ନୂଆଦିଲ୍ଲୀ, ୦୭/୦୨: ପୁଣି ସେହି ହୃଦୟବିଦାରକ ଘଟଣା। ସାମ୍ନାକୁ ଆସିଲା ହିଟ୍ ଆଣ୍ଡ୍‌ ଡ୍ରାଗ୍‌ର ଆଉ ଏକ ଘଟଣା। ଧକ୍କା ଦେବା ପରେ ବ୍ୟକ୍ତିଙ୍କୁ ଘୋଷାଡ଼ି ନେଲା କାର୍। ଏଭଳି ଘଟଣା ଘଟିଛି ଉତ୍ତରପ୍ରଦେଶ ଯମୁନା ଏକ୍ସପ୍ରେସଓ୍ବେରେ। ଏଠାରେ ଏକ କାର୍‌ ଜଣେ ବ୍ୟକ୍ତିଙ୍କୁ ଘୋଷାଡ଼ି ଘୋଷାଡ଼ି ନେଇଥିଲା। ତାହାବି ପୁଣି ୧୦ କିମି। ଫଳରେ ବ୍ୟକ୍ତିଙ୍କର ମୃତ୍ୟୁ ହୋଇଛି। ସେପଟେ ପୋଲିସ୍‌ ଏହି ମାମଲାରେ କାର୍‌ ଚାଳକଙ୍କୁ ଅଟକ ରଖି ତଦନ୍ତ ଜାରି ରଖିଛି।

ସୂଚନା ଅନୁଯାୟୀ, କାର୍‌କୁ ଦିଲ୍ଲୀର ବିରେନ୍ଦ୍ର ସିଂହ ନାମକ ଜଣେ ଯୁବକ ଚଳାଉଥିଲେ। ବିରେନ୍ଦ୍ର ଆଗ୍ରାରୁ ନୋଏଡା ଆସୁଥିଲେ। ତେବେ ମଥୁରା ନିକଟରେ ଏକ ଟୋଲ୍‌ ଗେଟ୍‌ଠାରେ ଜଣେ ସୁରକ୍ଷାକର୍ମୀଙ୍କ ନଜର କାର୍‌ରେ ଲାଖିରହିଥିବା ବ୍ୟକ୍ତିଙ୍କ ଉପରେ ପଡ଼ିଥିଲା। ସେତେବେଳକୁ ବ୍ୟକ୍ତିଙ୍କ ଖଣ୍ଡବିଖଣ୍ଡିତ ଶରୀର ଝୁଲି ରହିଥିଲା କାର୍‌ରେ। ଯାହାପରେ ପୋଲିସ୍‌କୁ ଖବର ଦିଆଯାଇଥିଲା। ପୋଲିସ୍‌ ବିରେନ୍ଦ୍ରଙ୍କୁ ଅଟକ ରଖିଛି।

‘‘ଅଧିକ କୁହୁଡ଼ି କାରଣରୁ ଦୁର୍ଘଟଣା ହୋଇଥିବା ବ୍ୟକ୍ତି କିପରି ଫସିରହିଥିଲେ ତାହା ସେ ଜଣାପାରିନଥିବା ବୋଲି ବିରେନ୍ଦ୍ର କହିଥିବା ନେଇ ସୂଚନା ଦେଇଛନ୍ତି ପୋଲିସ୍‌ ସୁପରିଟେଣ୍ଡେଣ୍ଟ। ତେବେ ବିରେନ୍ଦ୍ର ସିଂହଙ୍କୁ ଅଧିକ ପଚରା ଉଚରା କରାଯାଉଛି। ସିସିଟିଭି ଭିଡିଓ କ୍ୟାମେରା ସ୍କାନ୍ କରାଯାଉଛି। ଆଖ ପାଖ ଅଞ୍ଚଳରେ ବ୍ୟକ୍ତିଙ୍କ ପରିଚୟ ଜାଣିବା ପାଇଁ ଚେଷ୍ଟା କରାଯାଉଛି। ଅଧିକ ସୂଚନା ପାଇଁ ପୋଲିସ ତଦନ୍ତ କରୁଥିବା ନେଇ କହିଛି ପୋଲିସ୍‌।

ଏହି ଘଟଣା ପୁଣି ଥରେ ଦିଲ୍ଳୀ କାଞ୍ଝାଓ୍ବାଲା ଘଟଣାକୁ ମନେପକାଇଛି। କାଞ୍ଝାଓ୍ବାଲାରେ ୧ ଜାନୁଆରୀରେ ଘଟିଥିବା ଘଟଣା ସାରା ଦେଶକୁ ଚକିତ କରିଥିଲା। ଯେଉଁଠାରେ ଅଞ୍ଜଳି ନାମକ ଜଣେ ୨୦ ବର୍ଷୀୟ ଯୁବତୀଙ୍କୁ ସ୍କୁଟିରେ ଯାଉଥିବା ସମୟରେ ଏକ ଗାଡ଼ି ଧକ୍କା ଦେଇଥିଲା ଏବଂ ତାଙ୍କୁ ଘୋଷାଡ଼ି ଘୋଷାଡ଼ି ନେଇଯାଇଥିଲା। ଯେଉଁଥିରେ ତାଙ୍କର ମୃତ୍ୟୁ ହୋଇଥିଲା। ଏହି ଘଟଣାରେ କାର୍‌ରେ ଥିବା ୫ଜଣଙ୍କ ସହ ସମୁଦାୟ ସାତ ଜଣକୁ ଗିରଫ କରାଯାଇଥିଲା।