ନୂଆଦିଲ୍ଲୀ: ବିସିସିଆଇର ମୁଖ୍ୟ ଚୟନକର୍ତ୍ତା ଚେତନ ଶର୍ମାଙ୍କ ଷ୍ଟିଙ୍ଗ ଅପରେସନ ସାମନାକୁ ଆସିଛି । ଏଥିରେ ପୂର୍ବତନ ଭାରତୀୟ ଦ୍ରୁତ ବୋଲର ଅନେକ ଚାଞ୍ଚଲ୍ୟକର ବୟାନ ଦେଇଛନ୍ତି । ଚେତନ ଶର୍ମା ଗୁପ୍ତ କ୍ୟାମେରା ଆଗରେ ଏପରି ଅନେକ ସତ କହିଛନ୍ତି, ଯାହା ଆଜି ଯାଏ ବିସିସିଆଇର ବିଲ୍ଡିଂ ଭିତରେ ହିଁ ଲୁଚି ରହିଥିଲା ।

Zee ନ୍ୟୁଜ କରିଥିବା ଷ୍ଟିଙ୍ଗ୍ ଅପରେସନରେ ଚେତନ ଶର୍ମା ଏପରି ଅନେକ ସତ କହିଛନ୍ତି, ଯାହା ଦୁନିଆ ଆଗରେ ଲୁଚି ରହିଥିଲା । ଏଥିରେ ଏକ ବଡ଼ ଖୁଲାସା ହେଉଛି ବିସିସିଆଇର ପୂର୍ବତନ ଅଧ୍ୟକ୍ଷ ସୌରଭ ଗାଙ୍ଗୁଲି ଏବଂ ଟିମ୍ ଇଣ୍ଡିଆର ପୂର୍ବତନ ଅଧିନାୟକ ବିରାଟ କୋହଲିଙ୍କ ମଧ୍ୟରେ ହୋଇଥିବା ବହୁ ଚର୍ଚ୍ଚିତ ବିବାଦ । ଦିନିକିଆ ଅଧିନାୟକ ପଦ ଛଡାଇ ନିଆଯିବା ପରେ ବିରାଟ କୋହଲି ଦେଇଥିବା ବୟାନ ମିଛ ବୋଲି ଚେତନ ଶର୍ମା କହିଛନ୍ତି । ସେ କହିଛନ୍ତି ଯେ ଦିନିକିଆ ପଦରୁ ହଟାଯିବା ବାବଦରେ ଆଗୁଆ କୌଣସି ସୂଚନା ଦିଆଯାଇ ନଥିଲା ବୋଲି ବିରାଟ ମିଛ କହିଛନ୍ତି ।     

ଉଲ୍ଲେଖଯୋଗ୍ୟ ଯେ ଦ.ଆଫ୍ରିକା ଗସ୍ତ ପୂର୍ବରୁ ପୂର୍ବତନ ଅଧିନାୟକ ବିରାଟ କୋହଲ, ପୂର୍ବତନ ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କ ବୟାନର ବିପରୀତରେ ମତ ରଖିଥିଲେ । ସୌରଭ ଗାଙ୍ଗୁଲି କହିଥିଲେ ଯେ ଅଧିନାୟକ ପଦରୁ ହଟାଯିବା ନେଇ କୋହଲିଙ୍କୁ ପୂର୍ବରୁ ସୂଚନା ଦିଆଯାଇଥିଲା । ଅନ୍ୟପଟେ କୋହଲି କହିଥିଲେ ଯେ ଦ.ଆଫ୍ରିକା ବିପକ୍ଷ ଟେଷ୍ଟ ସିରିଜ୍ ଚୟନର ଅଧ ଘଣ୍ଟା ପୂର୍ବରୁ ଚେତନ ଶର୍ମା ଫୋନ ଯୋଗେ ତାଙ୍କୁ ଏହି ବିଷୟରେ ସୂଚନା ଦେଇଥିଲେ ।

ଷ୍ଟିଙ୍ଗ ଅପରେସନରେ ଚେତନ ଶର୍ମା କହିଛନ୍ତି, ‘ସୌରଭ ଗାଙ୍ଗୁଲି ଏବଂ ବିସିସିଆଇକୁ ନେଇ କରିଥିବା ବିବାଦୀୟ ସାମ୍ୱାଦିକ ସମ୍ମଳନୀରେ କୋହଲି ମିଛ କହିଥିଲେ’ ।

ଚେତନ ଶର୍ମାଙ୍କ ଅନୁସାରେ, ଗାଙ୍ଗୁଲି ଏବଂ ବିରାଟଙ୍କ ମଧ୍ୟରେ EGOର ବିବାଦ ଥିଲା । ଏହି କାରଣରୁ ଦୁହିଁଙ୍କ ମଧ୍ୟରେ ମତଭେଦ ହୋଇଥିଲା । ବିରାଟ କୋହଲି ନିଜକୁ ଖେଳରୁ ଉପରେ ଭାବି ନେଇଥିଲେ । ବିରାଟ ଭାବିଥିଲେ ଗାଙ୍ଗୁଲିଙ୍କ ପାଇଁ ତାଙ୍କ ହାତରୁ ଦିନିକିଆର କ୍ୟାପ୍ଟେନ୍ସି ଗଲା ।

ଷ୍ଟିଙ୍ଗ ଅପରେସନରେ ଚେତନ ଶର୍ମା କହିଛନ୍ତି ଯେ ସତ ହେଉଛି ପୂର୍ବରୁ ଅବଗତ କରାଯାଇଥିଲା, ୮-୯ ଜଣ ଲୋକ ବସିଥିଲେ…ଗାଙ୍ଗୁଲି କହିଥିଲେ, ବିରାଟ ମିଛ କହିଥିଲେ । କିନ୍ତୁ ବିରାଟ କାହିଁକି ମିଛ କହିଲେ ତାହା ଆଜି ଯାଏ କାହାକୁ ଜଣା ନାହିଁ । ଏହା ତାଙ୍କର ବ୍ୟକ୍ତିଗତ ବିଷୟ ଅଟେ । ଏହା ବୋର୍ଡ ଆଉ ଖେଳାଳିଙ୍କ ମଧ୍ୟରେ ଲଢେଇ ହୋଇଯାଇଥିଲା ।