ନୂଆଦିଲ୍ଲୀ ୦୮।୦୬: ଦୁନିଆରେ ରହୁଛନ୍ତି ଅନେକ ଜନଜାତି । ସମସ୍ତଙ୍କର ରହିଥାନ୍ତି ଭିନ୍ନ ଭିନ୍ନ ପରମ୍ପରା । କିନ୍ତୁ ଏମିତି ଏକ ଜନଜାତି ରହିଛି, ଯେଉଁମାନଙ୍କ ପରମ୍ପରା ଭିନ୍ନ ନୁହେଁ ଅଦ୍ଭୁତ । କେବେ ଶୁଣିଛନ୍ତି କି ଦେଖିଛନ୍ତି କି ମୋଟା ହେବା ପାଇଁ ଗାଈ ରକ୍ତ ପିଇବା କଥା । କଥାଟି ଆଶ୍ଚର୍ଯ୍ୟ ଲାଗୁଛି ନା, କିନ୍ତୁ ଏହା ସତ । ଦୁନିଆରେ ରହୁଥିବା ଜନଜାତିମାନଙ୍କ ମଧ୍ୟରୁ ଇଥିଓପିଆରେ ରହୁଥିବା ଜନଜାତି ଅନ୍ୟତମ। ଏମାନଙ୍କୁ କୁହାଯାଏ ବୋଦି ଜନଜାତି । ସବୁଠୁ ଅତ୍ଭୁତ କଥା ହେଲା ଏମାନେ ମୋଟା ହେବା ପାଇଁ ଗାଈର ରକ୍ତ ପିଇଥାନ୍ତି।

ବୋଦି ଜନଜାତିର ଲୋକମାନଙ୍କର ୬ ମାସ ଧରି ଏକ ପ୍ରତିଯୋଗିତା ଚାଲିଥାଏ। ଏହି ପ୍ରତିଯୋଗିତାରେ ଜଣେ ମୋଟା ବ୍ୟକ୍ତି ହିଁ ପ୍ରତିଯୋଗିତାର ବିଜୟ ହୋଇଥାନ୍ତି । ତେଣୁ ଏହି ପ୍ରତିଯୋଗିତା ଜିତିବା ପାଇଁ ସେମାନେ ଗାଈ କ୍ଷୀର ଏବଂ ଗାଈ ରକ୍ତ ପିଇଥାନ୍ତି। ତେବେ ବୋଦି ଜନଜାତିଙ୍କ ଏହି ପ୍ରତିଯୋଗିତାରେ କେବଳ ଅବିବାହିତ ପୁରୁଷ ହିଁ ଅଂଶଗ୍ରହଣ କରିଥାନ୍ତି ।

ପ୍ରତିଯୋଗିତାରେ ଭାଗ ନେଇଥିବା ଲୋକଙ୍କୁ ଏକ ଅଲଗା କୋଠରୀରେ ରଖାଯାଏ । ସେମାନଙ୍କୁ ପ୍ରଚୁର ପରମାଣରେ ଖାଦ୍ୟ ଏବଂ ପାନୀୟ ଦିଆଯାଏ। ସେମାନଙ୍କୁ ପୁରା ୬ ମାସ ପର୍ଯ୍ୟନ୍ତ ଗାଈର କ୍ଷୀର ଏବଂ ରକ୍ତ ପିଇବା ପାଇଁ ଦିଆଯାଏ। ଯେଉଁଥିପାଇଁ ସେମାନେ ମୋଟା ହୋଇପାରିବେ । ଏହାବ୍ୟତୀତ ଏହି ଜନଜାତିର ପୁରୁଷମାନେ ଉଲଗ୍ନ ରହିଥାନ୍ତି ଆଉ ଅଣ୍ଟାରେ ଏକ ସୂତା ବାନ୍ଧି ରଖିଥାନ୍ତି ।

ଇଥିଓପିଆରେ ବସବାସ କରୁଥିବା ଆଦିବାସୀମାନେ ଗାଈକୁ ପବିତ୍ର ବୋଲି ମାନଥାନ୍ତି । ଏଥିପାଇଁ ଏମାନେ ଗାଈକୁ ହତ୍ୟା କରନ୍ତି ନାହିଁ। ଗାଈଙ୍କ ଶିରା କାଟି ରକ୍ତ ଆହାର କରିଥାନ୍ତି । ଏହା ପରେ କଟାଯାଇଥିବା ଶିରାକୁ ମାଟି ଲଗାଇ ବନ୍ଦ କରି ଦିଅନ୍ତି । ଏପରି କରିବା ଦ୍ବାରା ଗାଈର ଜୀବନପ୍ରତି କୌଣସି ବିପଦ ଆସିନଥାଏ । ତେବେ ଏହି ଜନଜାତି ବିଶ୍ବାସ ରଖନ୍ତି ଯେ ଗାଈର ରକ୍ତ ପିଇବା ଦ୍ବାରା ସେମାନେ ପ୍ରତିଯୋଗିତା ପାଇଁ ମୋଟା ହୋଇଥାନ୍ତି । ପ୍ରତିଯୋଗିତା ଯିବା ସମୟରେ ପୁରୁଷମାନେ ପ୍ରଥମେ ନିଜ ଶରୀରରେ ପାଉଁଶ ଏବଂ କାଦୁଅ ଲେପନ କରିଥାନ୍ତି ।

 ତେବେ ପ୍ରତିଯୋଗିତାରେ ସବୁଠାରୁ ମୋଟା ବ୍ୟକ୍ତି ହିଁ ବିଜେତା ହୋଇଥାଏ। ଜଣେ ମୋଟା ବ୍ୟକ୍ତି ବିଜେତା ହେବା ପରେ ଏକ ଯେକୌଣସି ପଶୁକୁ ପଥରରେ ବଳି ଦିଆଯାଏ । ଆଉ ପରେ ହିଁ ପ୍ରତିଯୋଗିତା ଶେଷ କରାଯାଏ। ଏପରି ଅନେକ ପରମ୍ପରା ରହିଛି ଯାହା ଆଜିବି ଲୋକଲୋଚନରୁ ରହିଛି ଖୁବ୍ ଦୂରରେ ।

You Can Read: