ମୁମ୍ବାଇ ୧୬।୪: ଏକ ମନିଲଣ୍ଡ୍ରିଂ ମାମଲାରେ ବୟଷ୍କ ବ୍ୟବସାୟୀଙ୍କୁ ରାତି ତମାମ ପଚରା ଉଚରା ପାଇଁ ବମ୍ବେ ହାଇକୋର୍ଟ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ଙ୍କୁ ତାଗିଦ କରିଛନ୍ତି। ହାଇକୋର୍ଟ କହିଛନ୍ତି ଯେ ଶୋଇବାର ଅଧିକାର ଏକ ମୌଳିକ ମାନବୀୟ ଅଧିକାର ଅଟେ। ଏହାର ଉଲ୍ଲଂଘନ ହୋଇ ପାରିବନି। ଉଲ୍ଲେଖଯୋଗ୍ୟ ଯେ ବୟଷ୍କ ବ୍ୟବସାୟୀ ଇଡି ଗିରଫ ବିରୋଧରେ କୋର୍ଟରେ ଆବେଦନ କରିଥିଲେ, ଯେଉଁଥିରେ ଇଡି ତାଙ୍କୁ ରାତି ତମାମ ପଚରା ଉଚରା କରିବା ପରେ ସକାଳେ ଗିରଫ କରିଥିବା ଉଲ୍ଲେଖ କରିଛନ୍ତି।
ମାମଲାରେ ବମ୍ବେ ହାଇକୋର୍ଟଙ୍କ ବିଚାରପତି ଜଷ୍ଟିସ୍ ରେବତୀ ମୋହିତେ-ଡେରେ ଓ ଜଷ୍ଟିସ୍ ମଞ୍ଜୁସା ଦେଶପାଣ୍ଡେଙ୍କ ଖଣ୍ଡପୀଠ ଶୁଣାଣି କରି କହିଛନ୍ତି ଯେ ବୟାନ ରାତିରେ ରେକର୍ଡ କରାଯିବା କଥା ନୁହେଁ। କାରଣ ଏହା ଯୋଗୁ ତାଙ୍କର ବୁଝିବା ଓ ବିଚାର କରିବାର କ୍ଷମତା ପ୍ରଭାବିତ ହୋଇପାରେ। ଏଭଳି ପ୍ରଥାକୁ ସମାପ୍ତ କରାଯିବା ଦରକାର। କୋର୍ଟଏହି ଆଦେଶ ୬୪ ବର୍ଷିୟ ରାମ ଇସରାନୀଙ୍କ ଆବେଦନ ଉପରେ ଦେଇଛନ୍ତି, ଯିଏ ପିଏମଏଲଏରେ ତାଙ୍କ ଗିରଫକୁ ଚ୍ୟାଲେଞ୍ଜ କରିଛନ୍ତି।
ଯଦିଓ କୋର୍ଟ ଇସରାନୀଙ୍କ ଆବେଦନକୁ ଅଗ୍ରାହ୍ୟ କରିଦେଇଛନ୍ତି ତଥାପି ରାତିରାତି ପଚରା ଉଚରା ପାଇଁ ଇଡିଙ୍କୁ ସତର୍କ କରିଛନ୍ତି। ଉଲ୍ଲେଖଯୋଗ୍ୟ ଯେ ଇସରାନୀଙ୍କୁ ଇଡି ଅଗଷ୍ଟ ୨୦୨୩ରେ ଗିରଫ କରିଥିଲା। ସେ ତାଙ୍କ ଆବେଦନରେ କହିଛନ୍ତି ଯେ ସେ ଜାରି କରାଯାଇଥିବା ସମନ ଆଧାରରେ ୭ ଅଗଷ୍ଟ ୨୦୨୩ରେ ଏଜେନ୍ସୀରେ ହାଜର ହୋଇଥିଲେ। ତାଙ୍କୁ ରାତି ସାରା ପଚରା ଉଚରା କରାଯାଇଥିଲା ତଥା ପରଦିନ ସକାଳେ ତାଙ୍କୁ ଗିରଫ କରାଯାଇଥିଲା।
ଏଥିରେ ଯାଞ୍ଚ ଏଜେନ୍ସୀଙ୍କ ଓକିଲ ହିତେନ ଭେନେଗାଓଁକର କୋର୍ଟକୁ କହିଥିଲେ ଯେ ଇସରାନୀ ରାତିରେ ତାଙ୍କ ବୟାନ ରେକର୍ଡ କରିବାକୁ ସହମତି ଦେଇଥିଲେ। ଆବେଦନ ଅନୁସାରେ ଇଡି ଅଧିକାରୀମାନେ ତାଙ୍କୁ ଭୋର ପର୍ଯ୍ୟନ୍ତ ପଚରା ଉଚରା କରିଥିଲେ। ତେବେ କୋର୍ଟ କହିଛନ୍ତି ଯେ ସ୍ୱେଚ୍ଛିକ ହେଉ ବା ନ ହେଉ ଆମେ ସେହି ଉପାୟକୁ ନିନ୍ଦା କରୁଛୁ ଯେଉଁ ଉପାୟରେ ଏତେ ବିଳମ୍ବିତ ରାତ୍ରିରେ ଆବେଦନକାରୀଙ୍କ ବୟାନ ରେକର୍ଡ କରାଗଲା, ଯାହା ଭୋର ୩.୩୦ ମିନିଟ୍ ପର୍ଯ୍ୟନ୍ତ ଚାଲିଥିଲା। ପୀଠ କହିଛନ୍ତି ଯେ କାହାର ଶୋଇବାର ଅଧିକାର ଏକ ମୌଳିକ ମାନବୀୟ ଆବଶ୍ୟକତା ଓ ଏଥିରୁ ବଞ୍ଚିତ କରିବା ମନବାଧିକାରର ଉଲ୍ଲଂଘନ।
