ପୁରୀ ୯।୬: ଜୋରସୋରରେ ଚାଲିଛି ମହାପ୍ରଭୁଙ୍କ ରଥ ନିର୍ମାଣ ।  ଗୁରୁବାର ରଥରେ ତାଗ ବାଡ଼ିଆ  ଆରମ୍ଭ ହୋଇଛି । ତାଗ ବାଡ଼ିଆ  ସରିଲେ ରଥରେ ପଟା ପଡ଼ିବ । ପଟା  ବାଡ଼ିଆ ସରିଲେ ରଥର ଚଟାଣ ପ୍ରସ୍ତୁତ  ହୋଇଯିବ । ବିଶ୍ୱକର୍ମାଙ୍କ ତତ୍ତ୍ୱାବଧାନରେ ଭୋଇସେବକମାନେ କାର୍ଯ୍ୟରେ  ଲାଗିଛନ୍ତି । କମାର ସେବକମାନେ  ତାଗରେ କଣ୍ଟା ପିଟୁଛନ୍ତି । ପୋଟଳରେ  ଲାଗିବାକୁ ଜଙ୍ଘା କଣ୍ଟା ତିଆରି କରିଛନ୍ତି । 

ତାଳଧ୍ୱଜ, ଦେବଦଳନ ଓ ନନ୍ଦିଘୋଷ  ରଥର କାର୍ଯ୍ୟ ଜାରି ରହିଛି । ଗୟଳ ଉପରେ ବରଗାଗୁଡ଼ିକ ହେଉଛି ତାଗ । ୩ ଇଞ୍ଚରେ ଅଢେଇ ଇଞ୍ଚର ୧୨ ଫୁଟିଆ ଲମ୍ବ କାଠ । ରଥ ଚାରିପଟେ ତାଗ ବାଡ଼ିଆ ପରେ  ରଥରେ ପଟା ପଡ଼ିବ । ପଟା ଉପରେ ଠାକୁରେ ବିଜେ ହୋଇ ସିଂହାସନାରୁଢ  ହେବେ ।

ପୂର୍ବରୁ ରଥରେ କଇଁଚି ବାଡିଆ ଯାଇଥିଲା । ରଥ ମୂଳଦୁଆରୁ ଉପର ଅଂଶ ପର୍ଯ୍ୟନ୍ତ କଇଁଚି ଲାଗିଯିବା  ପରେ ରଥ ମଜବୁତ ହୋଇଛି । ଏବେ ରଥଚାଳିରେ ତିନି ରଥର ଦୁଆର ଘଡ଼ା କାମ ସରିବା ଉପରେ । ଏହାର ଉପର  ଅଂଶ ଚନ୍ଦ୍ରଶାଳି । ବିଶ୍ୱକର୍ମାମାନେ କଳସ  କାମ ସାରୁଛନ୍ତି । କଳସର ବଡ଼, ଛୋଟ  ପିଣ୍ଡି ଓ ପାଖୁଡ଼ା କାମ ସରିଥିଲା । ସେସବୁକୁ ସଂଯୁକ୍ତ କରାଯାଇ କଳସ ଫ୍ରେମ୍‌ରେ ଦସ୍ତା ଚାଦର ବୁଲିଲା ପରେ  ଚିତ୍ରକରଙ୍କ ଜିମା ଦିଆଯାଇଛି । ସେମାନେ  ଏହାକୁ ସୁନ୍ଦର ଭାବେ ଚିତ୍ରକରି  ରଥରେ ସ୍ଥାପନ ପାଇଁ ପ୍ରସ୍ତୁତ କରିବେ । 

ଚିତ୍ରକର ସେବକମାନେ ରଥାଂଶକୁ  ଜୀବନ୍ତ କରିବାରେ ଲାଗିଛନ୍ତି । ରଥର  ଶୀଖରଡମ୍ବରୁ ଚିତ୍ର ସରିଛି । ରଥରେ  ଶୀଖରଡମ୍ବରୁ ଲାଗିଲେ ପାର୍ଶ୍ବ ଦେବତା  ସ୍ଥାପନା ହେବେ । ପ୍ରତି ରଥରେ ୯ଜଣ  କରି ପାର୍ଶ୍ବଦେବତା ବିଜେ କରିବେ ।  ପ୍ରଥମେ ପାର୍ଶ୍ବ ଦେବତା, ନାଟଗୋଡ଼,  ଶୀଖରଡମ୍ବରୁ, ସଖୀ ଚିତ୍ର କରାଯାଉଛି ।

ଏହାପରେ ହଂସପଟା, ଠେକରା  ବାଡ଼, କନ୍ୟାପଟାରେ ଚିତ୍ର କରାଯିବ ।  ଏପଟେ ରଥର ବିଭିନ୍ନ ଅଂଶ ରଙ୍ଗ  ଚାଲିଛି । ଓଝା ସେବକ, କରତି ଓ ଦର୍ଜୀ ସେବକମାନେ ନିଜ ନିଜ କାମରେ ବ୍ୟସ୍ତ  ରହିଛନ୍ତି । ଓଝା ସେବକମାନେ ଜଙ୍ଘା  କଣ୍ଟା ତିଆରି କରିଛନ୍ତି । ଏହି ବଡ଼ କଣ୍ଟା ସବୁ ରଥର ୧୩ ପରସ୍ତ ପୋଟଳରେ ଲାଗିବ ।

You Can Read :