ଗହମ ମହଜୁଦ ରଖିବା ସୀମା ସ୍ଥିର କଲେ କେନ୍ଦ୍ର ସରକାର, ଏହି ପରିମାଣଠୁ ଅଧିକ ରଖିପାରିବେନି ବ୍ୟବସାୟୀ

Published By : Prameya-News7 Bureau | June 24, 2024 IST

ନୂଆଦିଲ୍ଲୀ: ଖାଦ୍ୟ ସୁରକ୍ଷାକୁ ଧ୍ୟାନରେ ରଖି କେନ୍ଦ୍ର ସରକାର ସୋମବାର ଗହମ ପାଇଁ ଷ୍ଟକ୍ ସୀମା ଲଗାଇଛନ୍ତି । ଏଣିକି କୌଣସି ପାଇକାରୀ ବିକ୍ରେତା, ଖୁଚୁରା ବ୍ୟବସାୟୀ ୩ ହଜାର କୁଇଣ୍ଟାଲରୁ ଅଧିକ ଗହମ ନିଜ ପାଖରେ ରଖିପାରିବେ ନାହିଁ । ଏହି ନିୟମ ସବୁ ରାଜ୍ୟ ଏବଂ କେନ୍ଦ୍ର ଶାସିତ ପ୍ରଦେଶରେ ଲାଗୁ ହେବ । ଏହି ନିଷ୍ପତ୍ତି ସରକାର ଗହମ କଳାବଜାରୀ ରୋକିବା ଏବଂ ୨୦୨୫ ଯାଏ ମୂଲ୍ୟ ସ୍ଥିର ରଖିବା ଏବଂ ଖାଦ୍ୟ ସୁରକ୍ଷା ସୁନିଶ୍ଚିତ କରିବା ପାଇଁ କରିଛନ୍ତି ।

କେନ୍ଦ୍ର ଖାଦ୍ୟ ସଚିବ ସଞ୍ଜୀବ ଚୋପ୍ରା କହିଛନ୍ତି ଯେ ଏହି ନିଷ୍ପତ୍ତି କଳାବଜାରୀକୁ ରୋକିବା, ଆମର ଲକ୍ଷ୍ୟ ଘରୋଇ ମାର୍କେଟରେ ଗହମର ଉପଲବ୍ଧତାକୁ ସୁନିଶ୍ଚିତ କରିବା ଏବଂ ମୂଲ୍ୟକୁ ସ୍ଥିର ରଖିବା । ସରକାର ଗହମ ଉପରେ ଲାଇସେନସିଂ ଆବଶ୍ୟକତା, ଷ୍ଟକ୍ ସୀମା ଏବଂ ପ୍ରତିବନ୍ଧକୁ ହଟାଇବା ଆଦେଶ ଜାରି କରିଛନ୍ତି, ଯାହା ୨୦୨୫ ମାର୍ଚ୍ଚ ୩୧ ଯାଏ ତତ୍କାଳ ପ୍ରଭାବୀ ହେବ ।

ଜଣେ ଅଧିକାରୀ କହିଛନ୍ତି ଯେ ନୂଆ ନିୟମ ଅନୁସାରେ ରିଟେଲ୍ ବିକ୍ରେତା ଏବଂ ଛୋଟ ଦୋକାନୀଙ୍କୁ ୧୦ ଟନ୍ ଯାଏ ଗହମ ମହଜୁଦ ରଖିପାରିବେ ।  ଅନ୍ୟପଟେ ବ୍ୟବସାୟୀ ଏବଂ ବଡ଼ ରିଟେଲର୍ସଙ୍କୁ ୩ ହଜାର ଟନ୍ ସୀମା ମାନିବାକୁ ପଡ଼ିବ । ପ୍ରୋସେସରଙ୍କ ପାଇଁ ଏହି ସୀମା ସେମାନଙ୍କ ମାସିକ କ୍ଷମତା (ଏମଆଇସି)ର ୭୦ ପ୍ରତିଶତକୁ ୨୦୨୪-୨୫ ଆର୍ଥିକ ବର୍ଷର ବଳକା ମାସ ସହ ଗୁଣା କରି ସ୍ଥିର କରାଯାଇଛି । 

ଅଧିକାରୀଙ୍କ ଅନୁସାରେ ଚଳିତ ରବି ଋତୁରେ ସରକାର ୨୬୬ ଲକ୍ଷ ମେଟ୍ରିକ୍ ଟନ୍ ଗହମ କିଣିଛନ୍ତି, ଯାହା ଆବଶ୍ୟକର ୧୮୮ ଲକ୍ଷ ମେଟ୍ରିକ୍ ଟନଠାରୁ ବହୁ ଅଧିକ ଅଟେ । କିନ୍ତୁ ଘରୋଇ ବଜାରରେ ମୂଲ୍ୟକୁ ସ୍ଥିର ରଖିବା ଏବଂ ଖାଦ୍ୟ ସୁରକ୍ଷାକୁ ସୁନିଶ୍ଚିତ କରିବା ପାଇଁ ସରକାର ଅଧିକା କିଣିଛନ୍ତି । ତଥାପି ଗହମ, ଚୀନ ଏବଂ ଅଣ-ବାସୁମତି ଚାଉଳ ରପ୍ତାନୀରୁ କଟକଣା ହଟାଇବାର କୌଣସି ଯୋଜନା ନାହିଁ ।

News7 Is Now On WhatsApp Join And Get Latest News Updates Delivered To You Via WhatsApp

Rath Yatra

Copyright © 2024 - Summa Real Media Private Limited. All Rights Reserved.