ନୂଆଦିଲ୍ଲୀ: ଚୀନର ବୈଦେଶିକ ମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ପ୍ରଥମ ଥର ତାଇୱାନ ପ୍ରସଙ୍ଗରେ ଆମେରିକାକୁ ଚେତାବନୀ ଦେଇଛନ୍ତି କିନ୍ ଗ୍ୟାଙ୍ଗ । ଚୀନ ସଂସଦର ବାର୍ଷିକ ଅଧିବେଶନ ବାହାରେ ସେ ପ୍ରତିକ୍ରିୟା ରଖି କହିଛନ୍ତି ଯେ ତାଇୱାନ ହେଉଛି ‘ଫାଷ୍ଟ ରେଡ୍ ଲାଇନ୍’ ଆମେରିକା ଏହାକୁ ଅତିକ୍ରମ ନ କରିବା ଦରକାର । ଏହାସହ ସେ କହିଛନ୍ତି ଯେ ତାଇୱାନକୁ ଚୀନର ଅଂଶ ଭାବେ ଅସ୍ୱୀକାର କରିବା ଆମେରିକା ଅଧିକାରୀଙ୍କ ପାଇଁ ନିର୍ବୋଧତାର ପରିଚୟ ଅଟେ ।

ଚୀନ ବୈଦେଶିକ ମନ୍ତ୍ରୀ କହିଛନ୍ତି, ‘ତାଇୱାନ ହେଉଛି ଚୀନ ସ୍ୱାର୍ଥର ସବୁଠୁ ବଡ଼ ପ୍ରସଙ୍ଗ । ଏହା ଚୀନ ଏବଂ ଆମେରିକାର ସମ୍ପର୍କର ମୂଳ ଆଧାର ଏବଂ ଚୀନ-ଆମେରିକା ସମ୍ପର୍କରେ ଆମେରିକା ନାଲି ଗାର ନ ଟପିବା ଦରକାର’ ।

ତାଇୱାନ ପ୍ରସଙ୍ଗ ପାଇଁ ୱାଶିଂଟନକୁ ସମସ୍ତ ଦୋଷ ଦେଇଛନ୍ତି ଚୀନ ବୈଦେଶିକ ମନ୍ତ୍ରୀ କିନ୍ ଗ୍ୟାଙ୍ଗ । ଏହାସହ ସେ କହିଛନ୍ତି ତଥାକଥିତ ଦୁଇ ଚୀନ ଉପରେ ଶାନ୍ତିପୂର୍ଣ୍ଣ ସମାଧାନ ପାଇଁ ବେଜିଂ ପ୍ରସାୟ ଜାରି ରଖିବ ।

ଉଲ୍ଲେଖଯୋଗ୍ୟ ଯେ ନିକଟ ଅତୀତରେ ଚୀନ ଏବଂ ତାଇୱାନ ମଧ୍ୟରେ ବିବାଦ ଅଧିକ ବଢିଯାଇଛି । ଗଣତାନ୍ତ୍ରିକ ଦେଶ ତାଇୱାନକୁ ଚୀନ ନିଜର ବୋଲି ଦାବି କରି ଆସୁଛି । ଏହାସହ ତିନି ବର୍ଷରେ କୂଟନୈତିକ ଏବଂ ମିଲିଟାରୀ ଶକ୍ତି ବଳରେ ଚାଇନାର ସାର୍ବଭୌତ୍ୱ ସ୍ୱୀକାର କରିବା ପାଇଁ ତାଇୱାନ ଉପରେ ଚାପ ପକାଉଛି । ଅନ୍ୟପଟେ ତାଇୱାନ ଏହାର ଦୃଢ ବିରୋଧ କରୁଛି । ତାଇୱାନ ଲୋକୁ ସେମାନଙ୍କ ଭବିଷ୍ୟତ ଉପରେ ନିଷ୍ପତ୍ତି ନେବାର ପୂର୍ଣ୍ଣ ଅଧିକାର ରହିଛି ବୋଲି କହି ଆସୁଛି । ତାଇୱାନକୁ ଆମେରିକାର ସମର୍ଥନ ରହିଛି ।