ନୂଆଦିଲ୍ଲୀ ୦୮।୦୯ : ଗୁରୁବାର ଉଦଘାଟିତ ହେବ ବହୁ ପ୍ରତୀକ୍ଷିତ ସେଣ୍ଟ୍ରାଲ ଭିଷ୍ଟା। ରାଜଧାନୀ ଦିଲ୍ଲୀର କିଛି ଖାସ ଭାଗକୁ ପୁନବିକାଶ କରାଯାଇଛି । ଯାହାକୁ ଲୋକାର୍ପଣ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ସେଣ୍ଟ୍ରାଲ ଭିଷ୍ଟା ଆଭେନ୍ୟୁର ରୂପ ବଦଳିଯାଇଛି। ରାଷ୍ଟ୍ରପତି ଭବନରୁ ଇଣ୍ଡିଆ ଗେଟ୍ ପର୍ଯ୍ୟନ୍ତ ରାଜପଥ କର୍ତ୍ତବ୍ୟପଥ ନାମର ପରିଚିତ ହେବ। ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ସଂଧ୍ୟାରେ ଉଦଘାଟନ କରିବେ। ସେହିପରି ଇଣ୍ଡିଆ ଗେଟ୍ ରେ ନେତାଜୀଙ୍କ ପ୍ରତିମୂର୍ତ୍ତି ଅବସ୍ଥାପିତ କରାଯିବ।
ସେଣ୍ଟ୍ରାଲ ଭିଷ୍ଟା ଆଭେନ୍ୟୁର ନୂଆ ଲୁକ୍। ତେବେ କଣ ଏହି ସେଣ୍ଟ୍ରାଲ ଭିଷ୍ଟା ଆଭେନ୍ୟୁ। ଏଥିରେ କଣ ରହିଛି ଆସନ୍ତୁ ଜାଣିବା। ଇଣ୍ଡିଆ ଗେଟରୁ ରାଷ୍ଟ୍ରପତି ଭବନ ଯାଏଁ ରାଜପଥରୁ ଦୁଇ ପଟ ଅଞ୍ଚଳ ସେଣ୍ଟ୍ରାଲ ଭିଷ୍ଟା ଆଭେନ୍ୟୁ ବୋଲି କୁହାଯାଏ। ଏଥିରେ ରାଷ୍ଟ୍ରପତି ଭବନ ଠାରୁ ଆରମ୍ଭ କରି, ସଂସଦ ଭବନ, ରକ୍ଷା ଭବନ, ଉଦ୍ୟୋଗ ଭବନ ଏମିତି ସରକାରଙ୍କ ବହୁ ଗୁରୁତ୍ବପୂର୍ଣ୍ଣ କେନ୍ଦ୍ରୀୟ କକ୍ଷ ରହିଛି। ଫେବ୍ରୁଆରି ୨୦୨୧ରେ ସେଣ୍ଟ୍ରାଲ ଭିଷ୍ଟାର ପୁନଃ ନିର୍ମାଣ ଆରମ୍ଭ ହୋଇଛି। ଯେଉଁଥିରେ ୩ ଲକ୍ଷ ୯୦ ହଜାର ସ୍କୋୟାରମିଟର ଗ୍ରିନେରୀ ରହିଛି। ଏହି ଇଲାକାରେ ମୋଟ ୧୬ କିଲୋମିଟର ରାସ୍ତାକୁ ନୂଆ କରି ତିଆରି କରାଯାଇଛି। ଯେଉଁଥିରେ ରେଡଷ୍ଟୋନ ବ୍ୟବହାର କରାଯାଇଛି। ସେଣ୍ଟ୍ରାଲ ଭିଷ୍ଟାରେ ୪ଟି କୋଠା ନୂଆ ଭାବରେ ନିର୍ମାଣ କରାଯାଇଛି - ସଂସଦ ଭବନ, ସେଣ୍ଟ୍ରାଲ ସେକ୍ରେଟାରିଏଟ୍, ପ୍ରଧାନମନ୍ତ୍ରୀ ଆବାସ ଏବଂ ଉପରାଷ୍ଟ୍ରପତି ଆବାସ।
ଇଣ୍ଡିଆ ଗେଟରୁ ରାଷ୍ଟ୍ରପତି ଭବନ ରାସ୍ତା ଯାହାକୁ ରାଜପଥ କୁହାଯାଉଛି ତାହାକୁ ଏବେ କର୍ତ୍ତବ୍ୟପଥ ଭାବେ ନାମିତ କରାଯିବ। ଜନ ସେବାରେ ସରକାରଙ୍କ କର୍ତ୍ତବ୍ୟକୁ ସ୍ମରଣ କରାଇଦେବା ଉଦ୍ଦେଶ୍ୟରେ ଏହାକୁ ଏଭଳି ନାମ କରଣ କରାଯାଇଛି। ସେହିପରି ଦୁଇପଟେ ଥିବା ଜଳାଶୟକୁ ମଧ୍ୟ ଖୁବ ସନ୍ଦର ଭାବେ ସଜାଯାଇଛି। ବିଶେଷ କରି ଲୋକେ ଚାଲିଚାଲି ଏହି ଅଞ୍ଚଳକୁ ବୁଲି ପାରିବେ। ଏଠାରେ ୧ ହଜାର କାର ୪୦ଟି ବସ ପାର୍କିଂ ପାଇଁ ବ୍ୟବସ୍ଥା ରହିବ। ଇଣ୍ଡିଆ ଗେଟ ନିକଟରେ ନେତାଜୀଙ୍କ ନୂଆ ପୂର୍ଣ୍ଣଅବୟବ ପ୍ରତିମୂର୍ତ୍ତିକୁ ଲଗାଯାଉଛି। ଜାନୁଆରୀ ୨୩ରେ ପ୍ରଧାନମନ୍ତ୍ରୀ ସେଠାରେ ନେତାଜୀଙ୍କ ହଲୋଗ୍ରାମର ଉନ୍ମୋଚନ କରିଥିବା ବେଳେ ନେତାଜୀଙ୍କ ପ୍ରତିମୂର୍ତ୍ତି ସେଠାରେ ଲଗାଯିବା ନେଇ ଘୋଷଣା କରିଥିଲେ। ୨୮ ଫୁଟର ଏହି ପ୍ରତିମୂର୍ତ୍ତିକୁ ଅରୁଣ ଯୋଗୀରାଜ ନିର୍ମାଣ କରିଛନ୍ତି।
