ନୂଆଦିଲ୍ଲୀ: କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ମଙ୍ଗଳବାର ପ୍ରମାଣ ଅଭାବରେ ଏନଡିଟିଭିର ପୂର୍ବତନ ନିର୍ଦ୍ଦେଶକ ଏବଂ ପ୍ରମୋଟର ପ୍ରଣୟ ରୟ ଏବଂ ରାଧିକା ରୟଙ୍କ ବିରୋଧରେ ଥିବା ମାମଲା ବନ୍ଦ କରିଛି । ୨୦୧୭ ମସିହାରେ ସିବିଆଇ ଏହି ମାମଲା ରୁଜୁ କରିଥିଲା । ଉଭୟଙ୍କ ବିରୋଧରେ ଆଇସିଆଇସିଆଇ ବ୍ୟାଙ୍କକୁ ଜାଣିଶୁଣି ୪୮ କୋଟିରୁ ଅଧିକ ଟଙ୍କା କ୍ଷତି ପହଞ୍ଚାଇଥିବା ଅଭିଯୋଗ ରହିଥିଲା । ଏହି ମାମଲା ୨୦୦୯ ମସିହାରେ ରୟଙ୍କ ଦ୍ୱାରା ଆଇସିଆଇସିଆଇ ବ୍ୟାଙ୍କରୁ ନିଆଯାଇଥିବା ୪୮ କୋଟି ଟଙ୍କାର କଥିତ ଋଣ ଡିଫଲ୍ଟ ସହ ଜଡ଼ିତ ଥିଲା ।
ସିବିଆଇ ଏଫ୍ଆଇଆର୍ ଅନୁସାରେ ପ୍ରଣୟ ରୟ ଆର୍ଆର୍ପିଆର୍ ହୋଲ୍ଡିଂ ପ୍ରାଇଭେଟ୍ ନାମକ କମ୍ପାନି ପାଇଁ ନେଇଥିବା ଋଣକୁ ଡିଫଲ୍ଟ କରିଥିଲେ । ସିବିଆଇ ମାମଲା ରୁଜୁ କରିବା ପରେ ଇଡି ମଧ୍ୟ ଏହି ମାମଲାରେ ରୟଙ୍କ ବିରୋଧରେ ମାମଲା ରୁଜୁ କରିଥିଲା ।
କ୍ୱାଣ୍ଟନ ସିକ୍ୟୋରିଟିଜ ଲିମିଟେଡ୍ର ସଞ୍ଜୟ ଦତ୍ତଙ୍କ ଅଭିଯୋଗ ଆଧାରରେ ୨୦୧୭ରେ ଏକ ଏଫ୍ଆଇଆର୍ ରୁଜୁ କରିଥିଲା । ଏଥିରେ ଅଭିଯୋଗ ହୋଇଥିଲା ଯେ ରୟଙ୍କ ସହ ଜଡ଼ିତ କମ୍ପାନି ଆର୍ଆର୍ପିଆର୍ ହୋଲ୍ଡିଂ ପ୍ରାଇଭେଟ୍ ଏନଡିଟିଭରେ ୨୦ ପ୍ରତିଶତ ଅଂଶଧନ ହାସଲ କରିବା ପାଇଁ ଇଣ୍ଡିଆ ବୁଲ୍ସ ପ୍ରାଇଭେଟ୍ ଲିମିଟେଡରୁ ୫୦୦ କୋଟି ଟଙ୍କା ଋଣ ନେଇଥିଲା । ଏହା ମଧ୍ୟ ଅଭିଯୋଗ ହୋଇଥିଲା ଯେ ସେବି ଏବଂ ସୂଚନା ପ୍ରସାରଣ ମନ୍ତ୍ରଣାଳୟକୁ କୌଣସି ସୂଚନା ନଦେଇ ଋଣ ପାଇଁ ନିଜ ପୂରା ସେୟାରକୁ ବନ୍ଧକ ରଖିଥିଲେ ।
