ନୂଆଦିଲ୍ଲୀ: ଚୀନରେ ସୋମବାର ବହୁ ମୁସଲିମ ଦେଶ ଏକାଠି ହୋଇଥିଲେ । ସାଉଦି ଆରବ, ଇଜିପ୍ଟ, ଜର୍ଡନ ଓ ଫିଲିସ୍ତିନ ଗୋଟିଏ ସମାନ ଉଦ୍ଦେଶ୍ୟ ସହ ଏଠାରେ ପହଞ୍ଚିଥିଲେ । ବେଜିଂ ଦ୍ୱାରା ଆୟୋଜିତ ଏହି ବୈଠକ ସହ ଇସ୍ରାଏଲ୍-ହମାସ ଯୁଦ୍ଧର ସମ୍ପର୍କ ରହିଛି । ଦୁଇ ଦିନିଆ ବୈଠକ ଚୀନ ପକ୍ଷରୁ ଆୟୋଜନ କରାଯାଇଥିବା ବେଳେ ମଧ୍ୟପ୍ରାଚ୍ୟରେ ଶାନ୍ତି ସ୍ଥାପନ ଏହା ଉଦ୍ଦେଶ୍ୟ ବୋଲି କୁହାଯାଇଛି । ସାଉଦି ବିଦେଶ ମନ୍ତ୍ରୀ ପ୍ରିନ୍ସ ଫେସଲ ବିନ ଫରହାନ ଅଲ୍ କହିଛନ୍ତି ଯେ ମୁସଲିମ ଓ ଆରବ ଦେଶଙ୍କ ପ୍ରତିନିଧି ସ୍ପଷ୍ଟ ସନ୍ଦେଶ ଦେବା ପାଇଁ ଏକାଠି ହୋଇଛନ୍ତି । ଏହାସହ ଯୁଦ୍ଧ ଓ ହତ୍ୟା ବନ୍ଦ କରାଯିବା ଦରକାର ବୋଲି ସେ କହିଛନ୍ତି ।

ଏହି ଅବସରରେ ଫିଲିସ୍ତିନୀ ପ୍ରାଧିକରଣର ବିଦେଶ ମନ୍ତ୍ରୀ ରିୟାଦ ଅଲ-ମଲିକି ଇସ୍ରାଏଲ୍ ଆମକୁ ଶେଷ କରିବାକୁ ଚାହୁଁଛି ବୋଲି ଅଭିଯୋଗ କରିଥିଲେ । ସେ କକହିଛନ୍ତି ଯେ ନିକଟରେ ଇସ୍ରାଏଲ୍ ସରକାରଙ୍କ ଦ୍ୱାରା କରାଯାଇଥିବା ଯୋଜନାର ଉଦ୍ଦେଶ୍ୟ ଐତିହାସିକ ଭୂମିରେ ଫିଲିସ୍ତିନୀ ଲୋକଙ୍କ ଉପସ୍ଥିତିକୁ ଶେଷ କରିବା । ସେହିପରି ଇଜପ୍ଟି ସରକାରଙ୍କ ଜଣେ ମୁଖପାତ୍ର କହିଥିଲେ ଯେ ଇସ୍ରାଏଲ୍ ଗାଜା ଲୋକଙ୍କ ମନବୀୟ ସହାୟତା ଶେଷ କରିବାକୁ ଚାହୁଁଛି । ଏହାସହ ରାଫା କ୍ରସିଙ୍ଗ ଜରିଆରେ ଗାଜାରେ ମାନବୀୟ ସହାୟତା ପାଇଁ ଇଜପ୍ଟି ଉଦ୍ୟମ କରୁଥିବା ସେ କହିଛନ୍ତି ।

ପଢନ୍ତୁ: ପ୍ରଥମଥର ପାଇଁ ଜନମତ ସର୍ଭେରେ ବାଇଡେନ୍‌ଙ୍କୁ ଟପିଲେ ଟ୍ରମ୍ପ, ଇସ୍ରାଏଲ-ହମାସ ଯୁଦ୍ଧ ପାଇଁ କମିଲା ଆମେରିକାବାସୀଙ୍କ ସମର୍ଥନ

 ଚୀନ ବିଦେଶ ମନ୍ତ୍ରୀ ୱାଙ୍ଗ ୟି କହିଛନ୍ତି ଯେ ମୁସଲିମ ଦେଶଙ୍କ ଭଲ ବନ୍ଧୁ ଓ ଭାଇ ହେବା ଯୋଗୁଁ ସବୁବେଳେ ଫିଲିସ୍ତିନକୁ ସମର୍ଥନ କରୁଛୁ । ଆମେ ଫିଲିସ୍ତିନୀ ଲୋକଙ୍କ ରାଷ୍ଟ୍ରୀୟ ଅଧିକାରର ରକ୍ଷା କରିବାକୁ ଚାହୁଁଛୁ ବୋଲି ସେ କହିଥିଲେ । ଗାଜା ସ୍ୱାସ୍ଥ୍ୟ ମନ୍ତ୍ରାଳୟ ଅନୁସାରେ ଇସ୍ରାଏଲ ଆକ୍ରମଣରେ ବର୍ତ୍ତମାନ ସୁଦ୍ଧା ୫,୫୦୦ ପୁରୁଷ ଓ ୩,୫୦୦ ମହିଳାଙ୍କ ସହ ୧୩,୦୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଛି ।