଜୀବୀ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି । ଚିଲିକାରେ ବେଆଇନ ଚିଙ୍ଗୁଡି ଘେରି ଓ ନିସିଦ୍ଧ ଜିରୋ ନେଟ୍ ବ୍ୟବହାର ଯୋଗୁଁ ମାଛ, ଚିଙ୍ଗୁଡି ଓ କଙ୍କଡା ଉତ୍ପାଦନ ହେଉନାହିଁ । ଫଳରେ ପାରମ୍ପରିକା ମତ୍ସ୍ୟଜୀବୀ ସେମାନଙ୍କ ବେଉସା ହରାଇଲେଣି । ମତ୍ସୟଜୀବୀଙ୍କ ଆନ୍ଦୋଳନ ପ୍ରତି ସରକାର ଧ୍ୟାନ ନଦେଲେ ଆଗକୁ ଏହାକୁ ନେଇ ପୁଣି ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେବାର ଯଥେଷ୍ଟ ସମ୍ଭାବନା ରହିଛି ।