ଭୁବନେଶ୍ବର ୨୭।୩: ଭୁବନେଶ୍ବର ଜାଗମରା ସ୍ଥିତ ଓୟୋ ହୋଟେଲରେ ଦୁର୍ଗାପ୍ରସାଦଙ୍କ ମୃତ୍ୟୁ ଘଟଣାରେ ଛାନଭିନ୍ କରୁଛି ପୋଲିସ । ରବିବାର ଦୁର୍ଗାପ୍ରସାଦଙ୍କ ପ୍ରେମିକା ଓ ଦୁଇ ସାଙ୍ଗକୁ ପଚରାଉଚରା କରିଥିବା ବେଳେ ସୋମବାର ପୁଣି ଥରେ ପ୍ରେମିକା ଓ ଦୁଇ ସାଙ୍ଗକୁ ପଚରାଉଚରା କରିବ ପୋଲିସ ।

ହୋଟେଲରୁ ଜବତ ହୋଇଥିବା ସିସିଟିଭି ହାର୍ଡଡିସ୍କ ଓ ମୋବାଇଲକୁ ଫୋରେନସିକ୍ ଲ୍ୟାବକୁ ପଠାଯିବ । ପୋଲିସ ପୋଷ୍ଟମଟର୍ମ ରିପୋର୍ଟକୁ ଅପେକ୍ଷା କରିଥିବା ବେଳେ ଅପମୃତ୍ୟୁ ମାମଲା ରୁଜୁ କରି ତଦନ୍ତ କରୁଛି । ସେପଟେ ସମସ୍ତଙ୍କ ସିଡିଆର ରିପୋର୍ଟ ମଧ୍ୟ ଯାଞ୍ଚ କରୁଛି ପୋଲିସ । କିନ୍ତୁ ଦୁର୍ଗାପ୍ରସାଦଙ୍କ ପରିବାର ଲୋକେ ଏହାକୁ ଏକ ଷଡଯନ୍ତ୍ର ହତ୍ୟାକାଣ୍ଡ ବୋଲି ଅଭିଯୋଗ କରିଛନ୍ତି ।

ସୂଚନାଯୋଗ୍ୟ ଯେ, ରବିବାର ଦିନ ଖଣ୍ଡଗିରି ଥାନା ଅଞ୍ଚଳରେ ଥିବା ଏକ ଓୟୋ ହୋଟେଲରୁ ଦୁର୍ଗାପ୍ରସାଦ ମିଶ୍ର ନାମକ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଥିଲା । ଦୁର୍ଗାପ୍ରସାଦଙ୍କ ଘର କଟକ ନିଆଳି ଅଞ୍ଚଳରେ । ଦୁର୍ଗାପ୍ରସାଦ ଲିଙ୍ଗରାଜ ଥାନା ଅଧୀନରେ ଥିବା ଏକ ଭଡା ଘରେ ରହୁଥିଲେ । ଶନିବାର ରାତିରେ ନିଜ ବାନ୍ଧବୀ ଓ କିଛି ଯୁବତୀଙ୍କୁ ଆଣି ଓୟୋ ହୋଟେଲରେ ଜନ୍ମଦିନ ପାଳନ କରିଥିଲେ । ସେଠାରୁ ତାଙ୍କ ମୃତଦେହ ଠାବ ହୋଇଥିଲା । ଦୁର୍ଗାପ୍ରସାଦଙ୍କୁ ହତ୍ୟା କରାଯାଇଥିବା ପରିବାର ଲୋକ ଅଭିଯୋଗ ଆଣିଛନ୍ତି । ଦୁର୍ଗାପ୍ରସାଦ ଏକ ଘରୋଇ ସଂସ୍ଥାରେ ଚାକିରୀ କରୁଥିଲେ ।