ନୂଆଦିଲ୍ଲୀ ୯|୯: ନିଜ ସ୍ବାମୀଙ୍କ ସହ ଝଗଡା କାରଣରୁ ନଏଡା ସେକ୍ଟର ୨୦ରେ ଏକାକୀ ରହୁଥିବା ଅନୀମା (ଛଦ୍ମନାମ) ଫେସବୁକରେ ଜଣେ ଯୁବକଙ୍କ ସହ ବନ୍ଧୁତା ସ୍ଥାପନ କଲେ । ଧୀରେ ଧୀରେ ଜୟପୁରରେ ରହୁଥିବା ଏହି ଯୁବକ ସହ ଚାଟିଂ ମଧ୍ୟ କଲେ । ଅନୀମା ମାନସିକ ସ୍ତରରେ ଦୁର୍ବଳ ଥିଲେ । ତେଣୁ ସେ ବ୍ୟକ୍ତିଗତ ଜୀବନ ସମ୍ପର୍କରେ ମଧ୍ୟ କିଛି କଥା ଯୁବକଙ୍କୁ ଜଣାଇଥିଲେ । ଧୀରେ ଧୀରେ ଯୁବକ ଅନୀମାଙ୍କ ନିକଟବର୍ତ୍ତୀ ହେବାକୁ ଲାଗିଲେ । ଅନୀମାଙ୍କ ଝିଅର ଜନ୍ମଦିନରେ କେକ୍ ପଠାଇଲେ । ବିଭିନ୍ନ ଉପହାର ମଧ୍ୟ ପଠାଇବାକୁ ଲାଗିଲେ । ତେବେ ଇତି ମଧ୍ୟରେ ଅନୀମା ଓ ତାଙ୍କ ସ୍ବାମୀଙ୍କ ମଧ୍ୟରେ ଥିବା ବିବାଦର ସମାଧାନ ହୋଇଗଲା ଏବଂ ଅନୀମାଙ୍କ ସହ ତାଙ୍କ ସ୍ବାମୀ ରହିଲେ । ଫଳରେ ଫେସବୁକ୍ ବନ୍ଧୁଙ୍କ ସହ ଅନୀମା ଚାଟିଂ କରିବା ବନ୍ଦ କରିଦେଲେ । ଏଥର ଫେସବୁକ୍ ବନ୍ଧୁ ତାଙ୍କର ଅସଲ ରୂପ ଦେଖାଇବା ଆରମ୍ଭ କଲେ । ଅତୀତରେ ଅନୀମାଙ୍କଠୁ ଜାଣିଥିବା ତାଙ୍କ ବ୍ୟକ୍ତିଗତ ଜୀବନର କଥାକୁ ଦୋହରାଇ ବ୍ଲାକମେଲିଂ କରିବା ଆରମ୍ଭ କରିଦେଲେ । ଶାରିରୀକ ସଂପର୍କ ପାଇଁ ଅନୀମାଙ୍କ ଉପରେ ଚାପ ପକାଇବା ଆରମ୍ଭ କଲେ । ଆଉ କିଛି ଉପାୟ ନପାଇ ଅନୀମା ନିଜ ସ୍ବାମୀଙ୍କୁ ସବୁକଥା କହିବା ସହ ପୁରୁଣା ଚାଟ୍ ଦେଖାଇଲେ । ଅନୀମାଙ୍କ ସ୍ବାମୀ ଜୟପୁରର ଏହି ଯୁବକଙ୍କୁ ବୁଝାଇବାକୁ ଚେଷ୍ଟା କଲେ । କିନ୍ତୁ ଏହି ଯୁବକ ଅନୀମାଙ୍କ ସ୍ବାମୀଙ୍କୁ ମଧ୍ୟ ଧମକଚମକ ଦେବା ଆରମ୍ଭ କଲେ । ଫଳରେ ସ୍ବାମୀଙ୍କ ପରାମର୍ଶ କ୍ରମେ ଅନୀମା ନଏଡା ପୋଲିସ ଥାନାରେ ମାମଲା ଦାୟର କରିଛନ୍ତି । ପୋଲିସ ଘଟଣାର ଅନୁସନ୍ଧାନ ଆରମ୍ଭ କରିବା ସହ ସାଇବର ସେଲ୍ ସହାୟତାରେ ଅତିଶୀଘ୍ର ଯୁବକଙ୍କୁ ଗିରଫ କରାଯିବ ବୋଲି କହିଛି।