ଭୁବନେଶ୍ଵର: ଆଗାମୀ ଲୋକସଭା ନିର୍ବାଚନ ୨୦୨୪ ପାଇଁ ବିଜେଡି ଲୋକସଭା ଆସନ ଲାଗି ତୃତୀୟ ପର୍ଯ୍ୟାୟ ପ୍ରାର୍ଥୀ ଘୋଷଣା କରିଛି । ତୃତୀୟ ପର୍ଯ୍ୟାୟରେ ଦଳ ପାଞ୍ଚଟି ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା କରିଛି । ନିକଟରେ ବିଜେପି ଏବଂ କଂଗ୍ରେସକୁ ଛାଡ଼ି ଆସି ବିଜେଡିରେ ଯୋଗ ଦେଇଥିବା ନେତାଙ୍କୁ ଦଳ ଟିକେଟ୍ ଦେଇଛି ।
ବୁଧବାର ସକାଳେ ବିଜେପି ଛାଡ଼ି ବିଜେଡିରେ ଯୋଗ ଦେଇଥିବା ଭୃଗୁ ବକ୍ସିପାତ୍ରଙ୍କୁ ଦଳ ବ୍ରହ୍ମପୁର ଲୋକସଭା ଆସନ ପାଇଁ ପ୍ରାର୍ଥୀ କରିଛି । ପୂର୍ବରୁ ଏହି ଆସନ ପାଇଁ ବିଜେପି ପ୍ରଦୀପ ପାଣିଗ୍ରାହୀ ଏବଂ କଂଗ୍ରେସ ରଶ୍ମୀ ରଞ୍ଜନଙ୍କୁ ପ୍ରାର୍ଥୀ କରିଛି । ସେହିପରି ବଲାଙ୍ଗୀର ଆସନରୁ ସୁରେନ୍ଦ୍ର ସିଂ ଭୋଇ, ଗରଗଡ଼ ଆସନରୁ ପରୀନିତା ମିଶ୍ର, କେନ୍ଦୁଝର ଆସନ ପାଇଁ ଧନୁର୍ଜୟ ସିଦ୍ଦୁଙ୍କୁ ଦଳ ଟିକେଟ୍ ଦେଇଛି । ସେହିପରି ଭଦ୍ରକ ଲୋକସଭା ଆସନରେ ଦଳ ପୁଣି ଥରେ ବର୍ତ୍ତମାନର ସାଂସଦ ମଞ୍ଜୁଲତା ମଣ୍ଡଳଙ୍କୁ ଭରସା କରିଛି ।
ପୂର୍ବରୁ ପ୍ରଥମ ପର୍ଯ୍ୟାୟରେ ଦଳ ୭୨ଟି ସିଟ୍ରେ ପ୍ରାର୍ଥୀ ଘୋଷଣା କରିଥିବା ବେଳେ ଆଜି ଦ୍ୱିତୀୟ ପର୍ଯ୍ୟାୟରେ ଆଉ ୨୭ ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କରିଛି । ଏବେ ୨୭କୁ ମିଶାଇ ଏପର୍ଯ୍ୟନ୍ତ ବିଜେଡି ୯୯ଟି ବିଧାନସଭାରେ ପ୍ରାର୍ଥୀ ଘୋଷଣା କରିଛି। ଆହୁରି ୪୮ଟି ସିଟ୍ରେ ପ୍ରାର୍ଥୀ ଦେବା ବାକି ରହିଛି । ସେହିପରି ଲୋକସଭାରେ ୨୦ଟି ଆସନରେ ପାର୍ଟି ପ୍ରାର୍ଥୀ ଦେଇଥିବା ବେଳେ ଆଉ ଗୋଟିଏ ଆସନ ବାକି ରହିଛି।
