ନୂଆଦିଲ୍ଲୀ ୦୭/୦୯: ଚୀନ୍ରେ ଆମେରିକୀୟ କମ୍ପାନି ଆପଲ ସହିତ ଅନ୍ୟ ଦେଶଗୁଡ଼ିକର ଡିଭାଇସ୍ ବ୍ୟବହାର ଉପରେ ରୋକ୍ ଲଗାଯାଇଛି । ତେବେ ଏହି କଟକଣା କେବଳ ସରକାରୀ ଅଧିକାରୀମାନଙ୍କ ଉପରେ ଲାଗୁ ହେବ । ଅଧିକାରୀମାନଙ୍କୁ କୁହାଯାଇଛି ଯେ, ସେମାନେ ଅଫିସ୍କୁ ଏହି ଡିଭାଇସ୍ଗୁଡିକୁ ଆଣନ୍ତୁ ନାହିଁ ।
କାର୍ଯ୍ୟରେ ଏହି ଡିଭାଇସ୍ଗୁଡିକୁ ବ୍ୟବହାର ନ କରିବା ପାଇଁ ସେମାନଙ୍କୁ ନିର୍ଦ୍ଦେଶ ଦିଆଯାଇଛି । ୱାର୍ଲ ଷ୍ଟ୍ରିଟ୍ ଜର୍ଣ୍ଣାଲରେ ଏ ନେଇ ଏକ ରିପୋର୍ଟ ପ୍ରକାଶ ପାଇଛି । ଦେଶରେ ତିଆରି ଫୋନ୍ର ବ୍ୟବହାର କରିବା ପାଇଁ ଚୀନ୍ ସରକାର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ରିପୋର୍ଟ ଅନୁସାରେ, ଚୀନ୍ ଆପଲ ଛଡ଼ା ଅନ୍ୟ ଫୋନ୍ ନିର୍ମାତାମାନଙ୍କ ନାଁ ନେଇନାହିଁ ।
ବର୍ତ୍ତମାନ ସୁଦ୍ଧା ଆପଲ ପକ୍ଷରୁ ଏହା ଉପରେ କୌଣସି ପ୍ରତିକ୍ରିୟା ପ୍ରକାଶ ପାଇନାହିଁ । ଅନ୍ୟପକ୍ଷରେ, ଚୀନ୍ ସରକାର ଏହା ଉପରେ କୌଣସି ଔପଚାରିକ ସୂଚନା ଦେଇନାହାନ୍ତି । ଚୀନ୍ ପକ୍ଷରୁ ଆଇଫୋନ୍ ଉପରେ ଏହି ପ୍ରତିବନ୍ଧକ ଏଭଳି ସମୟରେ ଲଗାଯାଇଛି, ଯେତେବେଳେ କମ୍ପାନି ସେପ୍ଟେମ୍ବର ୧୨ରେ କାର୍ଲିଫର୍ଣ୍ଣିଆରେ ୱାଣ୍ଡରଲଷ୍ଟ କାର୍ଯ୍ୟକ୍ରମ ଆୟୋଜନ କରିବାକୁ ଯାଉଛି ।
ଏହି କାର୍ଯ୍ୟକ୍ରମରେ ଆପଲ ଆଇଫୋନ୍ ୧୫ ସିରିଜ୍ ସହ ଆପଲ୍ ୱାଚ୍ ସିରିଜ୍ ୯ ଏବଂ ଆପଲ ୱାଚ୍ ଅଲ୍ଟ୍ରା ୨କୁ ଲଞ୍ଚ କରାଯିବ । ସୂଚନାଯୋଗ୍ୟ, ୩ ମାସ ପୂର୍ବେ ରୁଷ ଆମେରିକା ଉପରେ ଆଇଫୋନ୍ ମାଧ୍ୟମରେ ଗୁପ୍ତଚର କାର୍ଯ୍ୟକଳାପ ଅଭିଯୋଗ ଆଣିଥିଲା । ତେବେ ଆପଲ ପକ୍ଷରୁ ଏହି ଅଭିଯୋଗକୁ ଖାରଜ କରିଦିଆଯାଇଥିଲା ।
ଆପଲ୍ କହିଥିଲା ଯେ, ଆମେ କୌଣସି ଦେଶର ସରକାରଙ୍କ ସହ ମିଶି ଫୋନ୍ରେ ସାଲିସ୍ କରି ନ ଥାଉ ଏବଂ ଆଗକୁ ମଧ୍ୟ କରିବୁ ନାହିଁ । ଆପଲ ୨୦୨୫ ସୁଦ୍ଧା ୧୮% ଗ୍ଲୋବାଲ ଆଇଫୋନ୍ ବିନିର୍ମାଣକୁ ଭାରତକୁ ସ୍ଥାନାନ୍ତର କରିବା ଉପରେ ବିଚାର କରୁଛି । ବ୍ୟାଙ୍କ ଅଫ୍ ଆମେରିକାର ରିପୋର୍ଟ ଅନୁସାରେ, ଭାରତ ସରକାରଙ୍କ ଉତ୍ପାଦନ ସଂଯୁକ୍ତ ପ୍ରୋତ୍ସାହନ(ପିଏଲ୍ଆଇ) ସ୍କିମ୍ ଆପଲ୍କୁ ଦେଶରେ ଉତ୍ପାଦନ କ୍ଷମତା ବଢ଼ାଇବା ପାଇଁ ପ୍ରୋତ୍ସାହନ ଦେଉଛି ।
wp:embed {"url":"https://www.prameyanews7.com/warning-for-all-iphone-users/","type":"wp-embed","providerNameSlug":"prameya-news-7"}ବ୍ୟାଙ୍କ ଅଫ୍ ଆମେରକା ଏହାର ରିପୋର୍ଟରେ ପ୍ରକାଶ କରିଛି ଯେ, ସରକାରଙ୍କ ପିଏଲ୍ଆଇ ସ୍କିମ୍ କେବଳ ଆପଲ୍ ନୁହେଁ ବରଂ ଭାରତ ପାଇଁ ମଧ୍ୟ ସହାୟକ ହେବ । ଭୁ-ରାଜନୈତିକ ସମସ୍ୟା ଏବଂ କରୋନା ମହାମାରୀ ପରେ ଆପଲ ସମେତ ଅନ୍ୟ ଆମେରିକୀୟ ଟେକ୍ କମ୍ପାନିମାନେ ଚୀନ୍ରୁ ସେମାନଙ୍କ ଉତ୍ପାଦନ ୟୁନିଟ୍ଗୁଡ଼ିକୁ ଅନ୍ୟତ୍ର ବିସ୍ତାର କରିବା ପାଇଁ କାର୍ଯ୍ୟ କରୁଛନ୍ତି । ଏ କ୍ଷେତ୍ରରେ ଭାରତର ପିଏଲ୍ଆଇ ସ୍କିମ୍ ସେମାନଙ୍କୁ ଆକୃଷ୍ଟ କରୁଛି ।
