ନୂଆଦିଲ୍ଲୀ: କେନ୍ଦ୍ର ସରକାର ଅଙ୍ଗ ଏବଂ ଟିସ୍ୟୁର ପ୍ରତିରୋପଣ ଏବଂ ଦାନକୁ ନେଇ ସାରା ଦେଶରେ ଗୋଟିଏ ନିୟମ ଆଣିବାକୁ ଲାଗୁ କରିବାକୁ ଯାଉଛନ୍ତି । ଅର୍ଥାତ ଏବେ ଦେଶରେ ଅର୍ଗାନ ଡୋନେସନ ଏବଂ ଟ୍ରାନ୍ସପ୍ଲାଣ୍ଟ ପାଇଁ ୱାନ୍ ନେସନ, ୱାନ୍ ପଲିସି ଲାଗୁ ହେବ । ସ୍ୱାସ୍ଥ୍ୟ ମନ୍ତ୍ରାଳୟ ଅନୁସାରେ ଏଥିପାଇଁ ସଚେତନ କରିବାକୁ ସବୁ ବୟସ ବର୍ଗର ପିଲାଙ୍କ ସ୍କୁଲ ପାଠ୍ୟକ୍ରମରେ ଗୋଟିଏ ବିଷୟ ପ୍ରସ୍ତୁତ କରାଯାଇଛି, ଯାହା ସବୁ ପିଲାଙ୍କ ପଢାଯିବ ।

ନୂଆ ନୀତି ଅନୁସାରେ କେନ୍ଦ୍ର ସରକାର ଜୋମିସାଇଲ ଆବଶ୍ୟକତାକୁ ହଟାଇବା ପାଇଁ ନିଷ୍ପତ୍ତି ନେଇଛନ୍ତି । ଏ ସମ୍ପର୍କରେ ସବୁ ରାଜ୍ୟକୁ ଅବଗତ କରାଯାଇଛି । ନୂଆ ନିୟମ ପରେ ଜଣେ ବ୍ୟକ୍ତି ଦେଶର ଯେକୌଣସି ସ୍ଥାନରେ ଅଙ୍ଗ ପାଇବା ପାଇଁ ପଞ୍ଜିକରଣ କରିପାରିବେ ଏବଂ ପ୍ରତିରୋପଣ ମଧ୍ୟ କରିପାରିବେ । ପୂର୍ବରୁ ରାଜ୍ୟ ଗୁଡିକର ଅର୍ଗାନ ଆବଣ୍ଟନ ନୀତିରେ ବ୍ୟକ୍ତିଙ୍କୁ ଅଙ୍ଗ ନେବା ପାଇଁ ଡୋମିସାଇଲର ଆବଶ୍ୟକତା ପଡୁଥିଲା । ଏବଂ ବ୍ୟକ୍ତି ଜଣଙ୍କ ନିଜ ରାଜ୍ୟରେ ହିଁ ଅର୍ଗାନ ନେବା ପାଇଁ ପଞ୍ଜିକରଣ କରିପାରୁଥିଲେ ।

ନୂଆ ନୀତିରେ କେନ୍ଦ୍ର ସରକାର ୬୫ ବର୍ଷର ବୟସସୀମା ଶେଷ କରିବାକୁ ନିଷ୍ପତ୍ତି ନେଇଛନ୍ତି । ବଞ୍ଚିବାର ଅଧିକାରରୁ ଦୃଷ୍ଟିରେ ରଖି ସରକାର ଏହି ନିଷ୍ପତ୍ତି ନେଇଛନ୍ତି । ବର୍ତ୍ତମାନ ଯେକୌଣସି ବୟସ ବର୍ଗର ବ୍ୟକ୍ତି ଅର୍ଗାନ ନେବା ପାଇଁ ପଞ୍ଜିକରଣ କରିପାରିବେ । ପୂର୍ବରୁ ନ୍ୟାସନାଲ ଅର୍ଗାନ ଆଣ୍ଡ ଟିସ୍ୟୁ ଟ୍ରାନ୍ସପ୍ଲାଣ୍ଟ ଅର୍ଗାନାଇଜେନ (ନୋଟୋ)ର ନିର୍ଦ୍ଦେଶ ଅନୁସାରେ ୬୫ ବର୍ଷରୁ ଅଧିକ ବୟସ୍କ ବ୍ୟକ୍ତିଙ୍କ ଅର୍ଗାନ ନେବା ଉପରେ ରୋକ ଲାଗିଥିଲା ।

ଏହା ପୂର୍ବରୁ କିଛି ରାଜ୍ୟ ଅର୍ଗାନ ନେବା ପାଇଁ ପଞ୍ଜିକରଣ ଫି ନେଉଥିଲେ । କିନ୍ତୁ ଏବେ ସରକାର ଏହାକୁ ତତ୍କାଳ ବନ୍ଦ କରିବା ପାଇଁ ନିର୍ଦ୍ଦେଶ ଜାରି କରିଛନ୍ତି । କିଛି ରାଜ୍ୟରେ ଅଙ୍ଗ ଆବଶ୍ୟକତା ଥିବା ବ୍ୟକ୍ତିଙ୍କ ଠାରୁ ୫୦୦୦-୧୦୦୦୦ ଟଙ୍କା ଯାଏ ଫି ନେଇଥାନ୍ତି ।