ନୂଆଦିଲ୍ଲୀ: ମଣିପୁର ହିଂସା ମାମଲାକୁ ନେଇ କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହ ଅଧିକ ତତ୍ପର ହୋଇଛନ୍ତି । ମଣିପୁର ରାଜ୍ୟପାଳଙ୍କ ଅଧ୍ୟକ୍ଷତାରେ ଏକ ଶାନ୍ତି କମିଟିର ଗଠନ କରିଛନ୍ତି । ଏହି କମିଟିରେ ମୁଖ୍ୟମନ୍ତ୍ରୀ ମଧ୍ୟ ସାମିଲ ଅଛନ୍ତି । ଗୃହ ମନ୍ତ୍ରାଳୟ ଅନୁସାରେ ଶାନ୍ତି କମିଟିର ସଦସ୍ୟଙ୍କ ମଧ୍ୟରେ ମୁଖ୍ୟମନ୍ତ୍ରୀ, ରାଜ୍ୟ ସରକାରଙ୍କ କିଛି ମନ୍ତ୍ରୀ, ସାଂସଦ, ବିଧାୟକ ଏବଂ ବିଭିନ୍ନ ପାର୍ଟିର ନେତା ସାମିଲ ଅଛନ୍ତି । ମନ୍ତ୍ରାଳୟ ଅନୁସାରେ କମିଟିରେ ପୂର୍ବତନ ଲୋକ ସେବା ଅଧିକାରୀ, ଶିକ୍ଷାବିତ୍, ସାହିତ୍ୟିକ, କଳାକାର, ସାମାଜିକ କର୍ମୀ ଏବଂ ବିଭିନ୍ନ ଜାତିର ପ୍ରତିନିଧି ସାମିଲ ଅଛନ୍ତି ।

ଉଲ୍ଲେଖଯୋଗ୍ୟ ଯେ ମଣିପୁର ହିଂସା ଥମିବାର ନାଁ ଧରୁ ନାହିଁ । ସଦ୍ୟତମ ମାମଲା ଖୋଖେନ ଗାଁକୁ ଆସିଛି । ଶୁକ୍ରବାର ଏଠାରେ ଯବାନଙ୍କ ପୋଷାକରେ ଆସିଥିବା ମଇତୀ ସମୁଦାୟର ଉଦ୍ରବାଦୀ କମ୍ୱିଂ ବାହାନାରେ ଗ୍ରମବାସୀଙ୍କୁ ଘରୁ ବାହାରକୁ ଡାକିଥିଲେ ଏବଂ ପରେ ଗୁଳି ମାଡ଼ କରିଥିଲେ । ଏଥିରେ ଜଣେ ମହିଳାଙ୍କ ସମେତ ତିନି ଜଣଙ୍କ ମୃତ୍ୟୁ ହୋଇଛି । ଘଟଣା ପରେ ସେନା, ପୋଲିସ ଏବଂ ଆସାମ ରାଇଫଲ୍ସର ଯବାନ ଦଙ୍ଗାକାରୀଙ୍କୁ ଖୋଜୁଛନ୍ତି ।

ମଣିପୁର ହିଂସାର ତଦନ୍ତ ସିବିଆଇ କରୁଛି । ସିବିଆଇ ବର୍ତ୍ତମାନ ସୁଦ୍ଧା ଛଅ ଏଫଆଇଆର ରୁଜୁ କରିଛି । ଏଥିରୁ ପାଞ୍ଚଟି ଅପରାଧିକ ଷଡଯନ୍ତ୍ରର ରହିଛି । ଅନ୍ୟପଟେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଶନିବାର ମଣିପୁର ଗସ୍ତ କରିବେ । ସେଠାରେ ସେ ମୁଖ୍ୟମନ୍ତ୍ରୀ ଏନ ବିରେନ ସିଂଙ୍କ ସହ ଅନ୍ୟ କିଛି ଜଣଙ୍କୁ ଭେଟିବେ ।