ନୂଆଦିଲ୍ଲୀ : କେରଳର ବନ୍ଦର ସହର କୋଚିର ବ୍ରହ୍ମପୁରମରେ ଥିବା ଅଳିଆ କାରଖାନା ଲାଗିଥିବା ନିଆଁ ଆଜି ବି ଆୟତ୍ତ ହୋଇ ପାରି ନାହିଁ । ଜଳୁଥିବା ଅଳିଆରୁ ବିଷାକ୍ତ ଗ୍ୟାସ ନିର୍ଗତ ହେବାରେ ଲାଗିଛି । ଏହି ଧୂଆଁ ଏବେ ଧୀରେ ଧୀରେ ପୂରା ସହର ଏବଂ କାରଖାନାକୁ କବଳିତ କରିଛି । ଶ୍ୱାସକ୍ରିୟାରେ ଲୋକଙ୍କୁ ଅସୁବିଧା ହେବାରେ ଲାଗିଛି । ଧୂଆଁ କାରଣରୁ ଲୋକଙ୍କ ଆଖି ଜଳୁଥିବା ଅଭିଯୋଗ ହୋଇଛି । ସୋସିଆଲ ମିଡିଆରେ ଲୋକେ ଏବେ ଏହାକୁ ନେଇ ଅଭିଯୋଗ କରିଛନ୍ତି ।

କେରଳ ହାଇକୋର୍ଟର ଜଷ୍ଟିସ୍ ଏସଭି ଭଟ୍ଟି ଏବଂ ବସନ୍ତ ବାଲାଜୀ କେରଳ ସରକାର ଏବଂ ପ୍ରଶାସନକୁ କଡ଼ା ଶବ୍ଦରେ ଭର୍ସନା କରିଛନ୍ତି । କହିଛନ୍ତି ଯେ ସହର ଗ୍ୟାସ ଚାମ୍ୱର ହୋଇଯାଇଛି । କୋଚିବାସୀ ଏହି ଚାମ୍ୱରରେ ଫସି ରହିଛନ୍ତି । ଅତିଶୀଘ୍ର ଏହି ନିଆଁକୁ ଲିଭାଇବା ପାଇଁ ମଧ୍ୟ ନିର୍ଦ୍ଦେଶ ଦେଇଛନ୍ତି । ଏହି ସ୍ଥିତି ଏପରି ସମୟରେ ହୋଇଛି, ଯେତେବେଳେ ସହରରେ ଅନ୍ୟ କୌଣସି ଫ୍ୟାକ୍ଟ୍ରି ହିଁ ନାହିଁ । ହାଇଦ୍ରାବାଦ ଏବଂ ସିକନ୍ଦରାବାଦ ପରି ଶିଳ୍ପ ସହରରେ ଏପରି ସ୍ଥିତି ହେଉ ନାହିଁ, ତେବେ ଏଠାରେ ଏପରି କାହିଁକି ବୋଲି ପ୍ରଶ୍ନ କରିଛନ୍ତି ।

କୋର୍ଟ ଏହା ସହ କୋଚି କର୍ପୋରେସନର ସଚିବ ଏବଂ କେରଳ ପଲ୍ୟୁସନ କଣ୍ଟ୍ରୋଲ ବୋର୍ଡର ଅଧ୍ୟକ୍ଷଙ୍କୁ ସ୍ଥିତି ଉପରେ ନିୟନ୍ତ୍ରଣ ପାଇବା ପାଇଁ ନିର୍ଦ୍ଦେଶ ଦେଇଛନ୍ତି । ଏହା ସହ ମଣିଷର ଭୁଲ ଯୋଗୁଁ ଏହି ନିଆଁ ଲାଗିଛି କି ବୋଲି କୋର୍ଟ ପଚାରିଛନ୍ତି । ପ୍ରଦୂଷଣ ନିୟନ୍ତ୍ରଣ ବୋର୍ଡ ଦ୍ୱାରା ଦାଖଲ କରାଯାଇଥିବା ଦସ୍ତାବିଜରୁ ଜଣାପଡୁଛି ଯେ ସତ ବାସ୍ତବଠାରୁ ବହୁ ଦୂରରେ ରହିଛି । କୋଚିରେ ଜୁନ୍ ୬ ପୂର୍ବରୁ ଅଳିଆର ସଠିକ୍ ପରିଚାଳନା ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି ।

ବ୍ରହ୍ମପୁରମ ଅଳିଆ ପ୍ଲାଣ୍ଟରେ ଲାଗିଥିବା ନିଆଁ ଲିଭା କାର୍ଯ୍ୟରେ ଅଗ୍ନିଶମ ବାହିନୀର ୩୦ ଟ୍ୟାଙ୍କର, ନୌସେନାର ହେଲିକପ୍ଟର୍ସ ଏବଂ ଯବାନ ନିୟୋଜିତ ଅଛନ୍ତି । କିନ୍ତୁ ସ୍ଥିତି ଆୟତ୍ତ ହେଉ ନାହିଁ । ପୂରା ସହରରେ ଧୂଆଁମୟ ହୋଇ ରହିଛି ।

ନିଆଁ ଲାଗିବା ପରେ ସହରରେ ବାୟୁ ଗୁଣବତ୍ତା ସୂଚକାଙ୍କ

ମାର୍ଚ୍ଚ ୨   ୧୦୩ (AQI)

ମାର୍ଚ୍ଚ ୪   ୧୮୬ (AQI)

ମାର୍ଚ୍ଚ ୫   ୧୮୪ (AQI)

ମାର୍ଚ୍ଚ ୬   ୧୪୮ (AQI)

ମାର୍ଚ୍ଚ ୭   ୨୧୫ (AQI)

ମାର୍ଚ୍ଚ ୮ ୧୫୮ (AQI)