ନୂଆଦିଲ୍ଲୀ: ବଡ଼ ଅଘଟଣରୁ ବର୍ତ୍ତିଲା ବିମାନ।  ଲସ୍ ଆଞ୍ଜେଲସ୍ ଅନ୍ତର୍ଜାତୀୟ ବିମାନବନ୍ଦର (LAX)ରୁ ଆଟଲାଣ୍ଟା ଯାଉଥିବା ଏକ ଡେଲ୍ଟା ଏୟାରଲାଇନ୍ସର ବିମାନ ଉଡ଼ାଣ ଆରମ୍ଭ ହେବାର କିଛି ସମୟ ପରେ ଏହାର ଇଞ୍ଜିନରେ ନିଆଁ ଲାଗିଯାଇଥିଲା। ଏହାକୁ ପୁଣି ଥରେ LAXରେ ଏମର୍ଜେନ୍ସି ଲ୍ୟାଣ୍ଡିଂ କରିବାକୁ ପଡିଥିଲା। ଲ୍ୟାଣ୍ଡିଂ କରିବା ମାତ୍ରେ ବିମାନବନ୍ଦର ଅଗ୍ନିଶମ ବାହିନୀ ତୁରନ୍ତ ଇଞ୍ଜିନରେ ଲାଗିଥିବା ନିଆଁକୁ ଲିଭାଇ ଦେଇଥିଲେ। ଏହି ଦୁର୍ଘଟଣାରେ କୌଣସି ମୃତାହତଙ୍କ ସୂଚନା ନାହିଁ।

ଦୁର୍ଘଟଣାଗ୍ରସ୍ତ ବିମାନଟି ବୋଇଂ 767-400 ଦ୍ୱାରା ପରିଚାଳିତ ହେଉଥିଲା। ଯାହାର ପଞ୍ଜିକରଣ N836MH। ଏହି ବିମାନଟି ୨୪.୬ ବର୍ଷ ପୁରୁଣା ଏବଂ ଏଥିରେ ଦୁଇଟି GE CF6 ଇଞ୍ଜିନ ଅଛି।

୧୮ ଜୁଲାଇରେ ଡେଲ୍ଟା ଏୟାରଲାଇନ୍ସର ଏକ ବିମାନ ଲସ୍ ଆଞ୍ଜେଲସ୍ ଅନ୍ତର୍ଜାତୀୟ ବିମାନବନ୍ଦର (LAX)ରୁ ଆଟଲାଣ୍ଟା (ATL) ପାଇଁ ଉଡ଼ାଣ ଭରଥିଲା। ଉଡ଼ାଣ ଆରମ୍ଭ ହେବାର କିଛି ସମୟ ପରେ, ବିମାନର କର୍ମଚାରୀମାନେ ବିମାନର ବାମ ଇଞ୍ଜିନରେ ନିଆଁ ଲାଗିବାର ସଙ୍କେତ ପାଇଥିଲେ। 

ଏହା ପରେ ପାଇଲଟ୍ ତୁରନ୍ତ ଜରୁରୀକାଳୀନ ପରିସ୍ଥିତି ଘୋଷଣା କରି LAXକୁ ଫେରିବାକୁ ଅନୁରୋଧ କରିଥିଲେ। ଏୟାର ଟ୍ରାଫିକ୍ କଣ୍ଟ୍ରୋଲ୍ (ATC) ବିମାନର ସୁରକ୍ଷିତ ପ୍ରତ୍ୟାବର୍ତ୍ତନ ପାଇଁ ସମନ୍ୱୟ ସ୍ଥାପନ କରିଥିଲା। ବିମାନବନ୍ଦରର ଏମର୍ଜେନ୍ସି ଟିମ୍ ପୁରା ଆଲର୍ଟରେ ରହିଥିଲା। ଅବତରଣ ପରେ ଅଗ୍ନିଶମ କର୍ମଚାରୀମାନେ ଆସି ଇଞ୍ଜିନରେ ନିଆଁ ଲିଭାଇଥିଲେ। ସୂଚନା ଅନୁଯାୟୀ, କୌଣସି ଯାତ୍ରୀ କିମ୍ବା କ୍ରୁ ସଦସ୍ୟଙ୍କର କୌଣସି କ୍ଷତି ହୋଇନାହିଁ।

ଉଡ଼ାଣ ସମୟରେ ବିମାନର ଇଞ୍ଜିନରେ ନିଆଁ ଲାଗିବାର ଦୃଶ୍ୟ ଏକ ଭିଡିଓରେ କଏଦ ହୋଇଛି। ବିମାନର ଜରୁରୀକାଳୀନ ଅବତରଣ ବିମାନ ୟୁଟ୍ୟୁବ୍ ଚ୍ୟାନେଲ LA ଫ୍ଲାଇଟ୍ସର ଲାଇଭ୍ କଭରେଜରେ କଏଦ ହୋଇଛି, ଯେଉଁଥିରେ ବିମାନର ବାମ ଇଞ୍ଜିନରୁ ନିଆଁ ବାହାରୁଥିବା ଦେଖାଯାଇଥିଲା। ଏହି ଭିଡିଓ ସୋସିଆଲ ମିଡିଆରେ ପ୍ରବଳ ଭାଇରାଲ ହେଉଛି।

ଏହା ଚଳିତ ବର୍ଷ ଦ୍ୱିତୀୟ ଥର ଡେଲ୍ଟା ବିମାନରେ ନିଆଁ ଲାଗିଛି। ଏପ୍ରିଲ ମାସରେ, ଅର୍ଲାଣ୍ଡୋ ଅନ୍ତର୍ଜାତୀୟ ବିମାନବନ୍ଦରରେ ଆଉ ଏକ ଡେଲ୍ଟା ବିମାନରେ ନିଆଁ ଲାଗିଯାଇଥିଲା। ତଥାପି, ସମୟ ମଧ୍ୟରେ ଅଗ୍ନିକାଣ୍ଡର ସୂଚନା ମିଳିଥିଲା, ଯାହା ଫଳରେ ଦୁର୍ଘଟଣା ଏଡାଇ ଦିଆଯାଇଥିଲା। ବିମାନରେ ୨୮୨ ଜଣ ଯାତ୍ରୀ, ୧୦ ଜଣ କ୍ରିଉ ମେମ୍ବର ଏବଂ ଦୁଇଜଣ ପାଇଲଟ୍ ଥିଲେ। କୌଣସି ମୃତାହତର ରିପୋର୍ଟ ନାହିଁ।