ଉତ୍ତରପ୍ରଦେଶ ୧୩/୦୫: ଜୀବନ ନେଲା ନୁଡଲ୍ସ । ଜଣେ ୧୨ ବର୍ଷର ପିଲାର ମୃତ୍ୟୁ ହୋଇଥିବା ବେଳେ ୬ ଜଣ ଗୁରୁତର ହୋଇଛନ୍ତି । ଉତ୍ତରପ୍ରଦେଶର ପିଲିଭିଟରେ ଘଟିଛି ଏମିତି ଘଟଣା । କୁହାଯାଉଛି ଯେ ଫୁଡ୍ ପଏଜନ କାରଣରୁ ଏପରି ହୋଇଛି । ଖାଦ୍ୟ ଖାଇବା ପରେ ଜଣଙ୍କର ମୃତ୍ୟୁ ହୋଇଥିବା ବେଳେ ପରିବାରର ଅନ୍ୟ  ସଦସ୍ୟମାନେ ଅସୁସ୍ଥ ହୋଇପଡିଥିଲେ । ସେପଟେ କିନ୍ତୁ ଫୁଡ୍ ଡିପାର୍ଟମେଣ୍ଟର ଅଧିକାରୀମାନେ ଏହାକୁ ଅସ୍ୱୀକାର କରିଛନ୍ତି ।  

ସୂଚନା ଥାଉକି, ଗୁରୁବାର ରାତିରେ ପୁରାଣପୁର ଅଞ୍ଚଳରେ ନୁଡୁଲ୍ସ ଏବଂ ଭାତ ଖାଇବା ପରେ ତିନି ପିଲାଙ୍କ ସମେତ ପରିବାରର ମୋଟ ୬ ଜଣ ସଦସ୍ୟ ଅସୁସ୍ଥ ହୋଇପଡିଥିଲେ। ସେମାନଙ୍କୁ ନିକଟସ୍ଥ ଘରୋଇ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । 

ପରଦିନ ତାଙ୍କ ଅବସ୍ଥା ସୁଧାରିବା ପରେ ଘରକୁ ଫେରିଥିଲେ ମଧ୍ୟ ସେହିଦିନ ରାତିରେ ସେ ପୁଣି ଅସନ୍ତୋଷ ଅନୁଭବ କରିବାକୁ ଲାଗିଲେ ବୋଲି ଜଣାପଡିଛି । ଚିକିତ୍ସା କରୁଥିବା ଡାକ୍ତରଙ୍କ କହିବା କଥା ଯେ ୧୨ ବର୍ଷର ପିଲା ରୋହନଙ୍କ ଅବସ୍ଥା ବିଗିଡି ଯାଇଥିଲା । କିଛି ସମୟ ପରେ ତାଙ୍କର ମୃତ୍ୟୁ ହୋଇଥିଲା । 

କମ୍ୟୁନିଟି ହେଲ୍ଥ ସେଣ୍ଟର (CHC) ର ଡାକ୍ତର କହିଛନ୍ତି, 'ଖାଦ୍ୟ ବିଷାକ୍ତ ଅଭିଯୋଗରେ ଶନିବାର ଏଠାରେ ୫ ଜଣଙ୍କୁ ଭର୍ତ୍ତି କରାଯାଇଥିଲା। ତେବେ ଜଣେ ନାବାଳିକାର ଅବସ୍ଥା ଗୁରୁତର ଥିବାରୁ ତାଙ୍କୁ ନିକଟସ୍ଥ ବରେଲି ଜିଲ୍ଲାର ଏକ ଡାକ୍ତରଖାନାକୁ ପଠାଯାଇଛି । ପ୍ରଥମେ ଏହି ଘଟଣାର ଅନୁସନ୍ଧାନ କରିଥିବା ଆସିଷ୍ଟାଣ୍ଟ କମିଶନର୍ ଫୁଡ୍ (୨) ଶଶାଙ୍କ ତ୍ରିପାଠୀ କହିଛନ୍ତି ଯେ ପରିବାର ନିକଟସ୍ଥ ସାଧାରଣ ଦୋକାନରୁ କିଣାଯାଇଥିବା ଏକ ନିର୍ଦ୍ଦିଷ୍ଟ ବ୍ରାଣ୍ଡର ନୁଡୁଲ୍ସ ଖାଇଥିଲେ । ଅନ୍ୟ କେତେକ ଲୋକ ମଧ୍ୟ ସମାନ ବ୍ରାଣ୍ଡର ନୁଡୁଲ୍ସ କିଣିଥିଲେ କିନ୍ତୁ ସେମାନଙ୍କ ସହ ଏମିତି କିଛି ଅଘଟଣ ଘଟିନଥିଲା । 

ତେବେ ଭୟ ରହିଛି ଯେ ନୁଡୁଲ୍ସ ବ୍ୟତୀତ ଅନ୍ୟ କିଛି ଖାଦ୍ୟ ପରିବାର ସଦସ୍ୟଙ୍କ ଅସୁସ୍ଥ ହେବାର କାରଣ ହୋଇପାରେ । ତ୍ରିପାଠୀ କହିଛନ୍ତି ଯେ ସେ ପୁରାଣପୁରର ସବ-ଡିଭିଜନାଲ ମାଜିଷ୍ଟ୍ରେଟଙ୍କୁ ତାଙ୍କ ଅନୁସନ୍ଧାନ ବିଷୟରେ ସୂଚନା ଦେଇଛନ୍ତି । ପୋଲିସର ସୂଚନାନୁସାରେ, ପରିବାର ସଦସ୍ୟ ଏହି ଘଟଣାରେ କୌଣସି ଅଭିଯୋଗ କରିନାହାଁନ୍ତି।