ବଲାଙ୍ଗୀର ୧୫।୩: ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଶିଶୁର ମୃତ୍ୟୁ ଅଭିଯୋଗ । ଶିଶୁର ମୃତଦେହ ଧରି ହସ୍ପିଟାଲ ବାହାରେ କାନ୍ଦି କାନ୍ଦି ଅଭିଯୋଗ କଲେ ପରିବାର ଲୋକ । ଚିକିତ୍ସା ଅବହେଳାରୁ ପୁଅର ମୃତ୍ୟୁ ହୋଇଛି ବୋଲି ବାପା-ମା’ କାନ୍ଦି କାନ୍ଦି ଚିତ୍କାର କରୁଥିଲେ ।
ସୂଚନାଯୋଗ୍ୟ ଯେ, ଗତ ଦୁଇ ଦିନ ତଳେ ପୁଇଁତଲା ଥାନା ବୁବେଲ ଗାଁର ପାନ ଦୋକାନୀ ଗୋପାଳ ନାଏକ ନିଜ ସାଢେ ତିନି ବର୍ଷର ପୁଅକୁ ଝାଡା ହେଉଥିବାରୁ ହସ୍ପିଟାଲ ଆଣିଥିଲେ । ଡାକ୍ତର ପ୍ରାଥମିକ ଚିକିତ୍ସା କରି ଛାଡି ଦେଇଥିଲେ । ତଥାପି ସୁସ୍ଥ ହୋଇନଥିଲା ଶିଶୁ । ଫଳରେ ବାପା-ମା’ ମଙ୍ଗଳବାର ପୁଣି ଡାକ୍ତର ଦେଖାଇବା ପାଇଁ ଆସିଥିଲେ । ହସ୍ପିଟାଲରେ କୌଣସି ପ୍ରକାର ପରୀକ୍ଷା ନକରି ଡାକ୍ତର ପୁଣି ଥରେ ଶିଶୁ ଟି ଠିକ ଠାକ ଅଛି ଘରକୁ ନେଇ ଯିବାକୁ କହିଥିଲେ | କିନ୍ତୁ ଘର ଲୋକେ ଜବରଦସ୍ତ ଶିଶୁତିକୁ ହସ୍ପିଟାଲରେ ଭର୍ତ୍ତି କରାଇଥିଲେ । ତାପରେ ମଧ୍ୟ କୌଣସି ଚିକିତ୍ସା କରାଯାଇନଥିବା ଅଭିଯୋଗ ହୋଇଛି ।
ଶିଶୁଟିର ମୃତ୍ୟୁ ପରେ ଆମ୍ବୁଲାନ୍ସକୁ ଡାକି ଅନ୍ୟ ହସ୍ପିଟାଲକୁ ନେବାକୁ ଡାକ୍ତର ପରାମର୍ଶ ଦେଇଥିବା ଅଭିଯୋଗ କରିଛନ୍ତି ମୃତ ଶିଶୁର ବାପା । ଗୋପାଳଙ୍କ ଏ ଥିଲା ଦ୍ୱିତୀୟ ପୁଅ ହେଲେ ମାତ୍ର ସାଢ଼େ ତିନି ବର୍ଷରେ ମୃତ୍ୟୁ ଘଟିଥିବାରୁ ଭାଙ୍ଗିପଡ଼ିଥିଲେ ପରିବାର ଲୋକ । ମେଡ଼ିକାଲ କଲେଜରେ ଏଭଳି ବ୍ୟବସ୍ଥାକୁ ଦାୟୀ କରି ଅଭିଯୋଗ ଆଣିଥିଲେ ପରିବାର ଲୋକ । ସେପଟେ ଏନେଇ ହସ୍ପିଟାଲ ସୁପରିଟେଣ୍ଡେଣ୍ଟଙ୍କୁ ଯୋଗାଯୋଗ କରିବାରୁ ସେ ବୈଠକରେ ବ୍ୟସ୍ତଥିବା କହି ଘଟଣାକୁ ଏଡାଇ ଦେଇଥିଲେ । ତେବେ ଏନେଇ ପରିବାର ଲୋକ ନ୍ୟାୟ ପାଇଁ ଦାବି କରିଛନ୍ତି ।
