ବୌଦ୍ଧ ୫।୩: ରାଜ୍ୟରେ ମାର୍ଚ୍ଚ ପହିଲାରୁ ଟ୍ରାଫିକ୍ ନିୟମ ପୁଣି ଥରେ କଡା କଡି କରାଯାଇଛି । ଏହି ପରିପ୍ରେକ୍ଷୀରେ ସାରା ରାଜ୍ୟରେ ଟ୍ରାଫିକ୍ ଚେକିଂକୁ ମଧ୍ୟ ଜୋରଦାର କରାଯାଇଛି । ମୋଟା ଅଙ୍କର ଫାଇନ୍ ମଧ୍ୟ ଆଦାୟ କରାଯାଉଛି ।
ବୌଦ୍ଧ ଜିଲ୍ଲାରେ ଟ୍ରାଫିକ ନିୟମ କଡାକଡି ହେବା ପରେ ଗୁରୁବାର ଏକ ବସକୁ ୬ ଲକ୍ଷ ୭୨ ହଜାର ଟଙ୍କାର ଫାଇନ୍ ଲାଗିଛି । ଟ୍ରାଫିକ ନିୟମ ଉଲଂଘନ ଅଭିଯୋଗରେ 'ମୀନାର' ନାମକ ଏକ ଘରୋଇ ବସରୁ ୬ ଲକ୍ଷ ୭୨ ହଜାର ୪୪୫ ଟଙ୍କାର ଚାଲାଣ କାଟିଛନ୍ତି ବୌଦ୍ଧ ଜିଲ୍ଲା ଆରଟିଓ । ଏହି ବସଟି ଭୁବନେଶ୍ୱରରୁ ବୌଦ୍ଧ ଯାତାୟତ କରୁଥିଲା । ତେବେ ଆରଟିଓଙ୍କ ଠାରୁ ମିଳିଥିବା ସୂଚନା ଅନୁସାରେ 'ମୀନାର' ବସ୍ ୫ଟି ଟ୍ରାଫିକ ନିୟମ ଉଲଂଘନ କରିଛି । ବସ୍ ଟି ବିନା ରେଜିଷ୍ଟ୍ରସନରେ ଚାଲୁଥିଲା । ଏଥିପାଇଁ ୫ହଜାର ଟଙ୍କାର ଚାଲାଣ କଟିଛି । ବସ୍ ର ରୁଟ୍ ପରମିଟ୍ ନଥିବାରୁ ୧୦ହଜାର ଟଙ୍କା ଫାଇନ୍ ଲାଗିଛି । ବସ୍ ର ଇନସ୍ୟୁରାନ୍ସ ନଥିବାରୁ ୨ହଜାର ଟଙ୍କାର ଫାଇନ୍ ଲାଗିଛି । ୨୦୧୮ ମସିହାରୁ ୨୦୨୦ ମସିହା ମଧ୍ୟରେ ବସର ଟ୍ୟାକ୍ସ ଫାଇନ-୬ ଲକ୍ଷ ୫୪ ହଜାର ୯୪୫ ଟଙ୍କା ଲାଗିଛି । ଏପରି ଭାବରେ ବସର ସମୁଦାୟ ଫାଇନ ୬ ଲକ୍ଷ ୭୨ ହଜାର ୪୪୫ ଟଙ୍କା ହୋଇଛି । ଚଳିତ ମାସ ୧ ତାରିଖରୁ ଟ୍ରାଫିକ ନିୟମ କଡାକଡି ହୋଇଥିବା ବେଳେ ବୌଦ୍ଧ ଆରଟିଓ ଆକ୍ଟିଭ ମୋଡରେ ଅଛନ୍ତି ।
ଟ୍ରାଫିକ୍ ନିୟମ ଉଲଂଘନ କଲେ ଦୃଢ କାର୍ଯ୍ୟାନୁଷ୍ଠାନ ନିଆଯାଉଛି । ସେହିପରି ଟ୍ରିପଲ ଡ୍ରାଇଭିଂ, ବିନା ହେଲମେଟ, ସିଟ୍ ବେଲ୍ଟ ନ ବାନ୍ଧିବା, ଦ୍ରୁତ ଗତିରେ ଗାଡି ଚାଳନା, ବିନା ବୀମା ଓ ଗାଡି କାଗଜପତ୍ର ନ ଥିବା ଗାଡି ଚାଳକଙ୍କଠାରୁ ଜରିମନା ଆଦାୟ କରାଯାଉଛି ।
ସୂଚନାଯୋଗ୍ୟ ଯେ, ସରକାର ଦେଇଥିବା ୬ମାସ ଟ୍ରାଫିକ୍ ନିୟମ କୋହଳ ଅବଧି ଶେଷ ହୋଇଯାଇଛି । ଡ୍ରାଇଭିଂ ଲାଇସେନ୍ସ, ଇନସ୍ୟୁରାନ୍ସ, ପ୍ରଦୂଷଣ ସାର୍ଟିଫିକେଟ୍, ଫିଟନେସ୍, ପରମିଟ୍ ଭଳି କାଗଜପତ୍ର ତିଆରି କରିବା ଲାଗି କଣ୍ଟ ମାର୍ଚ୍ଚ ପହିଲାରୁ ଶେଷ ହୋଇଛି । ଯେଉଁ ଗାଡ଼ି ଚାଳକ ନିୟମ ଉଲ୍ଲଂଘନ କରୁଛନ୍ତି କିମ୍ବା ଆବଶ୍ୟକ କାଗଜପତ୍ର ରଖି ନ ଥିବେ, ସେମାନଙ୍କଠାରୁ ମୋଟା ଅଙ୍କର ଜରିମାନା ଆଦାୟ କରାଯାଉଛି। ଗତ ସେପ୍ଟେମ୍ବର ପହିଲାରେ ଦେଶରେ ସଂଶୋଧିତ ମୋଟରଯାନ ଆଇନ ଲାଗୁ ହୋଇଥିଲା।
