ନୂଆଦିଲ୍ଲୀ ୧୨।୦୭: କର୍କଟ ଏବେ ସବୁଠାରୁ ଗୁରୁତର ରୋଗ ଭାବେ ଉଭା ହୋଇଛି, ଯାହାର ଲକ୍ଷଣ ଆରମ୍ଭରୁ ଜଣା ନ ପଡିବା ହିଁ ଘାତକ ସାବ୍ୟସ୍ତ ହେଉଛି। କର୍କଟ ଶରୀରର ଯେକୌଣସି ଅଙ୍ଗରୁ ଆରମ୍ଭ ହେଲେ ମଧ୍ୟ କ୍ରମଶଃ ସାରା ଶରୀରକୁ ଆକ୍ରାନ୍ତ କରିଥାଏ । ସେଥିପାଇଁ ଏବେ ସାରା ବିଶ୍ୱରେ କର୍କଟ ଆକ୍ରାନ୍ତଙ୍କ ମୃତ୍ୟୁହାର ସର୍ବାଧିକ । ଏମିତି କିଛି କର୍କଟ ରହିଛି, ଯାହା ମହିଳା ନୁହେଁ କେବଳ ପୁରୁଷଙ୍କୁ ହିଁ ପ୍ରଭାବିତ କରିଥାଏ । ଏହା ମଧ୍ୟରେ ରହିଛି ପ୍ରୋଷ୍ଟେଟ୍ କର୍କଟ, ଅଣ୍ଡକୋଷ କର୍କଟ, ଚର୍ମ କର୍କଟ, ମୁଖ ଗହ୍ୱର କର୍କଟ ଓ ଫୁସ୍ଫୁସ୍ କର୍କଟ । ଚାଲନ୍ତୁ ଜାଣିବା ଏସବୁ କର୍କଟର ପ୍ରମୁଖ ଲକ୍ଷଣ ବିଷୟରେ । ପ୍ରୋଷ୍ଟେଟ୍ କର୍କଟ ପୁରୁଷଙ୍କଠାରେ ହେଉଥିବା ସବୁଠାରୁ ସାଧାରଣ କର୍କଟ । ଏହା ପ୍ରୋଷ୍ଟେଟ୍ ନାମକ ଗ୍ରନ୍ଥିରେ ହେଉଥିବା କର୍କଟ, ଯାହା ଟେଷ୍ଟୋଷ୍ଟେରେନ୍ ହର୍ମୋନ୍ ଓ ଶୁକ୍ରାଣୁ ଉତ୍ପାଦନ ପାଇଁ ଦାୟୀ । ଏହି କର୍କଟ ହେବା ଦ୍ୱାରା ପ୍ରୋଷ୍ଟେଟ୍ର କୋଷିକାଗୁଡିକ ଅସାମାନ୍ୟ ଭାବେ ବୃଦ୍ଧି ପାଇଥାନ୍ତି, ଯାହା ସମୟକ୍ରମେ ଟ୍ୟୁମର୍ରେ ପରିବର୍ତ୍ତତ ହୋଇଥାଏ । ଏହାର ପ୍ରମୁଖ ଲକ୍ଷଣ ହେଉଛି ପରିସ୍ରା ହେବାରେ ସମସ୍ୟା ହେବା, ପରିସ୍ରାରେ ରକ୍ତ ଆସିବା ଓ ହାଡ଼ରେ ଯନ୍ତ୍ରଣା ହେବା ସମସ୍ୟା ଦେଖା ଦେଇଥାଏ ।
ଅଣ୍ଡକୋଷ କର୍କଟ
ପୁରୁଷଙ୍କ ଅଣ୍ଡକୋଷର କୋଷିକାମାନେ ଅସାମାନ୍ୟ ଭାବେ ବୃଦ୍ଧି ପାଇଲେ, ଏହାକୁ ଅଣ୍ଡକୋଷ କର୍କଟ କୁହାଯାଏ । ସଚେତନତା ଅଭାବରୁ ଏହି କର୍କଟ ଅନେକ ସମୟରେ ଘାତକ ସାବ୍ୟସ୍ତ ହୋଇଥାଏ । ଆରମ୍ଭରୁ ଏହି କର୍କଟ ଚିହ୍ନଟ ହେଲେ ଚିକିତ୍ସା ସମ୍ଭବ । ଏହାର ଲକ୍ଷଣ ମଧ୍ୟରେ ରହିଛି ଅଣ୍ଡକୋଷ ଭାରି ଲାଗିବା, ଯନ୍ତ୍ରଣା ହେବା ଓ ଅଣ୍ଡକୋଷ ମୋଡି ହେବା ଆଦି ।
ଚର୍ମ କର୍କଟ
ଏହା କେତେକ କ୍ଷେତ୍ରରେ ପୁରୁଷଙ୍କଠାରେ ହିଁ ଦେଖା ଦେଇଥାଏ । ଅନେକ ସମୟରେ ତ୍ୱଚାରେ ଥିବା କଳାଜାଇ ବା ଭାତୁରିର ଆକାରରେ ପରିବର୍ତ୍ତନ ଆସିଥାଏ । ସେହି ସ୍ଥିତିରେ ଡାକ୍ତର ବାୟୋପ୍ସି ପାଇଁ ପରାମର୍ଶ ଦେଇଥାନ୍ତି । ଏହା ମହିଳାଙ୍କ ଅପେକ୍ଷା ପୁରୁଷଙ୍କଠାରେ ଅଧିକ ଦେଖା ଦେଇଥାଏ ।
ମୁଖ ଗହ୍ୱର କର୍କଟ
ଧୂମପାନ ବା ତମ୍ବାଖୁ ଖାଉଥିବା ପୁରୁଷଙ୍କଠାରେ ମୁଖ ଗହ୍ୱର କର୍କଟର ଆଶଙ୍କା ଅଧିକ । ଏହି କର୍କଟ ହେଲେ ଓଠରେ ଧଳା, ଲାଲ୍ ବା ହଳଦିଆ ରଙ୍ଗର ଚିହ୍ନ ଦେଖା ଦେଇଥାଏ । ସମୟ କ୍ରମେ ଏହା ଅଲସରର ରୂପ ନେଇଥାଏ । ଆରମ୍ଭରୁ ଚିହ୍ନଟ ହେଲେ ଏହାର ଚିକିତ୍ସା ସମ୍ଭବ । ରକ୍ତ ପରୀକ୍ଷା ଦ୍ୱାରା ଏହି କର୍କଟ ଚିହ୍ନଟ କରାଯାଇଥାଏ ।
ଫୁସ୍ଫୁସ୍ କର୍କଟ
କାଶ ପଛରେ ଅନେକ କାରଣ ରହିଥାଏ । କିନ୍ତୁ ଯଦି କାଶ ଧୀର୍ଘଦିନ ଧରି ରହିଥାଏ, ତେବେ ଫୁସ୍ଫୁସ୍ କର୍କଟ ହେବାର ଆଶଙ୍କା ସୃଷ୍ଟି ହୋଇଥାଏ । ଯଦି କାଶ ଓ ଶ୍ୱାସଜନିତ ସମସ୍ୟା ୪ ସପ୍ତାହ ଯାଏ ଲାଗି ରହେ, ତେବେ ଫୁସ୍ଫୁସ୍ କର୍କଟର ଆଶଙ୍କା ସୃଷ୍ଟି ହୋଇଥାଏ । ତେଣୁ ତୁରନ୍ତ ଏହାର ଯାଞ୍ଚ କରିବା ପାଇଁ ଡାକ୍ତର ପରାମର୍ଶ ନେବା ଆବଶ୍ୟକ । ଡାକ୍ତର ଏକ୍ସରେ କରିବା ପାଇଁ ପରାମର୍ଶ ଦେଇଥାନ୍ତି ।
