ନୂଆଦିଲ୍ଲୀ: ଭାରତୀୟ ଜନତା ପାର୍ଟି ଆସନ୍ତା ଫେବ୍ରୁଆରୀ ୪ ଏବଂ ୫ରେ ଏକ ମେଗା ବଜେଟ୍ ରିଚ୍ ଆଉଟ୍‌ର ଶୁଭାରମ୍ଭ କରିବ । ଏହି ଅଭିଯାନ ଜରିଆରେ ସବୁ ବୟସ ବର୍ଗର, ଜାତି ଏବଂ ପେଶାର ପ୍ରତ୍ୟେକ ନାଗରିକଙ୍କୁ ବଜେଟର ଅର୍ଥ ପହଞ୍ଚାଯିବ । ଏହି ବଜେଟ୍ କାର୍ଯ୍ୟକ୍ରମ ପାଇଁ ପାର୍ଟିର ପାଞ୍ଚ ଜଣ କେନ୍ଦ୍ରମନ୍ତ୍ରୀ ସାରା ଦେଶରେ ଯାତ୍ରା କରିବେ । ପାର୍ଟି ସୂତ୍ର ଅନୁସାରେ, ଏହି ମେଗା ବଜେଟ୍ ରିଚ୍ ଆଉଟ୍ କାର୍ଯ୍ୟକ୍ରମ ଜରିଆରେ ସମସ୍ତ କେନ୍ଦ୍ରୀୟ ମନ୍ତ୍ରୀ ବଜେଟ୍ ଉପରେ ସାମ୍ୱାଦିକ ସମ୍ମିଳନୀ ଆୟୋଜନ କରିବେ । ଏହାସହ ପ୍ରତିଷ୍ଠିତ ବ୍ୟକ୍ତି ଏବଂ ବୁଦ୍ଧିଜୀବୀଙ୍କ ସହ ସବୁ ବର୍ଗର ଲୋକଙ୍କ ସହ ଆଲୋଚନା କରିବେ ।

ଗୁରୁବାର ସକାଳରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ମନ୍ତ୍ରୀମାନଙ୍କ ସହ ବୈଠକ କରିଛନ୍ତି ଏବଂ ଏହି କାର୍ଯ୍ୟକ୍ରମର ପ୍ରସ୍ତୁତି କରିଛନ୍ତି । ସୂତ୍ର ଅନୁସାରେ, ମେଗା ବଜେଟ୍ ରିଚ୍ ଆଉଟ କାର୍ଯ୍ୟକ୍ରମରେ ସୂଚନା ଏବଂ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ଜାମ୍ମୁ ଗସ୍ତ କରିବେ ଏବଂ ପର୍ଯ୍ୟଟନ ମନ୍ତ୍ରୀ ଜି.କିଷନ ରେଡ୍ଡୀ କୋଚି ଯାତ୍ରା କରିବେ ।

ସେହିପରି କେନ୍ଦ୍ର ଉଦ୍ୟମିତା, ଦକ୍ଷତା ବିକାଶ, ଏବଂ ଆଇଟି ମନ୍ତ୍ରୀ ରାଜୀବ ଚନ୍ଦ୍ରଶେଖର କୋଏମ୍ୱଟୁର ଗସ୍ତ କରିବେ । କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ଅର୍ଜୁନ ରାମ ମେଘୱାଲ ରାୟପୁର ଯାତ୍ରା କରିବେ । କେନ୍ଦ୍ର ଜଳଶକ୍ତି ମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ ଭୋପାଳ ଏବଂ ପୀୟୁଷ ଗୋୟଲ ବେଙ୍ଗାଲୁରୁ ପହଞ୍ଚି କାର୍ଯ୍ୟକ୍ରମର ଅଂଶ ହେବ ।