ନୂଆଦିଲ୍ଲୀ: ଚଳିତ ଥର ଭଲ ବର୍ଷା ଏବଂ ରବି ଋତୁରେ ସଫଲ ଅନୁକୂଳ ପରିବେଶ ଯୋଗୁଁ ଚଳିତ ସଫଲ ବର୍ଷ ୨୦୨୨-୨୩ରେ ପ୍ରଚୁର ମାତ୍ରାରେ ଖାଦ୍ୟାନ୍ନ ଉତ୍ପଦାନ ନେଇ ଅନୁମାନ କରାଯାଉଛି । ଚଳିତ ଥର ୩୨.୩୬ କୋଟି ଟନ ମୋଟ ଖାଦ୍ୟ ଉତ୍ପାଦନ ହେବ, ଯାହା ପୂର୍ବ ଥରର ୩୧.୫୬ କୋଟି ଟନ ତୁଳନାରେ ୮୦ ଲକ୍ଷ ଟନ ଅଧିକ ରହିବ । ରବି ଋତୁର ପ୍ରମୁଖ ସଫଲ ଗହମ ରେକର୍ଡ ୧୧.୨୨ କୋଟି ଟନ ଉତ୍ପାଦନ ହେବ ବୋଲି ଅନୁମାନ କରାଯାଉଛି ।

ରବି ଋତୁରେ ରୋଗ ପ୍ରକୋପ କମ ରହିବା କାରଣରୁ ତୈଳ ଜାତୀୟ ଶସ୍ୟର ମୋଟ ଉତ୍ପାଦନ ଚାରି କୋଟି ଟନ ରହିବା ନେଇ ଅନୁମାନ କରାଯାଉଛି । ଏଥିରୁ କେବଳ ସୋରିଷର ଉତ୍ପାଦନ ୧.୨୮ କୋଟି ଟନ ରହିବ । ମଙ୍ଗଳବାର କୃଷି ମନ୍ତ୍ରାଳୟ ଦ୍ୱିତୀୟ ଅଗ୍ରୀମ ଅନୁମାନ ଜାରି କରିଛି । କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର ଫସଲର ରେକର୍ଡ ଉତ୍ପାଦନ ପାଇଁ କୃଷକ ଏବଂ ବୈଜ୍ଞାନିକଙ୍କ ପରିଶ୍ରମ ସହ ସରକାରୀ ନୀତିକୁ ଶ୍ରେୟ ଦେଇଛନ୍ତି ।

ଗତ ବର୍ଷ ରବି ଋତୁରେ ଗହମ ପାଚିବା ସମୟରେ ହଠାତ୍ ତାପମାତ୍ରା ବଢିବା କାରଣରୁ ଏହାର କୁପ୍ରଭାବ ଫସଲ ଉପରେ ପଡ଼ିଥିଲା । ଫଳରେ ମୋଟ ଉତ୍ପାଦନ ୬ରୁ ୧୦ ପ୍ରତିଶତ ହ୍ରାସ ପାଇଥିଲା । କିନ୍ତୁ ଫେବ୍ରୁଆରୀର ପ୍ରଥମାର୍ଦ୍ଧରେ ତାପମାତ୍ରା ଗହମ ପାଇଁ ଅନୁକୂଳ ରହିଥିଲା, ଆଗକୁ ମଧ୍ୟ ପାଗ ଅନୁକୂଳ ରହିବାର ଅନୁମାନ ରହିଛି । କୃଷି ମନ୍ତ୍ରାଳୟ ଅନୁସାରେ ମୋଟ ଗହମ ଉତ୍ପାଦନ ଆଜି ଯାଏର ସର୍ବାଧିକ ୧୧.୨୨ କୋଟି ଟନ ରହିବ । ସେହିପରି ଚଳିତ ରବି ଋତୁରେ ଧାନ ଉତ୍ପାଦନ ୧୩.୦୮ କୋଟି ଟନ ରହିବ ।