ଫୁଲବାଣୀ ୦୧/୦୨: ବାଲିଗୁଡ଼ା ତୁଙ୍ଗିଆରେ ଥିବା ଏକ ଇଂଲିସ୍ ମିଡ଼ିୟମ ସ୍କୁଲରେ ବିସ୍ଫୋରଣ ହୋଇଛି। ଏଥିରେ ୩ ଜଣ ଛାତ୍ର ଗୁରୁତର ହୋଇଛନ୍ତି। ଏହା ଫଳରେ ଜଣେ ଛାତ୍ରଙ୍କ ହାତ ପାପୁଲି ନଷ୍ଟ ହୋଇଛି। ଜଣେ ଛାତ୍ର ତା ସାଙ୍ଗମାନଙ୍କୁ କିଛି ଜିନିଷ ଦେଖାଇବା ବେଳେ ଏପରି ବିସ୍ଫୋରଣ ହୋଇଥିବା କୁହାଯାଇଛି। ଗୁରୁତର ଛାତ୍ରମାନଙ୍କୁ ବାଲିଗୁଡା ଡାକ୍ତରଖାନା ଓ ଏହାପରେ ଫୁଲବାଣୀ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
ଗୁରୁତର ଛାତ୍ରମାନେ ସପ୍ତମ ଶ୍ରେଣୀରେ ପଢ଼ୁଥିଲେ। ସେମାନଙ୍କ ପରିଚୟ ଜୋଶ ନାୟକ ଓ ନିହାଲ ନାୟକ। ବିସ୍ଫୋରଣର ପ୍ରକୃତ କାରଣ ସ୍ପଷ୍ଟ ହୋଇନି। ଏହି ଖବର ପାଇ ବାଲିଗୁଡ଼ା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି। ସୂଚନାଥାଉକି, ବୁଧବାର ଖେଳ ଛୁଟିରେ ଜଣେ ଛାତ୍ର କୌଣସି ଏକ ବିସ୍ଫୋରକ ଦ୍ରବ୍ୟ ଗୋଟାଇ ଆଣି ଅନ୍ୟମାନଙ୍କୁ ଦେଖାଇବା ବେଳେ ହଠାତ ବିସ୍ଫୋରଣ ହୋଇଥିଲା। ସମ୍ପୃକ୍ତ ଅଞ୍ଚଳଟି ମାଓ ପ୍ରବଣ ଇଲାକା ହୋଇଥିବାରୁ ପୂର୍ବରୁ ରଖାଯାଇଥିବା ବିସ୍ଫୋରକ ଛାତ୍ରମାନେ ଅଜାଣତରେ ଗୋଟାଇ ଆଣିଥିବା ସନ୍ଦେହ କରାଯାଇଛି।
