ଭୁବନେଶ୍ବର: ରାଜ୍ୟରେ ସରିଛି ତୃତୀୟ ପର୍ଯ୍ୟାୟ ମତଦାନ। ଶନିବାର ୬ ଲୋକସଭା ଏବଂ ୪୨ ବିଧାନସଭା ଆସନ ପାଇଁ ପଡ଼ିଛି ଭୋଟ୍। ତେବେ ଶନିବାର ମତଦାନ ପରେ ବିଜୁ ଜନତା ଦଳ, ଏକ ସାମ୍ବାଦିକ ସମ୍ମିଳନୀ କରି ମତଦାନ କରିଥିବା ଭୋଟରଙ୍କୁ ଧନ୍ୟବାଦ ଜଣାଇଛି।
ବିଜେଡି ରାଜ୍ୟସଭା ସାଂସଦ ସସ୍ମିତ ପାତ୍ର ସାମ୍ବାଦିକ ସମ୍ମିଳନୀରେ କହିଛନ୍ତି ‘‘ ଓଡ଼ିଶାବାସୀଙ୍କ ଆଶୀର୍ବାଦରେ ବିଜୁ ଜନତା ଦଳ ଆଉ ଥରେ ସରକାର ଗଢ଼ିବାକୁ ଯାଉଛି । ୬ ଟି ଯାକ ଲୋକସଭା ନିର୍ବାଚନ ମଣ୍ଡଳୀ ଏବଂ ସମସ୍ତ ୪୨ ଟି ବିଧାନସଭା ଆସନରୁ ଓଡ଼ିଶାବାସୀ ବିପୁଳ ମାତ୍ରାରେ ଜିତାଇବେ ।’’ ଏହା ସହ ପ୍ରଥମ ଏବଂ ଦ୍ୱିତୀୟ ପର୍ଯ୍ୟାୟରେ ଭୋଟ ଦେଇଥିବା ଓଡ଼ିଶାବାସୀଙ୍କୁ ଧନ୍ୟବାଦ୍ ଅର୍ପଣ କରିଛନ୍ତି ।
ସେହିଭଳି ଏହି ଅବସରରେ ସେ ବିଜେପି ଉପରେ ମଧ୍ୟ ବର୍ଷିଛନ୍ତି । ସସ୍ମିତ କହିଛନ୍ତି ‘‘ଓଡ଼ିଶାର ଭାରତୀୟ ଜନତା ପାର୍ଟି ଏକ ଶୋଚନୀୟ ପରାଜୟ ହେବାକୁ ଯାଉଛି।ଚତୁର୍ଥ ପର୍ଯ୍ୟାୟରେ ମଧ୍ୟ ସମସ୍ତ ଲୋକସଭା ଏବଂ ବିଧାନସଭାରେ ଆଉଥରେ ସଶକ୍ତ କରିବେ ବିଜେଡି ସରକାରଙ୍କୁ ।’’
ଆହୁରି ମଧ୍ୟ ସସ୍ମିତ ପାତ୍ର ପ୍ରଶାନ୍ତ ଜଗଦ୍ଦେବଙ୍କ ପ୍ରସଙ୍ଗକୁ ନେଇ ଘେରିଛନ୍ତି। ସେ କହିଛନ୍ତି ‘‘ବୋଲୋଗଡ଼ରେ ଗୁଣ୍ଡାରାଜ୍ କରିଛନ୍ତି ପ୍ରଶାନ୍ତ ଜଗଦ୍ଦେବ । ବେଗୁନିଆ ନିର୍ବାଚନ ମଣ୍ଡଳୀରେ ଏକ ପୋଲିଂ ଷ୍ଟେସନ ଯାଇ ଇଭିଏ ମେସିନ ଭାଙ୍ଗିଲେ । ପ୍ରିସାଇଡିଂ ଅଫିସରଙ୍କୁ ମାଡ଼ ମାରିଲେ । ଆଉ ଲୋକସଭା ପ୍ରାର୍ଥୀ ଅପରାଜିତା ଷଡ଼ଙ୍ଗୀ ତାଙ୍କ ଗାଡ଼ିରେ ତାଙ୍କୁ ଫେରାର କରିବାକୁ ଚେଷ୍ଟା କରୁଥିଲେ। ବିଜେପିରେ ମାଳ ମାଳ ଗୁଣ୍ଡା ରହିଛନ୍ତି । ଗୁଣ୍ଡାମାନଙ୍କୁ ଉତ୍ତରୀୟ ଦେଇ ଗୁଣ୍ଡାଙ୍କୁ ପୋଷ୍ଟର ବୟ କରିଛନ୍ତି ।’’ ଏହ ସହ, ତୁରନ୍ତ ତାଙ୍କ ବିରୋଧରେ କାର୍ଯ୍ୟାନୁଷ୍ଠନ ନେବା ସହ ପ୍ରଶାନ୍ତ ଜଗଦ୍ଦେବଙ୍କୁ ଗିରଫ ପାଇଁ ଦାବି କରିଛି ବିଜେଡି ।
